KUMTHAR CHIBAI U LE ENG TIN NGE I HMAN VE?

Kum a lo thar angin, Kan Ram leh hnam tân taimak chhuah thar ila, Opposition-te pawhin, dawt thu thehdarh bansan ula, Bible-a kut dinglam nghata kan Ram tán dik tak leh fel takin ro kan rel ang, tia intiam Chief minister kal liam tate pawh, ruling beih nân thu dik chauh ṭan chhan tawh rawh se. Saiip puan sina sual thupha chawi a, rorelna dik kalpui intiamtu ruling lai pawhin, an thusawi leh thutiam hlen tum rawh se.

Hebrai 1:1-2 (MGB) Pathian, hmasanga thlahtute hnêna bung tam tak leh kawng tinrenga Zâwlneitea thu lo sawitu khan, heng ni tawpah hian keimahni hnênah Fapaah chuan thu a sawi ta. Chu mi chu engkim rochungtuah a ruat a, chu mi pawh chuan khawvelte chu a siam a.

(Mizote kan vânneihna êm êm mai chu, Kan Zâwlnei te, Thu hrilhlawk a thleng dik ngai lo hi a ni. MLA Election dawnah Zâwlnei inti kan nei hluai a, rei an daih lem hlei lo va, Keimahni hnênah fapaah chuan, thu a sawi ta. Ti nana nâ a, Zâwlnei puansak kan ngai tawh lo va, Krista chu kan tân finnaahte, tlannaahte siâm a ni zawkzia kan hria. Heng zâwlnei inti lakah hian kan rilru i tihah lo vang u, chhiatna zawng kan pumpelh thei lo ve).

Kan mihringpuite chu kan bum thei pawh a ni ang, Fapa Kristaa thu sawitu, keimahnia awm erawh kan bum thei ngai lo vang, mi kan bûmin, dik lo taka sum kan hai luh chuan, mite hriatpui lohvin, hrehawm kan ti ṭhin, hetianga hrehawm tihna pawh nei lo mi chu mi piangthar lo, sum chauh pathian an ni.

Awle,

Kan nghahhlelh êm êm leh beiseina nêna kan thlir chu a her liam leh ta. Mizo Ṭhalaite khawvelah hian Kristmas leh Kumthar awmzia pawh kan hre ta lo, Rui ngai lo pawhin ruih kan tum a, Virginity hloh nâna hmang tawk lah bo lo. Min tlan tûra A Lallukhum ropui tak hlipa lo piang kan lawm danah hian, kan Lal Isua hi a lawm ang em? He hunpui min hruai thlengtu fak lo vin, nawmsip bawl nâna kan hmang ṭhin hi, Kristian Ṭhalaite hian kan ngaihtuah chian a va hun ta ve. Kum laihawlah All NGO-te'n ruihhlo a vâiin, Duty an huaihawt ngai lo va, Krismas dawnah YMA, VDP ten ngawrh takin Duty a kalpui mup mup maite hi zah nachang kan hriat a hun ta.

Chutih mek laiin, Duty lo che force deuh tawk kan awm ṭhin erawh tlawmngaia Duty kan nihna kan theihnghilh leh ṭhin hi chu a pawi tak zet a ni. Tual thihna hial a thleng ta fo mai. Hruaitute pawhin duty tur hi uluk zawkin ruat tawh se la, dawhtheihna nei chau takte hi chu ruat tawh suh se, kan him tlan zawk nân, Uluk zawkin a hman leh rem chang apiangte hi duty-tir tawh lo se la, tlawmngaia duty-te kut tuara tual thihna thleng ṭhin hi, a zahthlak tak zet a ni. Kut ram tak ho hi mi fing tak an ni lem lo, Duma tû rawh... tih chi an ni, ka dem tak zet bawk. Tu zu rui chungah mah kut thlak theihna dân kan nei lo, tih hi i hre nawn fo ang u.

Ṭhenkhat zu rim nam chungtein an duty an ti, hawtir zel rawh u. Mizo leh Mizo inkarah tual thihna thleng ṭhin hi, kum a lo thar ta ang hian rilru fim tak nên ruihhlo kan dona kawngah hian fim takin i kalpui hram hram ang u. Vawiina Mi nung, naktuka Ruang ni mai thei vek kan ni a, vawiina kut kan thlakte hian kan chhungte emaw, keimahni ngei Ruang hi min la rawn zawn ang a, kan chhungte khawhar hlauin an la rawn ṭhutpui dawn asin, kan thlan an la rawn lai ang. Duty kan nih avangin tu lakah mah hlei luat takin i khawsa lo ang u. Mizote hi, Rawh leh Suh, tih zawm thei miah lo hnam kan ni a, Tui pawh ren thiam lo kan ni, kan dinhmun hi en nawn fo ila.

Hman ralna tûr zawng lovin, khawl thei hnam kan nih a pawimawh a, kan pawisa neih chhuntein, Guwahati lama Rel chuân chakin kan zu khawral a, neih nei si lovin kan bazar haw a, bul kan ṭan leh ṭhin. Zofate hian chet dan kan thiam a hun tawh, thlai leh ei tûr pawh nei si lo hian kan thawveng êm êm a, hmathlir kan nei chau lutuk bik hi chu eng kan ti bik nge maw ni dawn le? Kan thawh peih loh thawktu hnam dangte an intodelh laiin, a leilung fate erawh hma kan sawn thei mawlh si lo lai tak hi a vei awm a, ram hmangaihtu, ram hruaitu kan mamawhzia ka sawi châmchi a, mi dang dik tûrin kan beisei a, hawh u, keimahni hi dik phawt ang u hmiang. Chu chuan hnam intihhmuh ṭhin kan nih angin reiloteah kan ram leh hnam hian hma a sawn ngei ngei ang.

Dik lohna silhfên inbelin, rinawm lohna pheikhawk bun siin, duhâmna kawrfual ha chung hian, kan Pathian leh kan ram leh hnam rawng hi i bawl tawh lo vang u. Khai le, kum 2025 chu a her liam tawh a, Kum 2026-ah hian, kan nun hlui ṭha lote chu hnawlin, kan lo tihsual tawh chu siam ṭhat leh theih ni tawh lo mah se, ni tin, vawiin chauh kan hun hmang ṭha zel ila, Zoram nuam kan din thar leh dawn nia.

Krismas leh Kumthar eng tin nge ilo hman ve le?

- Zothansanga. Chhiahtlang, Kawn Veng. 9612333536.