Chapchar Kût huap zau zawkin
Mizote kût ropui leh ngaihhlut ber Chapchar Kût a hnai leh ta. Kumin 2026-a Chapchar Kût atan a ngaihtuahtu lam chuan hman dan tur thui tak an duang tawhin a rinawm.
Chapchar Kût hi Mizo mipuiin kan hlut tial tial a, hnam dang pawhin min hlutpui tial tial a; a lawmawm. Kût hman dan tur rêltu ni ve ta ila, tuna kan hman ṭhin dan aia ṭha zawka hman dan ka hre bik lo mai thei a; chuti chung chuan ka vei deuh pakhat han sawi hrâm ka duh.
Chapchar Kût hian Mizoram mipui a dâp kim zawk theih nan leh mipui tam zawkin an hman theih nan sawrkar tha chakna (sum leh pai) ring hian Aizawl leh district khawpuiah chauh ni loin, khaw dangahte pawh hman ve theih ni se, tih hi rilrua awm ve reng a ni.
Sawrkar sum hmanga tuna Chapchar Kût kan hman dan hian Mizo mipui a huam kim tâwk lo. Tun aia mipui a huap kim zawk dan tur a awm. Sum leh paiah Aizawl leh district khawpui danga kût hmanna tur chauh sorkarin a tum a, khaw dang zawngah a thleng ve phak lo ṭhin.
Zokhuaa mipuite'n Chapchar Kût hi an theih ang angin an hmang ve ṭhin tho a, a hmanna sum erawh anmahni'n an remchan ang anga an pawh khawm a ni tlangpui. Bialtu MLA emaw, tu emaw pawk deuhin suma an ṭanpuite pawh an awm mai thei. Sawrkar sum chang ve hauh loa an ṭhahnemngaihna leh phûrna hmanga Chapchar Kût an lo hmang ve ṭhin hi a lawmawm tak zet.
Sawrkar hian Mizorama khaw hrang hrangte hi an remchan dan leh ṭha an tih anga Chapchar Kût hmang ve turin ti se, an hmanna sum senso a vaia a tumsak loh pawhin, eng emaw zat pe ve se; Chapchar Kût hmanna senso phuhrûkna atan khaw pakhat tan Rs 10,000 zel pek theih ni ta se. Sum chu pe nghal loin, kût hman zawhah, kût an hmang ngei a ni tih finfiahna ṭha tak nen department (Art & Culture)-ah lâk theih turin ti ta se. Hei hi thil theih a nih ngei a rinawm. Khaw 400-in hmang ta se, khaw pakhat tan Rs 10,000 thleng pek theih a nih chuan senso chu Rs 40,00,000 tihna a ni ang. Sum hi khaw len dan azirin Rs 5,000, Rs 10,000, Rs 15,000, etc ang pawhin a ṭhen theih ang.
A chunga kan sawi hi sawrkar tan tih theih loh tur a awm lo. Sawrkarin sum a sên belh hret a ngai dawn a; Chapchar Kût a ngaih pawimawh lehzual a, Mizoram mipuiin kim zawka kan hman theih a duh a nih phawt chuan a ti thei em em ang.
Engpawhnise, Aizawl leh district khawpuiah ringawt lo deuh mipui Chapchar Kût an hman theih a ṭha a; chutiang tur chuan sawrkar hian ngaihtuahna a sên a ngai. A nihna takah chuan, zokhuaa mite hi Chapchar Kût lo chhuahna bulpui 'chap' neitu, tun thlenga a taka 'chap la tichár' ṭhin an ni a; Chapchar Kût hlung zawka an hman ve theih dan tur ngaihtuah a ngai a ni.
Sawifiahna: 'Zokhua' tih hi ka hmang lui a, 'thingtlang' ka sawina a ni. Mi tam zawk chuan a dik lo an ti ang. 'Thingtlang' sawi nan 'zokhua' tih hi hman tel a ṭha ka ti a, sawina ṭawngkam (thumal) pahnih kan nei tihna a ni mai a, Mizo ṭawng tihhauhsaknaah ka ngai ve tlat! In duh leh hnial r'u (zawngte hmai hup).
- Zomuani Patea