Missionary Day leh Presbyterian Kohhran

January thla hi Missionary Day thla a ni. Presbyterian Kohhran lamin Chanchin Ṭha Thlen Ni atana March 15 an hman tâk hnu hian January 11 hi inhnial ní a ni ta deuh ber mai!

Gospel Centenary (January 11) lawm a nih hnu fê-ah Mizoram Presbyterian Kohhran chuan Chanchin Ṭha Thlen Ni chu kum 2014 (?) aṭang khan March 15 (1891)-ah an hmang ta zawk a. Hei hi mi tam takin an sawisel. Baptist Kohhran lam lahin Presbyterian lamin March 15 an hman hnuah Missionary Day hi an hmang uar sauh niin a lang deuh roh!

Mizoram Presbyterian Kohhran ka'n chhan phawt ang a, a hnua ka sâwt dawn! January 11 hi Mizoram sawrkarin Missionary Day a ti a, holiday a ni. BCM lam pawhin Missionary Day an ti niin ka hria. Presbyterian Kohhran erawh chuan Missionary Day an ti ngai lêm lo a, Chanchin Ṭha Thlen Ni an ti ṭhin. Missionary Day–missionary (mihring)-te ní ni loin, Chanchin Ṭha Thlen Ni an tih miau avangin chanchin ṭha rawn puangtu hmasa ber Rev. William Williams-a Mizorama a rawn thlen ní March 15 (1891) an hmang ta zawk hi a dik a ni; sawisel viau tur a awm lo.

Chanchin Ṭha Thlen Ni atana March 15 an hman tâk avang hian Mizorama missionary hmasa ber pahnih Sap Upa leh Pu Buanga te hlutna erawh a bo lo va, January 11 hlutna pawh a bo lo. Rev. William Williams kha a rawn kal emaw, kal lo emaw, Sap Upa leh Pu Buanga te leh an hnathawhte hlut dan a danglam lo; a hlu reng.

Presbyterian Kohhran hian March 15-ah Chanchin Ṭha Thlen Ni hmang zel rawh se, a ṭha. Mahse, Sap Upa leh Pu Buanga te leh Missionary Day an hlamchhiah phah ta deuh erawh a fuh lo a ni. 'Kan hlamchhiah pha lo' an ti mai thei; mahse, March 15 avang hian January 11 hi an hlamchhiah phah chiang a ni.

Mizoram Presbyterian Kohhran-in January 11 hi an din ní atan an hmang a, mahse, an kohhran mi tam berin an pawm lem lo niin a hriat; kei pawhin ka pawm lo. January 11 a lo thlen hian Presbyterian kohhran mite rilru-ah pawh Missionary Day a nihna hi an kohhran din ni a nihna aiin a lian zawk hle tih a hriat–an status leh sawi vel dan aṭangin! An 'kohhran din ni' aiin Missionary Day hi dah lian zawk se a duhawm; kohhran mipui duh dan zawk a nih a rinawm.

January 11 hi Presbyterian Kohhran emaw, Baptist Kohhran emaw din ni a ni chiah em? A hre zawkte ziah dan chuan, Sap Upa leh Pu Buanga te kha kohhran din tura rawn lut an ni lo a; January 11, 1894-a Mizorama an rawn luh a, 1897 tàwp thlenga an awm khan Presbyterian Kohhran emaw, Baptist Kohhran emaw an din lo.

Mizoram Presbyterian Kohhran din ní hi kei chuan, a rawn dintu tak tak Rev. DE Jones (Zosaphluia) lo thlen ni August 31 (1897) emaw, Mission Veng Kohhran din ní February 15 (1898) a ni turah ka ngai.

BCM pawhin January 11 hi an kohhran din ni atan an pawm niin ka hria. BCM din ni dik tak chu Sap Upa leh Pu Buanga te Mizorama an rawn luh nawn leh ni (Tlabung March 8, 1903) kha ni àwm tak a ni.

Sap Upa leh Pu Buanga te kha Mizote leh Mizoram tana an hluzia hi sawiin a siak lo. An rawn luh ní hi Missionary Day a ni a, kohhran mal ta a ni lo. Presbyterian Kohhran hian Chanchin Ṭha Thlen Ni (March 15) uar taka hmang chungin Missionary Day pawh hi tun aia uar zawkin hmang se a duhawm hle; he ni hian tun aia uar zawka an hman ve a phû a ni.

- Kezo