Lal pian hun pangpar

“Lal pian hun pangpar a vul leh ta

Thinlai muhnu lunglen a kai tho e”

Kristiante tana hun hlu leh thlakhlelhawm, ram hla tak aṭang pawha mahni chhungte leh mahni khaw lam pana kan tlan hawna
ṭhal tui ang kan nghah Lal piancham Krismas chu kan thleng hnai leh ta reng mai.

Tlang tin mual tin han hawi ila, Lal pian hun hriatrengna tlangsam par leh tlaizawng parte an vul ṭan leh ta, thinlai mu hnu lunglen an kaitho leh ta. He hunpui hmang ve hman lova mual liam tate ngaih a zualin he hunpui hmang leh theia kan dam chu a ropuiin a va lawmawm em!

Kum khat chhunga kan hun hman dante han thlir let ta ila, inchhirna tur thilte kan lo ti palh em? Mite tan kan nung em? Mi tana mi hnawksak nge kan nih mi ṭangkai? Tlangsam par leh tlaizawng parte chuan mi an tihlimin lung an tileng a, hmuh hlan kan nghakhlel ṭhin ang hian mi kan tihlimin kan ti lawm ve em? Mi hian hmuh hlan min nghakhlel ve ṭhin em tihte i inchhut ang.

Hringnun a har-satna hrang hrang a lo thlen chang hian Lalpa ringtu kan nihna te hi a lang chhuak ṭhin em le? Tlangsam par leh tlaizawng par te chuan thlasik khaw vawt vur karah pawh an par an ṭhulh chuang lo angin harsatna karah pawh kan par chhuak ve thei lawm ni?

A fapa mal neih chhun pawh ui loa min petu Lalpa chu eng nge ka pek ve ang? He hunpui lo thleng tur kan hmuah dan hi han en ta ila, mahni duhzawng chauh tih nan em ni kan hman? Kan in te, khawlaite nalh thei ang berin kan cheiin thawmhnaw ṭha ṭha lei nan em ni kan hman? Harsat vang te, sual bawiha tang te, lusun khawharte tan eng nge kan tih theih? Khaw chhak mifingte pawn rimtui chawiin an lo kala an ro bawmte hawngin Lal chibai an buk asin.

“Isu, vawiinah hian kan thinlung bawng inah, lo piangthar leh la nang kan chatuan Lal turin, kan kut riang hi i chun Mari kut chan tir la, chatuanin kan lawmin kan hlim kumkhua tawh ang,” tiin kan kutte hian khawi thleng nge a ban phak? Mirethei chanhai, fahrah riang-vaite a thleng phak em? Heng mi te ber chunga in tih hi ka chunga ti in ni, asin titu kha kan hmuah Lal Isua ngei hi ani asin.

Kum thar lo thleng turte hi engtia hmuah nge kan tum le? Lalpa malsawm tlaka nun hmana nun tam nei turin in tuaithar ila. Kan nghah kumthar lawmawm 2017 chu kan tan malsawmna kum ni turin ṭan ila ang u hmiang. Thinlung a lamah hawn ila ro thil dang a ngai tawh lo e.

- Cheri Bawithang