Gas bur mamawh loh hun a nghahhlelhawm

January 14, 2026 khan gas bur mamawh tawh lo a, chenna ina gas kan herh haw mai theihna tura hmalak mekna zirchiangin, Food Civil Supply & Consumer Affairs (FCSCA) Minister B Lalchhanzova team kan zui a, a inchhirawm loh hle.

FCSCA Minister hi FCSCA Secretary Teresy Vanlalhruaii, FCSCA Addl. Secretary Andrew H Vanlaldika leh FCSCA Director Saizikpuii ten an ṭawiawm a ni. Tripura Natural Gas Corporation Limited hotute nen inkawmhona an neih hnuin Tripura-a Natural gas hmangtu industry lian PRAN Beverages (India) Pvt. Ltd., Tripura Industrial Growth Centre, CNG Station leh ONGC hmun puite a tlawh kual a; eirawngbawl nana natural gas hmangtu pipeline connection 330 awmna Subham Solitaire pawh tlawh a ni.

Industry lian tak takte hian natural gas chu an hman ṭangkai takzet thu FCSCA Minister leh a team-te hi an lo hrilh a ni. Mizoramah hman theih a nih ve hun chuan chhungkaw tam tak bakah industry tam takin an chhawr ṭangkai viauin ka ring a, industry din thar tumte tan hlei hlei a ṭangkai ang. Tuna gas bur kan hman mek ngaihtuahin a senso a sang lo. A chak ṭhain, bun fel tawh chuan a awlsam hle.

FCS&CA Minister leh a team-te hian hnathawktu Indradhanush Gas Grid Limited (IGCL) leh Tripura Natural Gas Corporation Limited (TNGCL) te chu zawhna an zawt chikin, Mizoram tlangram a nih avanga harsatna awm thei turte, a him tawk leh tawk loh turte leh thil dang eng emaw zat an zawt a, anni lamin an lo hrilhfiah zel a, rawtna leh duhdan an neihte pawh an thlen. FCSCA Minister leh a team-te hian an zir uluk hle bawk a ni.

IGCL leh TNGCL-te hian an lo dawngsawng ṭha hle a. An rin aiin kan FCSCA Minister leh a team-te hi an taimain, zawhna an ngah ngeiin ka ring. Kan FCSCA Minister leh a team-te hian an zirchiannate hi an sawiho leh ngei ang a, chu chuan Mizoram tan rah ṭha a chhuah ngei ang. Zinna senso lah TNGCL lam tum a lo ni nen. Mizoram sorkar sum tlang ti hek loin, Zoram tan hlawk takin an feh chhuak ngei dawn niin a lang.

Mizoram tan a ṭangkai dawn em avangin FCSCA Minister leh a team-te hian hnathawktute hi hmanhmawh taka hnathawk turin an nawr nasa hle a, Mizoram lama harsatna an neih chuan theihtawpa ṭanpui an inhuam thu an hrilh. Minister team-te inpekna leh ṭhahnemngaihna hian hnathawktu lam pawh hi a tilawm takzetin ka hria a, rah ṭha a chhuah ngei ka beisei. A hlawhtlin hun chuan Mizoram tan mellung pawimawh a ni dawn.

A tir lama ziah awm tak, thlen zanah Agartala-a Mizo chhungkua natural gas hmang ṭangkaitu pawh tlawh an ni a, anni chuan an fak takzet. Ren miah loa an hman pawhin thla khatah Rs. 1,000 vel bak an chawi ngai loh thu FCSCA Minister hi an lo hrilh. Gas bur ngaihtuah a ngai lo a, awlsam takin an herh chhuak mai ṭhin. Kawng chhia avanga gas harsatna thleng pumpelhna atan pawh a ṭangkai dawn hle.

Gas Pipeline hi Panisagar Terminal, Tripura aṭanga inṭan niin Sihhmui, Mizoramah receiving terminal bun a ni dawn. Panisagar leh Sihhmui inkar pipe thui zawng hi kms. 119.5 niin pipe diameter hi feet 1 a ni a, leimin leh shock laka him tur pipe hman niin, pipeline hian Kanhmun, Zawlnuam, Kawrthah, Tuidam, Darlak, Mamit leh Lengte te a paltlang dawn.

Panisagar–Sihhmui inkara pipe phum hna hi IGCL-ten thawkin, Sihhmui Terminal aṭanga Aizawl khawpui chhunga gas sem darh leh enkawl zui hna chu TTNGCL-ten an chang ve thung dawn a ni. Aizawl khawpui bakah hian Mizoram hmun hrang hrangah a tahtawla la sem darh zel tura ruahman a ni. Tripura–Mizoram Gas Pipeline Project hi North East Natural Gas Pipeline Grid hnuaia mi niin, December, 2027 velah thawh zawh hman beisei a ni a, tun dinhmunah 45% vel thawh zawh tawh a nih thu IGCL hotute chuan an sawi a ni.

TTNGCL-te hian IGCL-te hnathawh zawhah hna ṭan chauh an tum. Hei hi FCSCA Minister chuan ṭha ti loin, a theih ang anga lo inhmakhua turin TTNGCL hotute a hrilh. TTNGCL lam pawhin receiving terminal bun fel a nih hmain pawhin theih ang anga bul an lo ṭan dawn thu FCSCA Minister hnenah hian an sawi a, hna pawh ṭan vat an tum.

- Malsawmdawngzela Hrahsel