MIZOTE LEH CHHIARKAWP

‘Queen of all sciences’ tia an sawi, Mathematics, Mizovin Chhiarkawp kan tih mai hi Greek thumal 'mathema' tih aṭanga lak a ni a. A lo inṭan hun chiah hriat ni lo mah se, Isua pian hma kum 400 chuang zet kalta aṭang khan mumal taka zir ṭan nia ngaih a ni. Khawvel hmun dangte ngaihtuah chuan Mizoten Chhiarkawp kan hriat ve ṭanna hi a la reilo hle a, tun thleng pawha kan hriat dan chu subject har tih hi a ni. Chutih rualin a pawimawhna leh a ṭangkaina a nasat chhoh zel avang hian, thiam duh leh zir chiang duh kan pung chho zel niin a lang. Kan ni tin nunah hian a hmannate chu a bet tel tlat a, Bazar kan kalnaah te, kan sumdawnna ah te, Office hna hrang hrang kan thawhnaah te hian chhiarkawp tel lo chuan hna a thawh tak tak theih loh a ni ber mai. Ram a changkang telh telh a, thiamna a sang chho zel a, Mathematics thiamna pawhin hma a lo sawn chho zel a, eng hna pawh dil dawn ila, Chhiarkawp eng emaw chen thiam loh chuan hna hmuh a harsa ta hle. Chuvangin National Policy on Education pawhin Mathematics pawimawh zia hriain pawl sawm thleng chu compulsory subject ah a dah a ni.

MATHEMATICS ṬANGKAINA

Kan hriat ṭheuh angin tunlai khawvelah chuan pawl 10 pass aṭang hian line hrang hrang zir tur a tam em em mai a. Doctor (MBBS) kan tih te, Engineer kan tih te leh Technical line hrang hrangte hi zir kan tum deuh fur ṭhin. Mizo zirlaite'n nih kan chak deuh ber ṭhin - MBBS zir tur hian alo berah pawl 11 thleng tal Mathematics zir loh chuan Formula tam tak Biology atana ṭangkai thiam a har hle ang. Biology lak avangin Mathematics hnualsuat ngawt theih a ni lo. Engineer nih tum tan pawh Pawl 11 leh 12 ah Mathematics lak ngei ngei a ngai a, pawl 12 zawh hnuah Engineering lo zir ta la, i zir aṭanga kum 2 (4th semester thleng) chu Mathematics hi zir a la ngai dawn a ni. Computer application zirna lam, BCA/MCA kan tih te pawh hian Mathematics hi an subject pakhat atan an zir tel ve vek a ni. Heng bakah hian Economics leh Commerce subject zir te pawh hi Mathematics eng emaw chen zir tel ve ngei ngei an ni bawk. Heta ṭanga lo lang ta chu, tunlai thiamna leh khawvel changkanna chi hrang hrang kan tihah te hian Mathematics hi an lo zir tel deuh vek a ni. Mathematics han tih mai hian zirna sang zawk lamah chuan ‘Pure Mathematics’ leh ‘Applied Mathematics’ in an ṭhen hrang deuh a, Pure mathematics lam chuan theory lam a kawk deuh a, Applied Mathematics kan tih ve thung chuan Mathematics hmang ṭangkaia science zir chianna lam a kawk deuh thung.

