I duh vanga piang i ni lo

Mizo hranglui zaithiam em em C. Vansanga hla sak pakhat, ‘Kan damchhan’ tih Lalduhzuala phuahah khan heti hian kan hmu a:

Aw, eng an nge maw khuanu hian,

Hringnun hi a lo duan le?

Thâmral leh mai tur hian em ni le,

Duh vang rengin kan piang si lo.

Chhuan (generation) a lo inthlak a, kum 2000 hnu lama piangte chuan Sap kan tihte aiin kan anpui Korean kan ngaisang zawk tawh a, kan duh zawng leh nih kan châk zawngte pawh a inang lo ta nuai a nih hi. Mahni ram leh hnam zahpui a, hnam changkang leh hausa zawk aṭanga lo piang chak kan awm ta a nih pawhin kan demawm loh. A chhan chu kan pianna, kan nun bul ṭanna hi kan duhthlan a ni tlat lo a!

A thim saa pian

Chhungkaw rethei tak aṭanga han pian chhuah bik te, sáwn han nih nghal bik tawp te, piangsual leh rualbanlo tura han pian chhuah nghal bik tawp mai te hi – kan bul ṭanna aṭangin a hrehawm nghal ngawih ngawih bik mai a nih hi tir’u? Ngati nge Sapah ka lo pian loh? Ngati nge Korean ka lo nih loh? USA-ah piang ila chuan Sap ṭawng ka thiam sa nghal dawn a, American Idol aṭangin ka lâr chhuak thei asin le! London-ah lo piang ila chuan English Premier League-ah inkhelin Arsenal FC player pawimawh leh khawvel pum huap pawhin ka lar ve thei dawn asin le!

Ka nu leh pa an hmelchhiat avangin ka la hmelchhe zui a, ka piante a nalh loin ka va ti ṭêng ṭûng ve maw le? Ka lian lo a, police-ah pawh ka tling zo lo a, kan la rethei zui! Khawvel changkanna kan hre pha ve vek si a, IPhone ka awh teh lul nen IPhone chu sawi loh, alu leina tur êm pawh kan nei lo a nia! Ambani fa tal lo ni ila aw!

Awi! Ka mizia te hi ka duh lo, ka ṭawng thei bawk si. Nula ve si ka aw te hi a thûm mah mah a, ka tribal ngawih ngawih! Mipa thinchhe tak, rethei leh mi hmuhsit chhungkua aṭanga ka lo piang hi chu ka inchhir, ka lo piang ve hi ka tan chuan phurrit a va ni em! Vanduai tur rênga lo piang em ni ka nih bik?

Chutiang ringawta kan nunna neih ṭanna, kan lo pianna kan thlir a nih chuan lungawina reng reng a awm lo ang. Kan awh rûk leh nih kan châk, kan pianna tura kan duh leh neih kan duh ang zawng zawng nei vek khawpa piang vannei pawh ni ila, kan nunna hlutna kan hriat loh chuan kan lungawi ngai reng reng lo ang.

Pathian remruat

Jeremia 1:5 kan en chuan, “Pum chhûnga ka siam hma chein ka hria che a, chhûl ata i chhuah hma pawhin ka serh hrang tawh che…” tiin Zawlnei Jeremia kha Pathianin a hre sa tawh tih kan hmu a. Sam 139:4 kan chhiar chuan, “I hnenah lawmthu ka hrilh ang che; hlauhawm leh mak taka siam ka ni si a…” tih kan hmu bawk.

Mihringte hi Pathian anpuia siam kan nih thu Bible-ah kan hmu a (Gen 1:26), scientifically, biologically leh theologically-in i lo piang chhuak a. Chuvangin, Pathian anpui nihna neiin i lo piang. I mize ṭha lai leh ṭha lo lai te, i induhkawp lohna leh i inchhuan ruk ve deuhna lai te, engkim mai kha duh taka a neitu Pathianin amah anga a siam vek a ni a. Pathian nihna tam tak zinga a nihna pakhat nei i ni a, lo inzahpuiin lo insit tawh ngai suh.

Harsatna leh beidawnna thûk ber hmachhawn tura i lo piang a nih pawhin, a anpuia siamtu che leh a duhna taka dahtu che Pathian hian engtin nge hruai che a tum tih hi ngaichangin lo ring la; Pathianin nunna pe chea a piantir ve che avanga lawmthu sawi thei turin Pathian thuawihin lo nung tlat ang che.

Pathianin chhan neiin, duh taka a siam i ni a, i ta ni loin a ta ni tura piang i ni. Khawvela doctor thiam ber berte pawhin an pek theih loh Pathian a pek che nunna neitu i ni a; i hlutzia hre reng rawh.

- Rinfela Zadeng