A tih ngaihna a awm lo em ni?

Smart City ti-smart lotu langsar tak chu khawpui kawtthler hmun tin deuhthawa wifi/telephone leh TV cable hnawk lutuk mai a ni. Hmânah khan heng hrui hnawk lutuk hi an ching fel dawn emaw kan ti a, hmun ṭhenkhat chu an khawi ve lêm luam a, chhunzawm leh a awm ta reng reng lo mai.

Electric Department hi chuan felfai thei ang berin khawpui chhung electric hruite an zam ta. Hei aia kan changkan hunah chuan lei hnuaiahte an la phûm ve ang a, tuna kan tih theih tawkah chuan an ti ṭha hle a ni. Cable wire erawh hi chu a ngaihna a awm thlawt lo; hnawk tak a ni.

Bazar Bungkawn aṭanga Civil Hospital inkarte saw hnawk nuaih nuaih tak a ni a, veng tinah kâwn zau lai hi a hnawk zual lai a la ni zel. Kan ngai pawimawh lo nge, a tih ngaihna kan hre lo zawk?

Heng hrui zam hnawkte hi Telephone department leh mimal sumdawngte tihhnawk a ni hlawm a; khawpui enkawltu AMC hian an control thei lo tihna em ni le?

A chinfel dan hi harsa a ni lo maw le. Hrui zam apiang ṭâwn khawm ṭhat vek tur, ti mai se, heti em ema hnawk hi chuan kan dah tawp lo ang; kan inthlahdah vang mai mai a ni. Thuneitute khan ṭan han la teh u.

Thil dang leh chu, Lammual gate bula flyover ṭhing lutuk saw! A ban plaster ṭhat lohvin kan dah reng a, a châng phei chuan hnim a ṭo leh luih ṭhin. Kan hmun ualau lai tak, mipui punkhawmna hmun a ni lehnghal. A siam dan hrim hrim pawh hi, a bang cement-in kan ping phui tlat a, mi awm ṭha duh lo tan ṭawp tak taka chetna remchang kan siam a, zun hîng nen, a chang phei chuan êk pawh a awm ṭhin. Zialo tak a ni.

Hmun danga flyover kan siam, thir hmanga siam hi kan inhmeh tawk chiah, a felfai zawk bawk. Assam Rifles hmun kan hman dan tur master plan-ah khan saw flyover saw tihdanglam tumna awmin a lang lo niin ka hria; a awm reng dawn a nih chuan vuak chhiat vek a, thir hmanga siam vat chi a ni.

Ka sawi fo ṭhin, ka sawi nawn leh teh ang. Lirthei pollution test-na bawk hi. Engati nge mite tih dana petrol pump bulah a test-na kan dah ve mai loh? Mipui tana awlsam hi buatsaih hram hram tum tur alawm. Hna khat ni thei hna hnih kan siamsak reng mai hi kan sim thei thlawt lo em ni?

Kumin kum bul lam khan kan motor pollution test a hun tawh tih message ka dawng a, hun âwl ka neih loh em avangin kar tawp Inrinniah test turin ka kal a, Aizawl chhim lama hmun hnih test-na awmah chuan Inrinniin an lo inhawng lo nia maw le, a mak asin! Hmar lamah chuan an hawng an ti a, Durtlang leh Zemabawk lamah daih a la ni zui.

Hmanah khan motor van hmanga pollution test-na hi hmun ruk vela awm tur angte khan an sawi a, a reh leh ta veng veng mai bawk si. Pollution certificate kan ngai pawimawh em em a, kan ngaih pawimawh ang hian mipui tana awlsam, petrol thun paha test theih nghalna buatsaih mai hi a tih ngaihna a awm lo em ni?

- Lalrinliana Colney