AMC inthlan tur thlirlâwkna–2 "Ngûm khâk nei vek an ni"

'AMC inthlan tur thlirlâwkna' tih lêmah, hun kal tawha AMC inthlan lam a ni daih dawn.

Congress thupuangtu Dr Lallianchhunga'n tun kum 2026 Jan. 21 khan press conference a nei a, AMC inthlan tihkhawtlai chungchangah ZPM sawrkar an dem thu a rawn puang a. Ka rilruah 'Zâwngin a ngûm khâk a hmu lo va, a ṭhiante ngûm khâk a nuihzat' tih hi a lo lang uai uai a!

VC leh LC te, district council leh municipal inthlan chungchanga thuneitu chu State Election Commission a ni tih kan hria a. Congress thupuangtupa sawi dan chuan, AMC election chungchangah State Election Commission-in state sawrkar a râwn a ngai a, state sawrkar duh hunah inthlan buatsaih a ni ṭhin. Chuti a nih chuan ZPM sawrkar duh dan angin SEC hian inthlan hun a tikhawtlai tihna a ni ang.

Congress thupuangtu khan AMC inthlan tihkhawtlai chhana SEC hotute'n chhuanlam an sawite kha chhuanlam a tling lo, an ti a. Ngaihdan a inang lo thei ang. Ṭhenkhatin chhuanlam tlinga an ngaih laiin, chhuanlam tling lova ngaitu pawh an tam ang. Hei hi chu ka sawi tum a ni lem lo.

Ka sawi tum zawk chu, 'Zâwngin a ngûm khâk a hmu lo va, a ṭhiante ngûm khâk a nuihzat' tih hi a ni. Kum 2015 kha Congress sawrkar lai a ni a, kum tawp lamah AMC inthlan a awm. Khatih laia Congress sawrkar khan AMC inthlan hun an tikhawtlai ve tho.

AMC sawrkar hmasa ber, 2010 inthlan hmanga din kha Nov. 16, 2010-ah lak luh a ni a, November 16, 2015-ah term a tawp. Term tawp hmain inthlan a ni lo va, Congress sawrkarin inthlan an tihkhawtlai avangin AMC chu Administrator–Aizawl DC Dr Franklin Laltinkhuma kutah dah a ni. 2015 hian Nov. 26-ah inthlan a ni a, Dec. 10-ah AMC sawrkar thar lak luh a ni. 2015-a AMC inthlan tihkhawtlai a nih khan chhuanlam an nei ve ngei mai, mahse, an chhuanlam kha chhuanlam tling a ni bik em?

AMC sawrkar 2-na hi kum 2020 Dec. 10-ah a tawp a, hei hi state-ah MNF sawrkar lai a ni. MNF sawrkar pawhin AMC inthlan an tikhawtlai ve leh tho a, kum 2021 Feb. 16-ah inthlan a ni chauh. Hetih lai hi Covid19 hun lai a ni a, hei hi chhuanlam lian ber a ni.

Mahse, Covid19 kha chhuanlam a tling a ni bik lovah a ngaih theih ve tho. A chhan chu, Covid19 hlauh vanglai tho, August ni 27, 2020 khan VC leh LC inthlanpui buatsaih a ni tlat. VC leh LC inthlan kha buatsaih a hun rih loh thu mi tam takin an auchhuahpui a, VC term phei chu pawhsei theih a ni nghe nghe. Mahse, an ti lui tho. Khua/veng ṭhenkhatah phei chuan Covid a len nasat avangin an inthlang thei lo hial a nih kha. MNF sawrkar khan an duhnaah chuan Covid19 kha an hlau lem lo. VC leh LC inthlan atana Covid19 hlau lo khan AMC atan chuan an hlau tlat zu nia!

Engpawhnise, AMC inthlan tihkhawtlai chungchangah hian Congress, MNF leh ZPM te hi indema insawisel tur bik an awm lo–ngûm khâk nei vek an ni.

- Zoramchhana