AMC inthlan tur thlirlâwkna – 1

Kumina Aizawl Municipal Corporation inthlanpui neih tur hi a hun tak hriat la ni lo mah se, a hnai ta a niang, political party-te an an che sang sang hlawm a, Congress party phei chuan an candidate tur 13 an puang tawh a, puan hmabak paruk an la nei.

AMC inthlan tur thawm a awm aṭanga kan hriat nghal zat pakhat chu–candidate atana mi lar leh langsar zawn a ni. Hemi chungchangah hian political party lian pathum–ZPM, Congress leh MNF te hi a tua te mah an bâng lo.

Hun hmasa lamah political party-te'n candidate atan milar an zawng a, an tlinpui tawh ṭhin bawk a. AMC inthlan hmasa ber 2010-ah khan LPS Vision lama mipui hriat lar Pi Mali chu MNF-in Ward 4-ah vawrh chhuakin, a tling a, ZONET lama mi Pu Biakthansanga pawh an chenna Ward 18-ah MNF candidate niin a tling bawk.

Inthlan vawi 2-na kum 2015 khan ZONET lama mipui hriat lar Zonuni Fanai chu Congress candidate niin, Ward 13-ah a tling. Inthlan vawi 3-na kum 2021 khan TV presenter Pi Chuauzikpuii chu MNF candidate niin, Ward 10-ah thlan tlin a ni a, Pu David Zohmangaiha pawh Ward 17-ah MNF candidate niin a tling. TV presenter/host Baryl Vanneihsangi chu ZPM hovin Ward 19-ah candidate in, thlan tlin a ni a, TV host dang Daisy Zorammawii erawh chu Congress-in Ward 16-ah vawrh chhuak mah se, a tling zo lo thung.

AMC-ah hian inthlan hmasak ber aṭanga tun thlengin kan 'milâr' te hi political party tinte'n an lawm riau a, an lo hlawhtlinpui nual tawh bawk a, tun thlenga candidate atana an la zawng zel pawh hi a âwm tho mai.

Kumin 2026 AMC inthlan turah hian candidate tur mi 13 puang tawh Congress lam hian ram/state pum anga milar tia han sawi theih an vawrh chhuak lem lo a, a langsar deuh ber chu journalist lo ni tawh ṭhin Pu Lalremruata Renthlei (Ward 3) hi a ni mai awm e.

MNF lam chuan Mizo model langsar ber zinga mi R Lalnunthari (Nunui Rualhleng) chu an chenna bial pawh ni lo, Ward 4-ah an candidate dawn a, Ward 18-a an candidate tur nia sawi Lalrina Renthlei (basketball & snooker) pawh hi mi hriat hlawh bik a ni. Zaithiam DJ Lalvenhimi pawh MNF-in an candidate dawna sawi a ni hman a, mahse, ani hi chuan a duh ta lo niin an sawi. Ward 14-a MNF candidate tur nia sawi Pu Hmingthana pawh mi hriat hlawh tia sawi theih a ni.

ZONET news puangtu Zorinpuii Hlawndo chu an candidate ni turin ZPM, MNF leh Congress ten an be vek a, mahse, a duh lo nia sawi a ni bawk. Heng kan tarlan aṭang hian tu party-in nge milâr lawm ber tih a hriat theih awm e.

AMC inthlanah kan Mizo milarte political party-te'n an duh riau mai hi a chhan ni bera lang chu–mi hriat hlawh sa lote ai chuan an tling duh deuh nge ngea an hriat vang niin a lang. Tlin duh ṭheuh, AMC sawrkar siam duh ṭheuh an ni a, milar an lawm viau pawh hi a âwm ve tho a ni.

Chutih rualin, AMC politics-a milar kan uar lutuk hi chu kan khawpui tan a ṭha ber kher lo ve thei tih ngaihtuah thlen a ṭha ang. Party-te'n milar an zawn zinga a tam zawk hi chu an awmna khawtlangah pawh hruaitu pawimawh ni pha lo, la ni ngai lote an ni. Veng pakhat khawtlanga mawhphurhna leh nihna pawimawh la chelh ngai lote hi veng aia lian AMC ward leh Aizawl khawpui enkawltu atan an ṭha ang em tih erawh ngaihtuah tham tak a ni.

- Zoramchhana