Mahni intum chawp Zonun

Chhiattawhna hmunah te, khawtlang huapa va thawh chhuahna hmunah te, puipunna hmunah te, mahni thawh chhuah va rin zelna hi mahni intodelhna hlu tak chu a ni. Rual ute hunlai khan ram chhuahnaah te, lâwm rawihnaah te, mahni siam sa ei an tum a, mi siam sa va ei a, va rin an duh ve lo. Mahniin chaw an fûn a, iptepui an ak a, chawhmeh an fûn tel ṭhin. Ramchhuahnaah zan tam riak tur an nih phei chuan mahni ṭheuhvin buhfai an tla tawk tur an pâi mai ṭhin. Mi chaw eisak te, mi thil neih rin te kha an duh ve lo.

Tunlaiah erawh chuan rîkrum thil thlenna hmunah ṭanpui tura va kalte’n an va awm chhunga ei leh in, rin tur pâi tel nachang hria an tam lo hle ṭhin. Mizote tlawmngaihna chu phût let nei lova mite ṭanpui a nih laiin, mite tihek zawnga va chet nen chuan a inhmeh ṭhin lo.

Khawmpui neihna hmuna kalte pawhin an châm chhunga ei leh in tur bakah, mahni rin turte ngaihtuah nachang hria an tam lo ṭhin. Chutiang ti chu an ṭhahnem lo hle ṭhin. Mikhual tan pawh eng emaw chen chu mahni intum chawpna chuan inthlahrunna rilrua awm chu a la kiang ṭhin. Mite tihautak lo zawnga chet hi pi pute nun hlu, Mizote’n kan nuna kan chhawm zel tur chu a ni.

Mite ṭanpui tura kan kalnaah, ei leh in turte min lo tumsak si chuan, ṭanpui ngai bawkin mite kan va pui tihna a ni. Mahni intum turin a hma aṭangin ruahmanna kan neih phawt a tul.

Intihsiakna (sport) neihna hmunahte chuan khaw hran aṭanga mikhual naupang tam tak an hotute’n an kaltir a, an zirtirtute’n remchang an tihna inah naupang ṭhian za hoin an thlentir a. In neitute’n tlawmngaih chhuahin an lo dawngsawng a, an châm chhunga an ei tur leh rin tur keng tel an tam lo hle ṭhin. Thlen inte fairêl bêl tihek zawng leh an sum tihek zawng te, an rilru tina zawng tea va thlen kha thil mawi lo leh zahthlak a tling. Heng hmunah te hian zirtirtute’n an zirlaite hnenah mahni intum chawp Zo nun ze mawi an hriattir fo a ṭul a, chu chu kan hnam nun a ni.

Khawvelah hian mi thatchhiate’n mi taimate thawh chhuah sa an ring a, mahni rin tur thawh chhuah tum lo, chenpuite thawh chhuah sa ring tlat chenna chhungkua chu an intodelh thei lo. Chutiang mi chu chhuahvahna hmunah pawh mahni intum nachang an hre pha lo va, mi rilru tinatu an ni ṭhin.

Kan hnam nun ze ropui, kan pi leh pute’n an nuna an lo chhawm – mahni intum chawp Zo nun chu thlir kir leh ila; a hun takah mahni intum chawp nachang kan hriat ṭheuh theihna turin ṭan i la thar ang u.

“Phût let nei lo Zote’n mahni intum chawp Zo nun chu va lantir zel ila, chutin kan haw leh hunah kan hming a mawi ngei ang.”

- H.Neihchungnunga, Durtlang