THE BIBLE SAYS SO!

Pathian thu lama thu ngaihnawm lote zinga pakhat chu SIMNA thu hi a ni. Mahse chhandamna chang tura thu pawimawh ber pakhat chu a ni si. Kan Lalpan Pathian lalram thu A hrila A zirtir pawh khan A tawngkam hmasa berte zinga pakhat chu "Sim ula, Chanchin Tha hi ring rawh u" tih a nih kha (Marka 2:25). Kha kha chhandamna thu a ni. Kan ram thuhriltute hian simna thu hi kan sawi ta lo hle a, simna hi ngai kan ti ta lo em ni? Thu ngaithlatu tam berte lah hian ngaihthlak nuam an ti bawk si lo! Sim an ṭûlzia tilangtu chu, ngaihnawm an tih loh kha a ni! Bible erawh chuan simna hi chhandamna kalkawng a ni tiin kan Lal Isua Missionary thupekah pawh a sawi tel a nih kha "…simna thu leh sual ngaihdamna thu an hril ang" tiin a sawi (Luka 25:47). Simna avanga rinna pawh hi lo awm a ni a,"rinna chu Isua Lala siamtu pawh a ni" Rinna hi thutak hriatthiam ringawt a ni lova, Thutak Lal Isuaa innghah a ni a. Kan innghahna Lal Isua thuhnuaiah kan inpe tihna a ni.Simna hi rinna nei tura kan pal tlang hmasak ber tur a ni a. Bible min zirtir dan chuan Sim ula, Lal Isua hi ring rawh u min ti a. Simna atanga Lal Isua rin a ni a, Lal Isua rinna atanga chhandamna chan a ni thin (Mark 1:15; Eph 2:8,9; Tirh 16:31).

A nih leh enge kan sim tur tur chu ni ta? E le, SUAL le! Sual chu enge ni! Hei tak hi a pawimawh ta. Sual kan sim tur hrefiah tur chuan Genesis bung 3 hi kan hmu fiah tur a ni. Eng vângin nge Pathianin Evi leh Adama kha A hnen ata A hnawhchhuah tak kha? Tual an that em ni? An uire êm ni? Thil an ru em ni? Enge an tihsual? Pathian thu an awih duh lo, Pathian thua awm aiin Diabola thua awm an thlang zawk! Kha chiah kha, PATHIAN THUA AWM DUH LOHNA THINLUNG KHA SUAL BULPUI CHU A NI Kha chiah kha alâwm hnawhchhuah an nihna chhan chu! Paula chuan kha thuawih lohna kha alâwm mi zawng zawng misual kan lo nihna chu tiin a sawi (Rom 6:19). Tun thleng hian mihringte duhthlan chu Pathian thua awm ai chuan mahni thua awm hi nuamin kan ring a, its my life chu kan thlang zel a nih hi. Kha thinlung kha kan paih hma loh chuan kan sim hma loh chuan tihna a nih chu, Pathian Lalramah kan lut thei lo vang! Kan piangthar lo vang.

Tichuan sual sim awmzia chu mahni thua awm tawh lova, mahni thua nun chu Setana nena lungrual taka nunna a ni si a, Pathian hnuaia inphah thlapa nun–Lal Isua LAL ATANA NEIH–hi a ni. Isua Lal atana i nuna i lak luh chuan i nun chhungril berah khan Pathian Thlarauvin danglamna danglam let leh thei tawh lo A siam ang a, "Pathian hrin tawh phawt chuan khawvel a ngam zel si a" (I Johana 5:4) tih kha I nunah a lo awm tawh ang! Kan Lal Isuan A sawi angin tlangchhipa khaw awm angin i piangthar tawh tih miin an hmu nghal mai ang (Math 5:14).

Genesis bung 3-ah khan mihring chu kan lo chhe thûk hle a. Keini chuan an tisual kan ti lek mai thei e. Kan Lal Isua erawh chuan Diabola thlahah min ngai dêr a (Johana 8:44,47).Rul thlah min ti bawk a (Math 24:33). Keimahniah hian vanram thleng tlâk engmah a awm lo, a sual zo vek.

Keini mihring chauh ni lovin khawvel pumpui hi misual Setana thu thuin a awm tawh a(I Johana 5:19). Khawvel Lal chu Setana a ni tawh (Johana 12:31; 14:30). Hetiang hi a nih tawh avangin mihring te, van lam boruak te kan lei khawmual leh tuifinriat zawng zawngte hi then faia siam thar vek a ngai a. Chu chu zawlnei Isaian lo sawi lawkin "Ngai teh u, van tharte leh lei thar ka siam a nih hi," Pathianin A tih kha (Isaia 65:27). He lai thu hi Thupuan bung 21-a van thar leh lei thar tih nen khan thil hrang an ni a. Thupuana mi kha a nih lohna lanna chu Isaia-ah hi chuan thih thute a la inziak hi, vanram tak takah chuan chatuana nun a ni tih kan hriat kha.

Tichuan simna chu mahni thua nun duh tawh lova, mahni thua nun chu Diabola nena lungrual taka nun dunna a ni tih hriaa, chu nun chu hawisana Pathian thu thua nung tawh zâwk tura Lal Isua kuta pumhluma inpekna a ni tih chu i chiang ang u (Rom 12:1; 2 Kor 5:17)

- F.Lal Thanzuala