KTP GENERAL CONFERENCE VAWI 61-NA, 2026 SAITUAL-IN AN THLENG DAWN TA

Saitual khawpui hian KṬP General Conference tum ṭhum 1966-ah te, 1976 leh 1992-ah te khan hneh takin a lo thleng tawh thin a, tuna a thlen leh tur vawi 61-na, Febrary ni 26–March ni 1, 2026, hi a thlen ṭum lina tur a ni.

Mikhual an tam dawn

Tun hma lam deuh kha chuan inkhawmpui lian dawn kha pandal sak hna bak, mikhual dawnsawn leh thlen in chungchangah thil hautak lutuk a awm lem lo. Tunah erawh ramin hma a sawn a, kawng a ṭhat tawh avangin chhak, thlang, chhim leh hmar, Zoram hmun tina mite kan inkalpawh zung zung thei tawh a. Lirthei ni se, a te ber aṭanga a lian ber thlengin kan kawl fir fer tawh bawk nen. Inkhawmpui hun tur lah boruak nawm vanglai tak, vawt lutuk lo, lum lutuk bawk si lo. A hmun lah lirthei chi hrang hrang, a lian a te, ke pahnih nei thlengin duh hun huna thlen theih, hmun hla leh hnai a awmte tan pawh pan nuam tak vek ni bawk si. Chu achhapah, Saitual khua hi lal Dorawta’n Kristian khua atan liau liauva a din a nih miau avang leh Mizorama dil hmingthang Ṭamdil leh pipu sûlhnu chi hrang hrang–Thapui-Chhip-Tlang, Lung-au, Mualzavata tah-reu, Chhura lungkawh, Lalruanga chhum halna, Fiangpuilala Biate ‘Rulchawm-kua’ awmna te, pasalṭha Vanapa Khawthlir, Saihmar Tlang te leh Mizo novelist hmasa ber L. Biakliana, Mizo historian pastor Liangkhaia fapa tuallenna ṭhin, a lungphun leh ama ruh ro ngei an zalhna hmunte a nih bawk avangin thu leh hla lama tuimite tan ngat phei chuan kal a chakawm leh zual ngei ang.

Pawimawh em em, min hîp khawmtu tur ber erawh chu inkhawmpui thupui ‘Pathian tana mi hlang’ (Sam 119:1-3) tih leh speaker tur Rev. P.C. Lalropuia a ni ngei ang. Amah hi Pathian mi hman, thlarau mi tak, tunlai ṭhalaite natna leh chhungkaw hri vei, depression, panic, anxiety, adt. avanga mangangte’n an pan huai huai ṭhin kha a ni. Vanglai hun hmang mek nula leh tlangval sing tel teh meuhte’n tih tak zeta thuchah ngaithla a, Pathian faka an han zai tur mawlh mai hian a hun thlen hlan min nghahhlelhtir. Solo leh special item dangte pawhin mit leh beng an titlai ngei ang. Chuvangin, tun tum ṭhalai inkhawmpui lian zet hi zawng a nêp thei lo hrim hrim.

Saikhawpui a inbuatsaih mup mup

Saitual hian KṬP General Conference 2026 an dawng dawn tih an chian aṭanga remchang hmasa berah Organizing Committee din a ni a, bialtu MLA/Minister te dawrin, kawng hrang hranga hmalak a ni. Sawrkar leh khawtlang hruaitute’n theihtawp an chhuah avangin khaw chhung inkalpawhna kawng pawhin hma a sawn chak hle. Chhung tinte lo inbuaisaih dan tur leh ṭan an lo lak dan tur kaihhruaina pek an ni bawk a, kawng tinrengah hmasawnna hmel hmuh tur a awm.

Mikhual thlen an châk, palai tan a phûrawm

KṬP General Conference vawi 60-na, 2024 dawngtu Ngopa a mikhual tam dan leh an dawnsawn dan engkim hre chung leh Saitual chu Ngopa aia Aizawl hnaih zawk a nih avangin mikhual pawh an buk zawk fe ang tih ring chungin, mikhual 40, 50 chu sawi loh, za tel teh meuh thlen inhuam leh thlen ngei tum an ṭhahnem khawp mai. Mi fel Joba dungthulin, “Mikhualte kawtthlerah an riak lo vang a, an tan kawng kan hawng reng dawn, lo kal zel rawh se” an ti a ni ber (Joba 31:32). A engamah hmain hmun hla leh hnaia awm, mikhual leh khawtual, ṭhenawm khawveng te, kohhran pawl hrang hrangte nen lam kan ṭang tlang a, kan inpumkhat em em a, tlang thianghlim nun kan tem ṭan chu a ni ta der mai.

