Written by
- Lalrinliana Colney
Sorkarin private hospital empanelment a suspend hi mipui tan a va ṭha lo ve
Mizoram sorkarin private hospital empanelment a suspend ta rup mai. A chhan nia sorkar thu chhuah chu, Mizoram Health Care Scheme Society hnuaia government approved rate anga damlo an enkawl duh loh avangin private hospital 15 lai, an empanelment a suspend sak a ni.
Sorkar hian mipui thlavang hauh anga a lan lai hian, a tuartu chu mipui tho ka ni leh dawn. A bikin Aizawlah hian civil hospital/ zmc hian damlo mamawh 20% vel bak khum a neih loh hmel a, health care atan pawh private hospital-te pawh pawm se tih lai a, hetia an ti mai hi, a tuartu tur chu mipui an ni tlat.
Private hospital-ten, tun hnaia thuchhuah an neih reaction a ni ngeiin a lang a. Chuti a nih chuan a va puitlin loh thlak awm ve! Chutih laiin private hospital-te pawh hian mipui harsatna hriain, an rate tih hniam dan a awm thlawt lo tak tak em ni? Hetia sorkarin private hospital empanelment a suspend a nih pawhin, Aizawl private hospital a lutte hi, tam tak chu an duh vang pawh ni chuang lovin, civil hospital-ah seat a awm loh vangte a ni. Heti hian tih theih nise a va ṭha awm ve. Seat a awm loh vanga private hospital-a in admit an nih chuan civil hospital-in 'seat a awm lo' tiin emaw, facility an nei lo tih hriat nan, certificate emaw lo pe ta se. Chutichuan, private hospital-a an awm pawhin bill thei ta sela. A nih loh leh private hospital bill-te hi, sorkarin rate a tuk sak ang talin reimburse ta se. Hei hi health care atan pawh hman ni ta se a va ṭha dawn em.
Sorkarin private hospital-te a hrekna anga lang hi, a tak takah chuan mipuite a hrekna a ni mah zawk. Damlohna thil hi, kan duh vanga thleng a ni lo, a lo thlen tawh chuan, inenkawlna awm thei ang ang, private hospital-ah senso sang tak pawh nise, kan pan rum rum a ngai. Civil hospital-in emaw Falkawn Hospital emaw-in min leng vek si lo. ICU phei chu kan indaih lohzia kan hriat vek hi. ICU a awm ngai dinhmuna awm tawh phei chuan, a awl awl um rum rum a ngai tawh ṭhin.
Chutih laiin, sorkar hian private hospital empanelment a suspend si chuan, retheite tuar tur a va nasa dawn em! Mipuite tuar theih tur hi thlirin, sorkar hian kan rawtna ang tal hian a siam ṭha leh thei lo’m ni?
- Lalrinliana Colney