I am 16 yrs old

Hunpui kan hmang zo a, kumthar lawmawm tak kan chuang kai, kan vannei hle mai. Chhût leh ngaihtuah peihte tan chuan vawiin kan thleng leh theite hi a ropuiin lawmawm tak zet a ni. Krismas 2026 leh kumthar 2027 chu kan thleng ve leh thei ang em, tih chu ngaihtuah tham tak a tling a ni. Hunpui kan hman danah kan lung a awi em, tu lawmna ber nge kan siam tam ang aw, kan inkhawm mang lo a nih chuan a va ṭha awm lo ve. Engpawhnise, hun kal tawh a ni leh der tawh mai, siam ṭhat theih tawh loh. Thinlung, a lama hawn chunga kan hmang anih erawh chuan, lo nuam lo deuh pawh nise, a va tha dawn ve aw. Kum bul kan ṭan chho leh dawn a, kan hmaah ṭhal, fur, harsatna, vanduainate a lo awm leh dawn, chumi hmachhawn a, fel taka lo dawngsawng thei turin kan inpeih a ngai.

Vanglaini-te – Ṭhalai kan nih hun chhung, kum 40, kan nih thleng leh tleirawl/rawlthar hun laite hi kan vanglai ni ber chuan a hriat. Heng hun laite hi kan chak lai, hmelṭhat ber hun lai, ti ila, a dik ber ang chu maw. Kohhran ṭhalai lamah te nihna leh chanvote kan han nei ṭak ṭak a, kan star deuhte nena kan han inkhawm ho ṭhinte kha nuam ve deuh a ni. College-te, sikul-te kan han kal ho dal dal ṭhinte kha a nuam dangdai ve riau bawk a ni. Hla lar ṭhin - Final Countdown (Europe), Sweet Child O mine (Guns N Roses), etc. te kha a ngaihnawm ṭhin mang e. Pathian fakna hla ṭhin - R. Vanlalruati, K. Lalthanliana, Evan. Zorimawia, etc. te zai pawh khan beng leh rilru chu a titlai ṭhin hle mai. Pathian thusawi thiam - K. Lianthanga, F. Laltuaia, etc. te pawh khan min chawm ṭha ṭhin hle mai.

Vawiinah Chuan – Kum 50, ralah chuan kan taksate a lo chak tawk tawh lo a, thui tak tak kea kalte pawh kha a lo theih tawh lo a. Titi ho nikhua paw'n ṭawng sual palhte a hlauhawm ta a, hmana mi ang kha kan ni tawh lo. Khawtlang leh kohhran angah pawh rilru chu la fit viau mah se, tlin loh chin a awm tawh ṭhin. Nula hmelṭha tak takte pawh kha thlir liam vung vung mai loh chu tih theih tak tak a awm tawh lo. Leilung danah damchhung chanve hmang zo tawh kan ni a, ni tin nunte pawh uluk em em a ngai. Tun hma a, ka pi, ka pu, kan tih ang ṭhin kha vawiinah chuan kan lo ni ve reng tawh mai. Ei leh in chungchangah pawh a tui tui ni tawh loin, kan taksa mamawh kan hriat a lo ngai ta. Chaw kan ei ṭhin bakah food supplement lamte pawh nei thei tan chuan a lo ngai tawh a ni. Tar chu la ni chiah lo mah ila, kan hnaih ve viau tawh a ni.

Ṭhangtharte Tan – Keini mi upa lam deuh tawh hian eng nge ṭhangtharte tan kan hnutchhiah ve ang. Zu hi a ṭha lo tihte hi sawi tam ila, damdawi hman sual phei chu kumkhaw chawrlohna a ni, tih te pawh hi zirtir tam thei ila. Zuk leh hmuamte pawh thil ṭul lo lutuk a ni, tih te pawh hi kan sawi uar a ngai. Dawt sawi te, eiruk te, thamna pek leh lak te pawh hi thil ṭha lo tak a ni, tih kan sawi ve fo a ngai. Pathian thute pawh sawi tam ila, nunpui bawk ila, tih te, zirtir zel ila. Mi bik leh mithiamte'na thil ropui tak tak an hnutchhiah ṭhin ang chuan ti ve theih lo mah ila, kan thil sawi leh vei zawngte keimahni'n kan nunpui tlat chuan mi rilruah nasa takin thu a sawi thei a ni, tih hre tlat ila, a ṭha awm e. Engmah ni lo mah ila ṭhangthar lo la awm zel turte tan thil ṭha tak tak kan hnutchhiah ve thei a ni, kan vengah, kohhranah, ni tin hna lamah te, tichuan, ngaih ṭha takin kan awm thei ang.

Kan thupui lam kan la sawi ri mang lo a, kan hriat ṭheuh angin, tleirawl nih lai paw'n kum 16, lai hi chu a ber kan nih lai, sapho pawhina sweet sixteen an lo tih ve hial ṭhin kha a ni. Vawiinah chuan tleirawl emaw sweet sixteen chu kan ni tawh lo chiang hle a, mahse, tehkhin nan kan han hmang dawn a ni. Mipa pawh hmeichhia pawh mi invawng deuh chu kum 50 ralah pawh an la hmelṭha viau thei tlat a ni. Sipai pension emaw infiammi, etc. nih ve lem loh paw'n exer-te kan lak ṭhat a, taksa tana ṭha lo laka kan fihlim chuan kan la thar sur ve thei reng a ni. Aw le, miin, ka pu/pi, kum eng zat nge i nih ve tawh, min tih chuan, "Kum 16 chauh a lawm ka la nih, ha, ha, Iam 16 yrs. old," tih i'n tum tlang dawn teh ang, kumthar chibai vek u le.

- Lalchhandama Colney, Ph – 9862982321