MUHCS A ṬHA ZEL E

Kan Sawrkar in mi zawng zawng huap damlo enkawlna senso (Universal Healthcare Scheme) a siam hi a tha hle tih kan hre tlangpui ta hlawm a. Nikum khan a man tlawm ber chi Rs 2,500 manah khan ka inziak lut ve a, kumthar ah chuan a man tam deuh hlekah in ziak lut tawh ang, tih rilru pu ka ni.

Kum 2022 khan Private hospital ah zanthum chiah ka awm a, natna serious pawh ka ni chiahlo, bill kan han pekfel chuan Cheng singruk chuang a lo ni a, ka rin ai chuan a tam nain, kha leh chen damdawiin a lut lova chhungkua Pathianin damna min lo pe kha ka lawm ta em em mai a ni.

Kohhran a thawk thin ka ni a, Kohhran in thawktute puala Healthcare Scheme kan siam lai khan, hotuten rorelna ah an sawifiah a, thawktuten hlawh 'basic' atanga thlatin 'cut' zat tur ruahman dan an han tarlan khan, heti hian ka rilru ah a lo awm a, a tam hauhlo mai, chutih laiin kan damloh hunte a in ang lo, kei ka dam laiin ka thawhpui a lo dam lova, thlatin kan thawhkhawm kha hotuten an enkawl a, damlo apiang ten kan in enkawlna ah kan lo zangkhai phah anga, thawktute zawng zawng kan in tanpui tlang dawn, tihna a ni, tiin ka lo 'Welcome' viau a ni.

Tuna kan Healthcare Scheme neihmek sawrkar in a han ruahman pawh khan tha ka ti a, Sawrkar hnathawk chauh nilo, mi zawng zawng huam tih kher hming a pu pawh hi, tha ka ti hle. Ram changkang zawkah hun rei tak an lo tih tawh hun a lokal a, kan ramah pawh hman a lo ni ve ta hi a lawmawm takzet a ni.

A tirah Sawrkar hnathawk te an hel deuh ni khan a lang a, pawi ka lo ti viau a, thlatin cut tura ruahman a sang deuh em ni ang aw? Sawrkar hnathawk te zawk hetia an awm, tihte ka ngaihtuah a, tunah chuan an in remta ni awm tak a ni, a lawm hle.

Rilru kaptu dang awm leh kha Private leh Kohhran Damdawiin lian zawk te zawmlo an awm kha a ni, mipui tam zawk mah in kan dawr an ni si a, thalo ka ti hle a. Mahse, hei tunah chuan Private leh Kohhran damdawiin te pawhin an zawm ta deuh vek ta niin a lang a, a lawmawn tak zet. Zirna leh damdawi in hi mi tinin kan mamawh, kan nep theihloh a ni a, hetianga damlo te in enkawlna Healthcare Scheme tha tak kan nei hi a lawmawm hle a, sawrkar pawh lo inthlak sela, Health Scheme hi tha takin kalpui zel turah ngai ang.

Health Minister tha tak kan nei a, MLA tumkhat tlinna a tha leh chak taka mi zawng zawng huap Healthcare Scheme siamtu pawh a fakawm e.

- Rev Lalbiaksanga Chinzah