A ṭha zawnga danglam

Bul ṭan tur hian tlâi luat a awm thei lo a; Pathian thu aṭang thlir phei chuan–a bul ṭan ṭhat aiin a tâwp khar ṭhat hi a hlu zâwk a nih kha. Pathian khawngaihnain kum thar, hun thar leh beiseina thar nen bul ṭana a ṭha zâwnga danglam thei turin hun kan la nei a. Chutianga danglama hmasawn tur chuan kum bul aṭanga bul kan ṭan hi a pawimawhin, a tâwpna pawh ṭha taka hlenchhuak tura kan rilru put hmang kan tihdik a pawimawh hle awm e.

Mahni aṭanga bul ṭan

Mahni nun hmu loa mi dangte nuna buaia mahni inman loh hi migring ze pui a ni a. Chu chu Lal Isua, keimahni anga mihring famkim khan a hmu chiang em em a. Chuvangin 'mahni mita khanchhuk awm hmu si loa unaute mita hmawlh te takte awm' hmu lian ṭhin kan ni. Chu kan rilru put hmanga chu keimahni aṭang ngeia kan thlaka kan danglam hmasak chuan mi dangte pawh an lo danglam dawn a ni. Chumi nei tur erawh chuan kan rin Pathian thu hi a taka nunpuia a zawmtu kan nih erawh a ngai a. Chuvangin Pathian thuawih, Pathian ṭih mi kan nihna aṭanga a ṭha zawnga danglam turin mahni aṭangin bul i ṭan phawt mai teh ang.

Mahni hnaa rinawm

Mizoram Kristiante'n kan mamawh lian tak chu mahni hnaa rinawmna hi a ni awm e. Mi rinawm tak tak an awm rualin mi rinawm loh langsar tak tak te avang zawk hian buaina tam tak kan tawk ṭhin. Sorkar hnathawk ṭhenkhat inthlahdah tlat, a hun taka Office thleng thei lo, bân hma duh em em te hian kan ram hmel an ti bâl a. Hlawh kan lak tlai leh kan lâk hara phun nasa leh Sorkar nêp ti em ema seltu te hi, Sorkar leh mipui hian kan hna thawh mekah hian nêp min ti ve ang em? Hna kan thawh chhan lian ber hi pawisa a ni a, mahse mahni mihringpuite hnena rawngbawlna (service) a kengtel tih hi kan hriatchian nawn a ṭul hle mai.

Pathian pawh hian a zawng zawnga Amah ringa a thu zawm turin min phût a, mahse chutah chuan a tawp miah lo. A thu zawmtute tan chuan an tisa mamawh chu pek mai piahlamah a belhchhah dawn tih min tiam a nih kha (Matt. 6:33). Sorkar hna kher ni lo, ni tin kan eizawnna dang dangah pawh min ruaitute mit tlung khawpa hna thawh hi kan bat a ni a, chutiang ti duh lote chu a ruaituin min bân emaw min chhawr zui duh lo emaw ṭhin a nih hi. Tlêmte chunga rinawm hmasa apiangte hi tam tak chungah pawh rinawm tura thlan an ni ṭhin a nih kha (Matt. 25:21).

Pathian ṭihna tak tak neih

Mi zawng zawngin kan mamawh leh kan nun tidanglam thei tu lian ber chu Pathian ṭihna tak tak kan neih aṭangin a ni ang. Mi tupawhin Pathian a ṭih tak tak chuan a hnaah a rinawm ang a, a hun takah dik takin thil a ti chat chat bawk ang. Nulat tlangvalna kawngah pawh rinawm taka awm tur chuan Pathian ṭihna tel lo chuan a theih loh. Dan leh Hrai kan bawhchhiat leh kan zawm loh tam tak te hi Pathian ṭihna nen chuan zawm theih vek a ni bawk. Dân hi awm miah lo pawh nise Pathian ṭih tak tak tu chuan a theih chen chenah a zawm famkim zawk ṭhin. Sorkar, Kohhran, NGO, Mi mal/ Private leh Company hrang hrangte hian dân ṭha tak tak kan nei a, kan zawma kan hman tur a ni. Kan bawhchhiat fo chhan hi Pathian kan ṭih loh vang chauh a ni.

Pathian ṭih tlattu Joseph-a khan Pharao-a emaw Potiphara emaw Aigupta Sipai chak tak takte emaw a hlauh avanga sual leh dan bawhchhe ngam lo a ni lo a. Pathian a ṭihna avang chauhin uirena sual, Pathian huat zawng tak kha a ti hlawhtling ngam lo a. Chumi rah chhuah chu Aigupta ram pumpuia roreltu pawimawh ber, sum leh pai tam tak chet velna pawh khawiha enkawl thei khawpin a awmta a nih kha. Kan ram, kan kohhran, kan chhungkua leh mi mal nun hmasawnna tur chu Pathian ṭihna kan neih tak taka a tak ngeia kan nunpuia kan hmanchhuah ngam hunah zel a ni ang.

Chuvangin kum thar aṭang hian a ṭha zawngin mi mal tinte hi danglam ngam ila, Pathian ṭihna tak tak nen kan eizawnna te hi kalpui ila. Pathian ṭihna tak tak nen Kohhrana kan rawngbawlna te hi kalpui zel ila. Kan thusawi leh kan thuhril chu amahin a nung nghal bawk ang. Sorkar Sikula zirtirtu te zawng zawng hian Pathian ṭihna nen kan sikul enkawl ila, Private Sikulin naupang an ngah zawk te tih te hi amahin a bo vek ang. Party Worker te leh kan MLA zawng zawngte hian Pathian ṭihna tak tak nei vek ila, eirukna leh therhlo beiseina chu amahin a bo bawk ang.

Chutianga Pathian ṭihna tak tak nena a ṭha zawnga danglam ngam turin mi zawng zawng kan insawm a ni e.

-Rinfela Zadeng