Missionary Day leh CCM
Missionary Day kan lo hnaih leh ta hle mai. Kum 1994 Gospel Centenary (11 January 1994) kha rilru-ah a thi thei lo. Thil rêng rêngah a hlutna siamtu chu a hun laia boruak siamtute hi a ni ṭhîn. Gospel Centenary laia Gospel Centenary boruak siamtu ber pakhat chu Centenary Khuang kha a ni. Khuang mai mai engati nge kan ngaih ropui viau pawh a tih theih ang. Kohhranin hma a lâkna a ni miau a ni. Kum 1983 Synod rorêl aṭang daih tawhin Chanchin Ṭha thlen kum za jubilee lawm hi rel a ni tawh tih a ni a. Sub Committee siam zîngah khuang pawh telin Rev. Dr. Zairema convener atan ruat a ni a, ani hi khuang lian nên Gospel Centenary lawm ni rawh se ti tlattu a ni.
Hun a lo kal tam ve ta viau mai, kum 1994 January thla tîr khan kan chhûngte Shillong aṭangin Gospel Centenary hmang turin Aizawlah an lo haw a. Silchar, Lailapur an rawn pelha hlimawm tak mai theihnghilh theih loh an tih chu, Vairengte dai Mizoram huam chin thlen chiah aṭangin kawngpui sir tawn tawnah Goepel Centenary flag kawng tluanin Aizawl thlengin a inphun pe tuar mai an ti a, a mawi hle an ti a ni. Khatiang êm êma ram pumin lâwmna ni a huhova kan hman leh urlâwk nasat kha a la awm âwm lo ve tih hi an hrilhfâk a la ni.
Centenary lawmna pui ber Lammual, Aizawla neih 11 January 1994 khân Centenary khuangpui chuan mi ngaih hlut a hlawh hle a, thla lakpuitu pawh an tam. La hriat reng chu, camera roll film thar kan thun kha AR Lammual leh a chhehvêlah kan hmet zo vek a ni. Kohhran hrang hrang infinin Berâm No leh Halleluia Chorus an remte kha centenary tiropuitu pakhat a ni a. Pi Teii (Gwen Rees Roberts) thusawi “Maichâma mei chu a mit tûr a ni lo,” tih kan ngaithla theite kha a vanneihthlâk ngawih ngawih mai a, rilru-ah a thar reng mai. Kohhran pâwl hrang hrangte min phuar khâwmtu lo ni zêl se.
Gospel Centenary kohhran hrang hrangin kan lawm te, khang hun laia Missionary Day-in kohhran hrang hrang min lo phuar khawmzia kha a hriat theih âwm e. Gospel Centenary denchhen khân kohhran hrang hrangin missionary te, Sâp ram lama mahni kohhran bulpui leh hruaitute leh Mizorama missionary-a lo thawk tawh Zosâpte kha kohhran hrang hrangin kan chah chhuak a nih kha. Sawi tawh angin Pi Teii lo chhuak mawlh khân lung an tilêng a, a thusawi kan ngaithlate kha a lo va hlu êm. Khâng lai khân Aizâwlah chanchinbu hrang hrang kha a tam viau mai a. Chanchinbu pakhat chuan fiamthu deuhin, Gospel Centenary laia kohhran hrang hrang chah chhuah sâpho rawn chhuak tam lutuk avâng khan fiamthuin, “In kohhran sâpho aiin kan kohhran sâpho an hmelṭha zâwk,” tihte kha hmuh tûr a awm a, hlimawm ve tak a ni.
Kohhran pâwl bîk tirh ni lo Sâp Upa leh Pu Buanga te rawn chhuah (January 11, 1894) champhaphâk denchhena lungrual taka kohhran tinte’n Missionary Day kan hmangho ṭhin kha Mizo kohhran hrang hrangte lungrual taka min awmtirtu ber a lo nih kha maw le tih loh rual a lo ni lo a nih hi.
Tunah hian Council of Churches in Mizoram (CCM) din a lo ni ta a, kum hnihna tur kumin hi a lo ni ta. CCM-ah hian a tirah kohhran 8 niin, tûnah hian kohhran 9 an awm. Engati nge kohhran inzawm khâwm pawl lian tak ni tûrah kohhran pangngai fu fu, member pawh ngah tak takte an awm loh aw tih hi rilru-ah a thar fo ṭhîn. Mizote rilru-ah Kristianna ṭhang chho zêlah hian a pawimawh ber chu Chanchin ṭha puan darh a ni a, hei vâng hi em ni dâwn Gospel Centenary pawh kha kohhran hrang hrangte’n phur taka kan lo hman ho theih chhan kha le. Missionary Day kan ti a, a kum 100-na Mizoram kohhrante’n a huhovin kan hmang luih luih a, a ropui a ni. CCM hian kha kha ngaihtuah thar lehin, kum 32 liam taa Missionary Day ni taka Gospel Centenary kan hmangho ang khan CCM hian bul han ṭan chho leh se. Kohhran pâwl hrang hrangte hi lungrualna hmunah kan kîrho leh mai lo’ng maw le. Hemi kawngah hian kohhran lian kan tihte hmalâkna leh bul ṭan ṭhat lehnate hi a va pawimawh dâwn êm. CCM hian Missionary Day hi Mizoram kohhran pumpui ta a nihzia chawi lâr se, kohhran hrang hrangte pawh CCM-ah hian inziak lut zel bawk se. Thawhhona ṭha leh kohhran hi a inhmeh a ni, kan thawhhona dâl thei chu paih zêl ila. Chutih rualin, kohhran hrang hrangte thawhho theihna hi CCM rilru a nih chuan, mahni kohhran pawl bîk inlâk vâwngna rilru paihin lungrual takin kohhrante hi mission rawngbâwlna hian min phuar khâwm zêl rawh se.
- RC Zosângzuala (Zualmâma), Vênghlui