KAWNGPUI I ZAUH ANG U

Kan hriat ṭheuh angin kan Aizawl khawpui hi ruahman lawk lova din a ni a, in hlirin a khat tlat a ni ber mai. Duh tawka in sak hnuah kawng kan siam a, chu pawh chu kan nek leh ngat ngat a, kawng zau han nei ziazang kan ni lo e. Hmasawnna avangin lirthei lah chu a pung nasa hle mai si a, a lian tulh tulh lehnghal a, eng emaw kawng thar zawn a ngai a nih hi maw. Lirthei lei dawnin motor dahna nei lo thlengin motor dahna nei angin Local council aṭangin lehkha an la thei zel si a, kan la chep zel dawn a nih hi, kan LC te pawh lo fimkhur teh u khai. Motor parking hmun lah hi kan nei tlem si a, kawngpui zau lai deuhah motor inpelhna dala park hi kan kalphung a ni ringawt mai a. AR chhuahsan ramah tal hian Parking hmun lian deuh siam ni se a ziaawm deuh lawng maw le .

PARKING HOUSE SUPPORT SCHEME (PAHOSS) KHA :- Aizawl khawpui tawt lutuk tih ziaawm nan Pahoss kha kum 2019 aṭanga kalpui a ni a, khatih lai khan Aizawlah motor 4500 parkna hmun awm anga chhut a niin motor 18,000 park theihna tur tinzawn a ni. Aizawl hi Zone 4 ah ṭhenin lirthei parkna atan mimal ram pe thei hnenah pawisa peka sak a ni a (a tawi zawngin), hmun kilkhawr lam thlenga in sakna pek an ni. A guideline ang chuan LMV 5 park theihna kha a te ber a ni a, garage saknan motor pakhat zelah cheng nuaikhat hisapa ṭanpuina pek an ni a, garrage sak len lamah erawh bituk a awm lo. PAHOSS hmanga garage sa te chuan kum 10 tal parkingah an hmang tur a ni tih a ni a, a hnu lamah chuan an duh duhna atan an hmang thei tawh dawn ni awm tak a ni. Kum 10 hnuah hian Traffic Jam a reh tawh dawn nge ni, hriatthiam a har mang e! Garage luah man lah chu a in neituten an dawng vek a, sawrkarah chhun luh a awm lo a ni. Ka lo beisei ve dan chuan kawngpui kam leh hmun lun lai deuhah Parking hi sak a, chhuna kawngpui sira motor dah hi a awm lo ang a, kawngpui a thawl sawt turah ka lo beisei ve ngawt a. Mahse zan lama motor dahna tur ang hrimin hmun kilkhawr, Zemabawk Lungbial vengah te an han sa ta daih mai a, traffic jam ziaawm phah tak maw le!

Pahoss hmanga parking sakah hian mimalin man chawiin permanent takin motor an dah a, mi dang tan va dah ve ngawt a theih loh lehnghal a. A nihna takah chuan duhsak zawngte in an saksak a ni ber mai, traffic jam a ziaawm phah lo. Pahoss hi sawrkar tan chuan sum tam tak sen thlawnna leh mi tlem te hamṭhatna a ni a, mipuiin a zar kan zo lo a ni. Hmun lun lai leh puipunna hmun hnaiah a ram neitute phalna ngei tura ram leisak ni se, hun lo la kal zel turah pawh parking ni reng turin buatsaih ni se, kan chhawr zawk ngei ang. Tih tak takna hi kan tlachham deuh em aw tih hi rilruah a thar leh ṭhin a ni. Thil fel tawk lo liam tawh aṭang hian kan inzir fin a ṭul a nih hi maw. Pahoss hi a hlawhtling lo mai ni lovin a nuihzatthlak ka ti, eng zat chiah nge hemi hmang hian garage an sak ang le!

CO-ORDINATION COMMITTEE ON TRAFFIC MANAGEMENT:- Hun hmasa lama din tawh, mumal taka kalpui loh kha a uiawm hlein ka hria. Motor lei tur reng rengin Garage a nei ngei tur a ni, tih kha vawiin thlenga kalpui a la ni a. Kan sawi tak ang khian LC lam hian finfiah lem lova Garage nei anga lehkha pek mai hi an awlsam niin an sawi a, hei vang hian khawlaia motor zan riak a tam phah a ni thei ang. Sawrkar motor thleng hian kawngpuia zan riak hi a la awm a, zan lama kawngpuia motor riak hi he Committee hian an check khat hle niin a lang. Chhun lam ni se, motor jam pumpelh nana Pahoss hmanga garage sak lah khan awmzia a nei bawk si lo va, engtin nge ni zel dawn le. He Committee hian ṭan han la thar leh se la, garage nei lova khawlaia motor dah hi vai ṭhin se, chhun lamah pawh hian parking hmun baka motor dah hi ngun zawkin enfiah ṭhin se kan ziaawm deuh ngei ang. Kan kawng chep tak kara inhriatthiamna ringawta kan kal reng chuan, mipui kea kal tan pawh hian a him lo sawt hle tih hi ngaihtuah tel a ṭul hle a ni. Zan lama kawngpuia motor park avanga Fire services motorin kang ṭhelh hman tura ngaih, ṭhelh hman lova kang ral ta ṭum hnih a awm thu ka ziak ve tawh nghe nghe a ni.

Aizawl veng LC ṭhenkhat hian an veng chhung kawngpuia zan motor riah an phal lo va, hei hi a ṭhain rikrum thilah pawh a ṭangkai hle ang. Tun hma deuh khan Zotlangah te, College veng, Electric veng, Aizawl Venglai leh adt. ah hian zan lama khawlaia motor park an khap a, Aizawl Venglai leh Electric Vengah hi chuan an la chhunzawm reng a ni. Traffic management lam hian Aizawl khawpui veng tin LC te hi phungbawmah sawmin, veng tinah hian khawlaia motor zan riak hi phal lo ṭheuh se kan ziaawm mai ang. Chhun lamah pawh garage-ah leh parking hmun bakah motor park phal lo ila, mahni In leh dawr zawn mahni ta ang maia motor dah nana hmang ṭhinte hi dah botir se kawngpui kan lai zau a ni mai. Parking hmun pawh hi mumal zawka siamin ngun zawka vil ṭhin ni bawk se, public transport hman hi kan intihhmuh mai ang a, kan ziaawm deuh mai ang a.

Tun ai hian Traffic lama thuneitu hrang hrangte hian ṭan han la tak tak se, kan ziaawm theiin a lang tlat a ni. Police lam leh AMC bakah PWD thleng hian inrawn khawm se, parking siamna hmun leh road marking leh divider, speed breaker, zebra crossing leh adt. hi tun aia mumal leh dik zawkin a siam theih ngei ang. Local Council te hi thurualpuiin an veng chhung ṭheuhah theihtawp an chhuah chuan, a ṭangkai ber ber turte an ni tih hi hriat reng tur an ni bawk ang. Parking hmun ni si lo, kawng sir zau lai deuha lirthei rei tak tak park ṭhinte hian motor an tizam fo ṭhin. Droping zone hi nei tam ila, parking erawh a hmun bik bak hi chu strict taka vil ni se kan ziaawm deuh a rinawm e. Hei hi kawngpui zauh dan awm chhun a ni mai awm e. Kumthar aṭangin i hnatlang ang u le.

- H Lalchhuanliana