Tourism hmasawn nan KAWNGPUI ṬHA
Mizoram hi tlangram chhengchhia ni si, mawina tam tak nei a ni a, chu'ng a mawina neih zingah chuan a chhengchhiatna pawh hi a tel a, he a chhengchhiatna hian kawng chhia erawh a huam lo ang.
Ni e, Mizoram hi tlangram mawi tak nei, leilung nghet lo leh chhengchhia a ni a, ram hausate ang ni tura lei chhungril hausakna hai chhuah tur awm mumal si lo, lei pawnlâng lam lah buh/thlai/thei ilo ṭhat duh bikna ni si lo, industry lian tak tak din nana rualrem bawk si lo a ni a; chutihlaiin, sum lalut tam state nih ve kan duh bawk si.
State dang angin sum hai luhna ṭha leh lian tak tak nei lo mah ila, ram tam takin an hausakpui khualzinte hîp theihna tur ram leilung erawh ram dang neih aia nêp bik lo kan nei ṭeuh mai. Hei hi kan sawrkar hotute pawhin hmuin, state sum lakluhna hnár atan hman tumin hma an la mup mup a, ram mipuiin kan hlawkpui hun ala awm ngei ang. Tun dinhmunah erawh chuan kan hmun hmingthang leh khualzinte hìp nana hmunhma kan neih ṭhat bik riaute panna kawngpui hi a tlangpuiin a chhuanawm loh takzet a ni.
Entir nan–Reiek tlang hi Mizoramin tlang kan neih hmingthang ber pawl leh tourist hîpna kan neih zinga lâr ber pawl a ni a, Aizawl khawpui aṭanga hnâitè ni mah se, Aizawl–Tlawng (Reiek Kài) thleng turin mawng kham úra motor-a insawh thlak phawt a ngai. Ailawng thleng chho turin insawh chhoh lehnghal char char a ngai a, Ailawng khua kan lut a, khaw chhungah chuan kawng a ṭha phian. Mahse, Ailawng–Reiek inkar km. 3 vel hi tu officer pension-te emaw huan kawng ai pawhin a chhe zawk.
Reiek khawchhung erawh kawng a ṭha leh phian lawi si a, Reiek khawchhung tlan pel detin tourist-te pan hlawh em em Aí tlang (Reiek tlang huam chhung) kal dawn chhin teh, Aizawl–Reiek khua i paltlang hnua Aí tlang pan leh tur chuan tun dinhmunah lirthei a uiawm teh a sin. Reiek Tlang chuàn hnuai lam kawng àna pûk pathum awmte hi khualzinte tlawh duh leh social media luah tam an ni a; mahse, a pûk 3-na thleng phei tur chuan jeep road deuh reuh (tunhma chuan metal road)-ah kal a ngai a, two wheleer hmanga kal tan phei chuan duhthâla inrahkhalh thei nih a ngai.
Heng bakah hian Reiek tlang piah lama kal turte tan he kawng hi zawh huphurhawm tak a ni lehzual a, Reiek piah lam hi Reiek pelhhma aiin a chhe zual em em zui.
Awle, Reiek khi chu entirna pakhat lek a ni a, mahse kawng chhiat dan khi chu a tak ngei a ni si. Kan ram mawina leh Kût/event kan neih/buatsaihte hmang ṭangkaia Tourism Department-in khualzin hipa state sum lakluh tipung tura hma a la hi a lawmawm takzet a, hetihrual hian, department dangte hian an thlawp ṭhat a ngai hle. A bikin kawng enkawltu PWD hian tourist hîpna kan neih hrang hrangte hi pan awlsam leh kal nuam turin siam thei se a lawmawm ngawt ang. Tourism hmasawn nana pawimawh pakhat chu kawngpui ṭha neih hi a ni tih hi sawrkara thuneitute hian an hmuh hmaih loh ngei ka beisei.
- HriatHriati Pa, Aizawl