Chutih mek laiin, mi ṭhenkhat tan mikhual thlen hi a huphurhawm mai thei bawk; a awm tho ve. Mahse, i huphurh lo vang u. Hmeithai rethei ve tak, Elisa lo mikhualtu, an chhungkaw sahriak tipunga an leiba zawng zawng rulhsak a, an intunnunna tur nen lam tihsak vektu Pathian khan min pui dawn alawm. Inkhawmpui kan han zo mah ang a, taksa leh thlarauvah kan hlawk ngei ngei ang.

Chutih rualin, zak zeh nei, KṬP káwra hmang, zu leh ruih theih thil paipâwn reng, chawhpawlh nuna nung, Pathian beisei tak tak si lo kan lo awm palh hlauh erawh chuan a pawi khawp ang. Chung mite tan chuan lo inthiarfihlim mai a ṭhat hmel. A chhan chu, mite’n Pathian faka hlim taka hun an hman lai leh dam chhunga Pathian tana mi hlang nih tuma an nun an hlan mek laiin police lal, kawr uk hate thupeka pindan âwm-khauh (lock–up) chhungah an chaw pek nghaka an lo ṭhut rân mai chuan, zan khat lek pawh rei an ti viau ang. Sim duh tak tak tan erawh chuan he hun hi hun ṭha ber a ni thung.

Saitual town mipuite u, i zám lo vang u

Kan lamah Lalpa a ṭang e. Ṭawngṭai pawlte ruahmannain he inkhawmpui lian pual hian a kum a kum, kohhran hote’n van Pathian kan au tawh a, kan la au mek zel. Min chhang ngei ngei dawn. Ringtute ṭawngṭaina Lalpa’n a hawisan rei ngai lo. Hebrai ziaktu chuan, ”Mikhualte chungah ṭhat chhuah theihnghilh suh u; chutianga tiin ṭhenkhatte’n hre lovin vantirhkohte an thleng si a” (Hebrai 13:2) a tih kha. Zoram dung leh vânga ṭhalai rual, “Isua neih ka duh zawk, thil dang zawng aiin,” ti ngam ngat, ‘Pathian tana mi hlang’ nih tum, sing tél fuan khawmna Lalpa’n a hawisan thei lo ang, a hawisan dawn lo hrim hrim. A vantirhkohte in thleng dawn. Mikhual leh khawtual tan Lalpa’n malsawmna a dah ṭeuh tih i hre reng ang u.

Thil mak a thleng ngei ang

Chhangpêr panga leh sangha pahnih lek hmanga a thusawi ngaithlatu mipui sangnga zet puar taka hraitu khan a thutak ngaihthlak tumtute leh lo mikhualtute inpekna leh insensona zawng zawng te a tithlawn lo vang tih i ring tlat ang u. Mak deuh mai chu, Pathian mite lo mikhualtute’n malsawmna an dawng tlat zel ṭhin hi a ni. Abrahama te nupain Lalpa mite ṭha takin an lo dawngsawng a, tar hnuah fapa pek an ni a. Rahabi nawhchizuar pawhin enthlatute a lo mikhual avangin an chhungkua chhiatna rapthlak tak lakah chhanhim an nih phah bawk. Tirhkoh Patera pawhin mikhual thlen hi malsawm dawnna hnâr a nihzia hriain, duhsak takin kohhran hote hnenah, “Phunnawi lovin inmikhual tawn ṭhin rawh u,” (I Petera 4:9) a tih lawm lawm kha.

Hawh u, Lalpa’n thil ropui tak min tihsak tur beiseiin KṬP General Conference vawi 61-na Saitualin a dawn tur hi hlim takin i hmuak ang u.

- Upa Dr. Lalsiamhnuna