Sawrkar tih ngam loh leh tih theih loh CYMA-in a ti leh ta nge nge

Aizawla addict ho, rukru rual ni bawk ho huangtau leh zaktheilo lutuk ninawm thu te, inven reng a ngaih thu te, khua leh tui ṭhate tan a tîmawm zawk thu te, zing aṭanga khawlaia hmuh tur tam lutuk leh an inchiu mawlh mawlh lai leh an mu phengphungte leh, an kun ngawih ngawih te, an bungbu deuh kêt kêtte hmuh tur tam lutukte hi ka sawi zing ta hle. Khualzinte bumin, an thil an la ruksak mai a hlauhawm thu te, kan la mualpho dawn chauh thute ka ziak ve fo tawh a ni. Siam ṭhat tak tak theih an nih loh avanga khung khawma enkawl zui mai ṭha ka tih thute ka ziak tawh bawk.

Mahse, addict hote kan ram leh hnam, Mizote nun tihreawmtu leh timualphotu, khualzinte laka zahthlak bawk si, ni tin kan khawpui ber Aizawla a thleng reng leh awlsam taka ni tin kan hmuh rengte hi sawrkar hian tihngaihna a hre thlawt lo va. Sawrkar tan thil harsa a awm lo va, pawisa sen belh leh mithiam rawih emaw, contractor rawih emaw a ngai lo. Thupek khauh tak siam leh a force neih sate hmanga en zui a ni mai a; mahse, chu chu sawrkar hian a ti thei ngang si lo a nih hi.

Chuvang chu a ni ngei ang, hei, sawrkar aia chak zawk leh thil ti thei zawk Central YMA chu a lo lang leh ta rap mai e. Central YMA kumpuan hawnna 10.12.2025 zana Vanapa Hall-a neihah CYMA President Pu R. Lalngheta chuan fuihna leh thu ṭha tak tak a sawi a. Khawlaia ruihhlo ti ṭhin, hawna nei lo ho chu hemi zan la la aṭanga an vai tur thu leh, ṬBCC lama dah an nih tur thu te, a dahtu branch lam pawhin ngaihven zui tura a duh thute a sawi riap mai. A va lawmawm em.

CYMA chuan chawp leh chilhin a ti nghal tak tak ang tih ka rin avangin, 11.12.2025 zinga he thu LPS Chibai Mizorama ka ngaihthlak rual rualin, 'CYMA chuan a ti leh ta nge nge e' tih ngatin ka ziak nghal a ni. Ka lawm em avanga ziak nghal chûk chûk ka ni.

Kan ram tana ṭha lo leh mawi lo, ni tin nun tihreawmtu, ni tin Aizawl khawpuia thleng reng, awlsam taka hmuh reng theih leh awlsam taka tihreh theih reng, mahse, ni tin la thleng reng si ka vei em em addict hnawksakho chunga CYMA-in hma a rawn la ta hi ka lawm em em a. Min tiphurin beiseina pawh nasa tak min neihtir leh ta a ni.

Chutih rualin, ka vei em em pakhat dang, city bus-ho stand ṭhenkhata ding reng ṭhin, sawrkarin a um chhuah zawh loh ho leh city bus chhunga aia upa zahna leh hawihhâwmna tlahniam ta pawh hi CYMA hian khawngaih takin hma han la ve nghal se tiin ka ngen tak meuh a ni.

YMA ṭang fan fan la, vul zel ang che. Ka lawm e.

- K. Hmingthankaia