LADC result buaithlak mah se a ṭhatna

LADC inthlan result kan hre tlangpui a, result puan atanga ni 45 zet hnuah pawh sawrkar form thei lovin an awm a, a pawi hle. Kan Governor tehreng pawh hi a sual em mai, sawrkar siam thei nia insawi CEM tur a pawmpui duh lo hi Lai district mipuite zahlohna pawh a kâwk deuh chu a ni. Chutih laiin, ADC lam hi a ring hlei thei lo a nih pawhin a demawm hran lo ve, kan ropui lem lo ve em bawk a ni.

LADC 12th MDC General Election result hian ṭhatna riau a nei thung tlat mai. Kan hre ṭheuh va, chuti taka inngeih ngai lem lo Congress leh MNF te inthlan hmain an thawk ho va, chu chuan Mizorama ruling ZPM a nghawng a, MDC paruk chauh an neih phah a. Thil mak tak chu, inthlan hmaa thawkho, sawrkar inṭawm siam thei lovin an han tlawlh a, a hnuah an han ti ṭha leh a, mahse, tun 24th January thleng hi chuan an la mumal thei lo chu a nih hi.

LADC inthlan result ṭhatna. Pakhatnaah chuan Congress party a tiphur; Mizorama MLA pakhat chauh nei party-ah phurna a thlen. Chutih laiin, MNF party tan pawh phur fêna tham an tling a, anni party hi Dampa lamah Dr Thangtea vangin an lo che tha tawh bawk nen. Chutih mek laiin, BJP pawhin MDC pahnih lai an lo nei ve ta bawk a, anni party pawh hi an phur tharin a rinawm.

Mizorama ruling ni mek ZPM party LADC-a seat 6 chauh la tan pawh hian ṭhatna a awm tlat dawnin a lang, a chhan chu 2028 inthlan a la hla deuh hlek a, nasa takin ṭan a laktir dawn a ni. LADC-ah hian eng party mah inchhuang thei awm lo va, result a han awm hi Mizorama party zawng zawng tan ṭhatna a nei vek a ni.

Chutih laiin, hei hi ka han sawi teh ang, party zawng zawngte’n an hriat atan. ADC lam boruak hi chu a dang a, party boruak a awm tho laiin chhungkhat laina leh sum lamin kawngro a su lian em a, party tute mah hian ngaih tihṭhat nan hman lutuk chi a ni hran lo vang. Phur u la, ruling lam pawhin ṭan la bawk u la; tun aṭanga hma la thiam thiam 2028-ah chuan in che ṭha ang.

- Rev Lalbiaksanga Chinzah