Director inpuanna kha - Minister sum ṭhâm chîng a kham

Department lian taka Director pakhat chuan tun hma lamah Minister ṭhenkhatin department aṭanga pawisa dil ching an awm thu leh, ziah fel harsa tak a awm ṭhin thu a sawi a, department tan harsatna a thlen ṭhin thu a sawi pawp mai.

Director hian chiang takin tun hma sorkarah khan sum ṭham ching an awm a ti dawt lo a, a sawi danah erawh fiah tak a ni. Minister zinga sorlar/department sum ṭhâm ṭhin avanga department-in harsatna a tawh ṭhin thu te, minister hnena depatrment sum an pek ṭhin chu dâwt hmanga ziah fel a ngaih avangin hrehawm a tih thu a sawi bawk.

Congress sorkar lai khan CM Pu Lal Thanhawla khan minister zingah an enkawl department pawisa dil ching an awm thu a sawi a, ching tawh lo turin a hriattir nghal nghe nghe a. Pu Hawla kha mi dik tak a ni tih a lang reng mai a, sorkar sum kha holam mai maia hman a duh ngai lo a, a fakawm ngawt mai. Tun thleng pawhin a zahawm phah hle nghe nghe a ni.

Congress leh MNF party ten term eng emaw zat sorkarna an chelh lai khan Minister hautak zet an awm a nih hmel a. Director zahawm takin a sawi hmangah tun ZPM sorkarah Minister a hrawn zingah department sum ṭhâm ching an awm lo nia sawiin, chu chu lawmawm a tih thu a sawi chhuak a ni.

He officer hian hemi a sawi chhuah takah chuan a zahawm phah hlein a lang a, eirukna lamah pawh a fihlim viau a rinawm nghe nghe a ni. Function neihah mi tam tak hmaah hetiang sawi ngam officer hi a thawhpuite'n an hre chiang ngei ang a, hetiang sawi ngam khawpa a fair a nih chuan a lallukhum pawh a chah ngei ang le.

Minister chang an ni lo, officer ṭhenkhat an department pawisa ṭhâm deuh ṭawk ṭawk pawh sawi tur an awm ṭhin. Chungho sûlhnu chu an hnuaia officer-te'n harsatna an tawk nasa ṭhin hle. Heng hi corruption lian tak a ni. An hlawh phu loa officer ni mek leh pension tawhte in leh lo baka hausa em em mai hi mipui hian kan chhui ve zel a, kan en dan pawh a dang hle tih lo hre mawlh teh se.

- Lalkhirhvela