Edenthar kawng bal a rei leh ta
October ni 10 zing-ah khan Mizoram châk lâkna kawngpui ber, National Highway 54 kawng chhuat chu Edenthar leh Chaltlang inrina, Edenthar huam chhungah nasa takin a bal a, motor të chi chauh lo chu he kawngah hian a kal theih loh. Vawiinah hian ni 50 a tling tawh a, chuti chung chuan siam zawh a la nih loh avangin Nilaini tûkah pawh khan Aizawl Hunthar venga Fire & Emergency Department peng bulah Truck ke 12 nei chi chesualin a hnunga 709 Truck ding lai a hnawl a, mi pakhat a hliam tih kan lo hre leh ta a ni.
He kawng bal hi a siamtuten kum thar January thlaa siam zawh hman an tum thu an sawi niin kan lo hria a, he kawngpui chhe lai hêl, motor lian, Hunthar veng lama tlan chho-te an chesual fo nia sawi a ni a, a chimna lei chhuat aṭanga dàwl chhohna tur siam mek a ni, an la ti ta cheu a, he hna, cheng nuai 80 man hi ni tin mi 10 velin an thawk niin contractor chuan a sawi.
Keini ang, engmah hre thiam ve vak lo chuan, a va mak chen chen ṭhin ve aw, kan ti lo thei lo. Mizoram châk lâkna kawngpui ber, National Highway 54 kawng chhuat a bal a, thui tehchiam pawhin a lang lova, thla thum vel chhung pawhin kan siam zo leh hlei thei dawn lo niin a lang a, kan life-line kan buaipui dan hi a nêp lutuk a ni lo maw, tih hi kan zawt lo thei lo a ni. Hetih chhung hian kawng chho ulh takah motor lian, ke 12 neite a kal a, vai driver, hetiang kawng chho ulha motor lian fahran mai khalh ngai loten an khalh a, speed lak dan tur leh a hlauhawm theih dante hre chiang lovin an zawh lo thei si lova, mangkhawng a ni reng mai a ni.
Lengpui ṭumhmun kawnga nikum De-cember ni 2-a Tlawng lei chim lah kha thla 7 hnu, kumin June ni 24 khan kan hmang ṭan leh thei chauh a, engkim mai hi muang dap zel hian kan thawk dawn em ni le?
Keini laisen lung-mawl lo thlir ve danah chuan, khatia kawng chhuat a bal khan thuneitute chuan 'war footing' an tih ang chi hian chhun zan zawm takmeuhin an bei nghal ang a, lung rem tur pawh truck tam takin a phur khawm ruih ruih ang a, thawktu pawh mi za rual an vir suau suau tur ni-ah kan ngai a, zanah eng chhiin, chhuna thawk chi leh zana thawk chite an awm ang a, he kawng chat hi zawm fel leh thuai turin an bei tur emaw kan ti a ni.
Hotu lu ber berten an tlawh deuh reng ang a, thawktute pawh muang thei miah lovin an siam dawn emaw kan lo ti a. Mipui har-satna su kiang thuai tur leh, ni tin mamawh lâk luhna lamlian chat hi a rang thei ang bera siam ṭha turin, mutmu pawh tuah mang lova vir buai nghal tura kan beisei hi, beisei loh tur beisei em ni kan nih le?
Mi 10 vel chauhin hetiang hna pawimawh an thawk tih te hi a mak a, mimal in sa pawhin 20/30 an ruai a nih chuan, ram mipui châkkhai, ni tina phurh luhna kawng siamnaah chuan za aiin an tlem tur em ni dawn? PWD danah hian muan deuh hi hna a ṭha duh tih emaw, lungrem chu muang deuha thawhin a nghet tih lamte hi a lo awm em, tih lah kan hre ve si lo.
- RK Lianzuala