INDIA RAM MATHEMATICS

Chhiarkawp khawvela India sulhnu kan sawi dawn apianga rilrua lo awm hmasa ber fo chu, zero (bial kan tih) hmuchhuaktu an nihna hi a ni. India Chhiarkawp thiam Brahmagupta khan AD 650 velah zero chungchang chhui zauna lehkhabu siamin; zero leh eng number pawh belh ila zero tho a chhuak tih te, number hi a anpui chiah kan paih chuan zero a chhuak tihte, zero leh negative number a inbelhin negative number a chhuak tihte leh thil dang dangte a tichhuak a, tunlai primary school zirlai naupang pawhin an thiam vek ni mah se, a duangchhuaktu tan chuan ngaihtuahna a buai duh viau ngei ang. Brahmagupta hnu kum 200 vel, AD 830 vel khan Mahavira chuan, “Zero chungchang a rawn ziah belh ve leh a, zero leh zero a inpuntirin zero bawk a chhuak a, tin, number aṭanga zero paihin chu number vék chu a chhuak,” tih a rawn duangchhuak leh bawk a. An thil zir chhuah hmang hian zero chu khawvel pumah mumal taka hman a lo ni chhunzawm ta zel a ni. Brahmagupta leh Mahavira te hma daih tawh hian India mi zinga chhiarkawp thiam hmasa Aryabhata chua,n ‘pi’ value leh triangle area zawn dante pawh a lo chhut chhuak tawh a, Trigonometry lamah pawh ‘sine’ table te a lo siam daih tawh bawk. Aryabhata hian Astronomy lamah pawh sulhnu a lo nei nual a, Planet pakuate awm hmun leh Ni an hel tih te, Kum khatah ni 365 a awm tih te pawh a lo hrilhfiah bawk a ni. India ramin National Mathematics Day kan hman chhan, Ramanujan-a pawh hian Theorem leh Result 3,900 chuang a ziak a. A note bu pathumte chu Mathematics khawvela note bu lar ber, a hnu kum 100 pawha an la chai laih laih a ni. Kum 2012 khan Madras University chuan a pualin programme siamin kha tih laia Prime Minister Dr. Manmohan Singh-a chuan kum 2012 chu National Mathematics Year-ah puangin Ramanujan-a birthday December ni 22 chu National Mathematics Day atan a puang ta a ni.

MIZORAM MATHEMATICS

Mizo te hian Science subject kan zirna hi a la rei lo hle a. Kum 1973 hma lam zawng kha chuan Mizoramah Science hi General Knowledge subject-ah bet telin Biology lam a tam ber a. Science subject hi High school-ah pawh duh chuan lak loh theih a ni ṭhin. Chuvangin High school leh college-ah Science zirlai an tlem em ṭhin a ni. Mizo zinga B.Sc zir chhuak hmasa ber chu Rev. Dr. Zairema a ni a, B.Sc zir chhuak hmasa zinga a pathumna, Dr. L.N. Tluanga hi Mizo zingah chuan Mathematics-a mithiam kan neih hmasak, Ph.D pawh nei hmasa ber a ni a. Kum 1974 daih tawhah khan Gauhati University aṭangin Ph.D a lo nei tawh a ni. A hnu kum eng emaw chen chu Mizo zingah Ph.D nei an awm loh hnuin tunah chuan Mizo zingah Mathematics-a Ph.D nei an lo kat ta nuk mai. Zirna In sang lamah pawh Professor hial te pawh an lo awm ta. Pachhunga University College ah Mathematics-a Professor thei, Prof. LP Lalduhawma leh Prof. J. Lalvohbika te kan lo nei ta a, mi dang pawh an awm chhoh zel a rinawm. A lawmawmin Mizote Mathematics-ah hma kan sawn zia tilangtu pakhat a ni awm e. Tunah phei chuan Mizoram College chauh pawh ni lo, Mizoram pawn lama University-a thawk thei Mizote pawh an awm ta nual mai. Chuvangin Mizote hian Mathematics hi kan thiam thei tih a chiang ta hle. Mizoram Mathematics Society chuan Mathematics lama hma kan sawn theih nan kum tin School naupangte tan Mathematics Competition a buatsaih ziah ṭhin a, tunah chuan College lamah pawh subject thlan hlawh pawl a ni chho ta zel mai. Science subject dang tui lem lo, Mathematics lama tui em em te pawh a awm theih a, chutiang mite tan pawh kawng a inhawng mek zel a. Tunah hian Pachhunga University College-ah B.A. (Mathematics) a zir theih thawh bawk a ni.

- Dr. C. Zorammuana (Ph.D in Mathematics)