SUNDAY SCHOOL I KAL ANG U

Mizo Kristiante hian inkhawm chi hrang hrang kan nei a, he kan inkhawm hrang hrang zingah hian, kan ngaih pawimawh ber chu Sunday School hi a ni awm e. Sunday School inkhawm kan ngaih pawimawhna chhan chu eng pawh ni sela, Sunday school hi Pathian thu zirna ṭha tak a ni, kan tithei awm e, Heng baka mipui nawlpui tana Pathian thu zirna ṭha hi a awm chuang awm lo e. Chuvangin, Sunday School hi kal ṭheuh i tum teh ang u. Khawi lai laiah emawa mi tute emaw Pathian thu ziktluak lo sawi, ngaihthlak fo ai chuan, Sunday School-ah hian Pathian hi a nihna dik tak i zir chhuak ang u.

Mizoramah hian Sunday School hi Depatment pahnih puitling depatment leh naupang depatment-ah kan in ṭhen a, naupang lam hi chu kan inkaihhrui dan hi a ṭha thawkhat viauin a hriat a. Nimahsela, Puitling lam erawh hi chu, tuna kan inkaihhruai dan ringawt hi chuan, duhthu a sam chiahin a hriat loh a ni. Inhnaih tetein pawl kan siam lo thei lo a, zirtirtuten pawl an han la a, an thusawi a ri nuai nuai mai a, a ngaithlatu tan pawh ngaihthlak ber tur hriat a har hle a nih hi. Hengte avang hian sunday school hi kan hlawkpui tur angin kan hlawkpui lo a tih theih awm e. Chuvangin, Puitling lam Sunday School hi hlawk leh ṭangkai zawka Pathian thu kan zir ngei theih nan, Tun aia inkaihhruina ṭha zawk kan mamawhin kan zawn chhuah a ngai hle a ni.

Mi pakhatin hmun khat a ṭangin fiahfai takin min zirtir sela, a ngaithlatu tan chuan hriat a nuam zawk ngei ang le. Amaheawhchu, Sunday School-ah hian zirtirtu tam tak kan nei lo thei si lo a, A chhan chu hming lam tur kan mamawh tlat si a ni, Heng zirtirtu ho hian a indawtin hmun khat a ṭangin min zirtir mai se, a ṭha ang, tidawn ila, Sunday School zirtirtu zingah hian mi zirtir thiam lo fe fe an awm ve tho mai bawk si a. Chuvangin, zirtirtu ten a inchhawkin hmun khat a ṭangin min zirtir mah sela, mi zirtir thiam loin min zirtir changin kan hlawkpui tur angin kan hlawkpui chuang dawn lo a ni.

Mizoram Presbyterian Kohhran hian Puitling Sunday School zir tur hi an zin hma kum thum vel a ṭanga mi thiamte lo buatsaih lawk tawh a ni tlangpuiin an sawi a, Heng mi thiamte thu ziah hi a nihna leh a hlutnate kan zir chhuak ngei theih nan puitling lam Sunday School kan inkaihhruai dan siam danglam hi thil pawimawh tak a ni.Tuna a lan danah hi chuan Sunday School kal ṭhinte leh sunday school ngai pawimawh em emte hian sunday school a, kan zir ṭhin a ṭang hian Pathian thu a nihna tak zir chhuak leh hlawkpui kan tlem hlein a rinawm a ni. Chuvangin, kan tih dan hi sahuai thing vawn tlut lo hian, tlema her danglam hretin zir dan ṭha zawk kan ngaihtuah vat a hun ta hle mai.

Kohhran tinte hian Sunday School zirtirtu hi kan kohhran mipui zat en ranin, zirtir lam thiam mi an nih leh nih loh pawh hre loin kan inruat ṭhin a, zirtir lam thiam lo tak tak zirlai bu chhiar chhuk ta mai mai pawh an awm ṭhin ni tur a ni. Pawlah kan han zirtir a, zirlaite tan pawh ngaihthlak ber tur pawh hriat loh kawpin zirtirtute kan ṭawng mur mur mai si a. Hemi tih rehna ṭha ber chu hmun khat a ṭanga mipakhatin a zirtir mai hi a ni. Nimahsala, pawl tinah hming lamte a ngai avangin zirtirtu tam tak kan inruat lo thei si lo a, zirtirtu ni ve si a, tumah zirtir ve loh chu kan ti a ni mai thei a, Chuvangin, Kohhran tinte hian Sunday School pawl tina hming lam tur ruat ila, Zirtir lam thiam deuh bik, hmun khat a ṭang pawha min zirtir thei tur, mi sawm vel ruat bawk ila, Hei hi chu kohhran member a zirin a ruat tur zat chu a hriat mai awm e. chung mi ruat bikte chuan Pathian ni tin a inchhawkin hmun khat a ṭangin min zirtir mai sela a ṭha phian lo maw?. tiin kan rawt a ni.

Sunday School i kal ang u,

Mi tin tan a lo ni si,

A pui a pang kai ho zel se,

A hmei a pa tan a ni.

- Hausanga Hauzel