Kan hliamte dam rawh se
Tuna Mizorama sawrkar mek ZPM party-in thuneihna an chan hnua fûr hmasa ber–kum 2024 fûr lai khan Aizawl khawpui chhunga kawngpui hrang hrangte chu a chhe ngiang mai a, mi tam tak chuan kum 2000 hnu lama Aizawl khawpui chhung kawng chhiat ber lai a ni, an ti hial!
Chutiang bawkin khaw kar kawngte leh district khawpui chhung kawngpuite pawh a chhe em em a. Mizoram châk lak luhna kawngpui ber lah chu tlân hleih theih loh khawp leh hlauhawm khawpin a chhia a, kawng chhe lutuk avangin Mizoram mamawh phur truck-te pawh an tlan duh lo hial a nih kha.
Mipuiin beiseina sang tak nena thuneihna an pek ZPM kaihhruaina hnuaiah khati taka Mizoram hmun hrang hranga kawngpui a chhia khan nasa takin mipui rilru a hliam a, mi tam tak an thinrim a ni.
Tunah hian ZPM kaihhruai sawrkar chu kum 2 a pumhlûm ta a, kawng siamna hun ṭha (working season) hun thumna an hmang mek. Working season 2 an hman zawh takah khan kawngpui eng emaw zat siam ve bawk mah se, duhthu a sam lo; kan châk lâkna kawngpui ber NH Kawnpui-Sairang inkarah pawh kawng chhe lutuk vangin kan la buai zak zak a nih kha.
Tuna kawng siamna hun ṭha, ruahtui hul lai hian Aizawl khawpui chhung kawngpui chu ṭha tak maiin siam a lo ni ta a; tam tak siam zawh a ni tawh a, siam mek leh hmabak a la awm nual bawk. Tuna kawng siam chinte hi a ṭha viauin a hriat a, rûlngân pa ang zar mai kawng hnûm leh mâm ṭhaah kan tlan ta zar zar mai. ZPM sawrkar hnua kawng chhe lutuk vanga kan hliamte kha tunah, ZPM sawrkar lai vekin tihdam a ni ṭan ta. A va lawmawm em.
Kan hliamte a dam chho mek a, mahse, a la dam kim lo. Tuna Aizawl khawpui chhunga kawng siam hmabak la awmte hi chak takin, uluk tak siin sawrkar hian siam zel se, khaw tuihul lai ngeia an siam zawh hman ngei mipuite'n kan beisei tlat a ni. Tichuan, kan hliamte hi a dam chiang lehzual ang.
Aizawl chauh hi Mizoram a ni lo va, Aizawl chauh hi ngaihtuah theih a ni lo. Khawpui dang leh thingtlang khaw tam tak a awm; chungte chu Mizoram an ni a, kawng ṭha an mamawh ve. Khaw chhung kawngpuite leh khaw kar kawngpuite pawh sawrkar hian tun working season chhung ngei hian chak takin han siam zel teh se. Kan châk lakna kawngpui ber mawlh mai hi–ngaih pawimawh lehzual a ngai tak meuh.
World Bank Road kan tih mai ṭhin, Aizawl-Thenzawl-Lunglei Road mawlh mai hi–kan sawrkar hian chak lehzualin hma han la teh se. Tuna working season chhung ngei hian an siam a ṭul; an siam loh chuan a bik takin Kanghmun leh Pukpui inkar hi fûr a ni ang a, nasa takin a chhe leh ngei dawn. Chutiang a thlen loh nan leh, Lunglei leh chhim lam mipui hliam a dam theih nan kan sawrkar hian chak takin hma la mawlh rawh se.
- Lalhlanpuia