Kumtharah nun dan thar nen

Dam takin Pathian hruaina azarah kumthar 2026 chu kan lo chuangkai leh ta reng mai. Kan fel vang leh theihna vang ni lovin, Pathian venhimna azar liau liau a ni. Kumthar hian eng tin nge kan hma hunah min hruai dawn kan hre hauh lo va; khawvel hian eng thil nge a hmachhawn dawn tih lah kan sawi lawk thei na hek lo. Kan hma lam pên khat pawh hi kan hre lawk thei si lo va, nun uluk leh fimkhur taka kan kal a ngai a ni. Kumhluiah khan eng angin nge kan hun kan hman a, han thlir leta inchhir vawng vawngna tur kan nei em tih te hi inen let a ṭul khawp mai.

Hun hman ṭhat a ṭul

Kan dam chhung hun hi a rei lo khawp mai. Mitkhap kar lekah hian thil hi a thleng zung zung mai a ni. Kan chhungkaw tana hun a tam thei ang ber kan pek a pawimawh hle a; kan fate tan hun kan pek tam a pawimawh. Pa pakhat pawhin a thih dawnah, "Ka dam chhung hunah khan hnathawh nan ringawt hun ka hmang tam a, chhungkaw tan leh ka fate tan hun ka hmang tam tawk lo kha ka inchhir a ni," a ti. Naupangte tan hian chhungkua, nu leh pa hmangaihna leh thununna tluka enkawlna ṭha hi khawvelah a awm lo.

Naupangte tan chhungkua hi khawvela an lo awm ṭan tirha an inzirna hmasa ber leh an dam chhung nun hriltu tur a ni si a. Thufing pakhat chuan, “Thing zara sava pahnih fu aiin i kuta sava pakhat a hlu zawk," tiin a sawi. Kan hun hman tawhte kan ko let thei lo va, kan hma lam hun pên khat pawh kan hre hek lo. Nimahse, kan tun hun hi chu kan kuta awm a ni a; tun hun hian khawvel kan hmang ral dawn a ni. Kan tun hun zel hi thil ṭha tih nan kan hman tam hi a pawimawh khawp mai. Tun hun chauh hi kan kuta awm, kan duh thlannaa kan kal theihna hun a ni si a. Kan dam chhung hun tawite hi tun hunin kan hmang ral dawn a, uluk leh fimkhur taka kan kuta awm tun hi kan hman a pawimawh hle.

Mi dangte tan hun hmang tam rawh

Mahni tan chauha nunga mi dangte ngaihsak lo, mahni hmasial taka mahni lawmna tur leh nawmsakna tur chauh ngaihtuah kan pung tual tual a. Kan in sakte a inhnaih tual tual a, mahse, kan thinlung erawh a inhlat tual tual si. Tu mah hi mi dangte tel lova awm thei kan ni lo va, inmamawh hun hi kan nei ṭheuh. Mi dangte ngaihtuah lova mahni hmasial, mahni lawmna chauh zawngtute hi mi hlim tak leh mi awhawm an ni ngai miah lo nia; an duh ang ang nei thei mah se, an hlim chuang lo.

Mi dangte nena khawsaho thiam lo, mi dangte tana hnawksak, mi dangte thawhpuia khawsakpui thiam lote hi mi awhawm an ni ngai lo. Tunlaiah ṭhalai mahni hmasial, mahni lawmna chauh zawng an pung tual tual a, rilru buai, rilru hah an pung a, mahni intihlum pawh an pung zel a ni. Mother Teresa khan Kolkata-a fahrah enkawlna a din khan cheng 5 chauh a nei a, kut te dawhin a kal kual ṭhin. Mahse, a inpekna leh a rawngbawlna khawvel ram dang a thlen meuh chuan a rawngbawlna leh amah hriatrengna tur Missionary of Charity dinin, khawvel chaimawina sang ber pawh pek a ni ta hial a ni.

Mi dang tana kan inhman hian keimahni tan pawh malsawmna kawng hrang hrang hian a lo luang lut tlat mai. Mi dangte tana nung leh inhmang ṭhin te hi malsawmna tam takin a vûr leh mi awhawm an ni zawk ṭhin. Mahni hmasial râna mi dangte tana inhmang lote hian an tana malsawmna lo luang lut tur an dang chat a ni ber zawk.

Pathian tan hun pe tam rawh

Hun min petu leh neitu chu Pathian a ni a, a duh chuan min laksak daih thei. Ama bula kan awm tama kan hnaih hi a duh a, a chhan chu kan tana ṭhatna tur leh malsawmna kan dawnna tur a nih tlat vang a ni. Pafa inhmangaih deuh an awm a, ni tin an pafa chuan huanah lêng dunin an hlim em em ṭhin. A fanu chu a lo ṭhang lian a, tleirawl a lo nih chuan a pa bula awm reng a peih ta lo va, a pa chu a kal bosan ta daih mai a. A pa chu a khua a har ṭhin hle a, ni khat chu a pa tan thil hlu tak a pe a. A pa chuan, “Bawihte, i thil min pek avang hian ka lawm tak zet a, nimahse, ka duh ber chu ka bula i awm a, kan pahniha hlim taka inkawm tluka duh ka nei lo,” a ti.

Pathian tan hian hun hi kan inpe tam lo lutuk a, harsatna, buaina kan han tawk a, a tawpah chuan amah lo chu belh tur kan hre leh si lo. Sir Thomas Scott chuan, "He dinhmuna ka awm chiah hian Pathian leh hremhmun a awm tih ka hre ta, mahse, hun ka nei tawh si lo..." a ti. Khawvel mi ropuite pawh hian an thih dawn meuh chuan Pathian tana hun an pe lo, an ring duh lo kha an inchhir fo. Hun min petu chu Pathian a nih avangin a tam thei ang ber A tana hun kan pek ve hi Pathianin a phut tlat a ni. Kan thiltihna kawng tinrengah hian kan mamawh ber chu amah hnaih a, amah ṭih a ni.

Pathian ṭiha hnaih tlattu an che chhe ngai lo; chhungkuaa Pathian hnaih tlattu chhungkua an chhe ngai lo; hnathawhna engkima Pathian hnaih tlattu an hmuingil ṭhin. Politics a ni emaw, sorkar hna, company leh mimal hna pawh ni se, Pathian ṭiha hnaih tlattu kan nih chuan malsawmna kan dawng zel ang. Kum thar kan lo chuan kai hian chhungkaw tan, mi dang tan, Pathian tan kan hunte pe tam ila; chhungkua, ram leh mimal nunah te hmasawnna leh malsawmna tam zawk kan hmuh ngei i beisei ang u.

- Reuben Lalnunthara Hnamte