Mizo hmeichhe daih zân Mizo mipa an awm
December ni 16, 2025-a chhuak Vanglaini article-ah khan 'Pian pun kan ngai e' tih thu K Lalnunsanga ziah a lo chhuak a, thil pawimawh tak tak, Mizote kan inenfiahna turte a ziak a, a tlangpui thuin a ṭha viau. Mahse, ka ha hawlh deuh a tel avangin, thil awmzia han sawi ve ka duh.
Mizo hmeichhiate'n nasa takin hma an sawn a, a lawmawm. Hmeichhiate hmasawn vang ni maw, hun eng emaw ti chhung chu mipate ṭan ngaihzia sawi a tam a, mipate demna lam hawi pawh a tam. Ni e, kawng tam takah mipate'n ṭan an lak a ngai em em a, a bik takin ruih theih thil chungchangah phei chuan inenfiahna tur an ngah hle.
Mizo ṭhalai thi zingah hmeichhia aiin mipa a lêt fein an tam zawk a, hei hi a chhan lian ber pakhat chu ruih theih thil vang a ni ang. Mipa zingah ruih theih thilin a thlen natna nei, chumi vanga thi an tam niin a lang a, heti lamah hian hmeichhiate an tam lo. Ruih theih thil chungchangah hi chuan Mizo mipate an inenfiah a ngai tak zet.
K Lalnunsanga article-ah khan, "Rev. Dr. H. Killuaia (L) khan a sawi thiam khawp, 'Mizo mipa aiin hmeichhia heti zah hian an tam a, kan hmeichhiate’n pasal tur an inchan lo a nih hi. Hnam dang pasala neih khap tur hian khawi aṭang mahin thuneihna kan nei lo, hetia lo khap ve ngawt hi thil âtthlâkah ka ngai,' a ti a ni awm e, a dik hle hian ka hria," a ti. Hei tak hi a ni kei ka helh chu.
Kum eng emaw zat chhung hmeichhia aia mipa thi an tam zawk fê avangin kan Mizo hmeichhiate'n Mizo mipa pasal tur an indaih lo, ti zawnga sawi a tam ta. Mahse, hei hi a dik lo. Mizo ṭhalai, nupui pasal nei lo zingah hmeichhia aiin mipa tlem zawk mah se, kan nulate pasal tur hi Mizo mipate'n an la daih zân zân a ni.
K Lalnunsanga article-ah vêk, "...nupui pasal nei rualah hmeichhia singhnih chuangin an tam mek a, pasal tur an hmu zo lo a nih chuan an demawm loh e," tih a awm. Tuna mipa leh hmeichhe zat aṭanga chhût a, mipa an tlem zawk avanga Mizo hmeichhiate'n pasal tur an inchan lo, tih ngawt hi a dik lo.
Tuna Mizo ṭhalai, nula leh tlangval zawng zawng hi kum 2026 chhungin nupui/pasal neih vek tur, Mizo ngei neih tur, tih ni ta se, mipate'n an daih lo a ni mai thei. Mahse, chutiang chu a ni dawn lo.
Mizo ṭhalai, nula leh tlangval an chhuak thar zel a, nupui pasal nei an awm zel bawk. Kumina pasal nei duh Mizo hmeichhiate daih Mizo mipa an awm a, nakkumah pawh an awm dawn a, kum dang zelah pawh an awm zel dawn. Pasal atana hnam dang nei tate zawng zawng daih zân zân Mizo tlangval an awm bawk. Engtik hunah pawh Mizo nula pasal daih Mizo tlangval an awm dawn; hei hi 100%-a thil chiang a ni.
Mizo mipa an tlem zawk avanga 'Mizo hmeichhiate'n pasal tur an hmu zo lo' tih ang chi phei hi chu sawi sawi chi a ni lo. Pasal an hmu zo lo a nih chuan, mipa an tlem zawk vang ni lovin, duhtu an hmuh loh vang te, an duhtui vang te, an duh ang an hmuh loh vang te, intawn fuh loh vangte a ni zawk; chapona vanga Mizo mipa hmuh hniam vang leh, chumi chu chhuanlama hmanga hnam dang duh hrim hrim zawk vang a ni thei bawk.
- Lalhlanpuia