Khawpui leh lirthei

Aizawl khawpui chhungah hian hna avangin lirthei hmangin ka chhuakvak tam ve viau a, ngaimawhawm leh mit tikham eng eng emaw ka hmu fo a, chungte ka'n sawi teh ang. Ka sawi turte hi mi dang pawhin an hmuh ve fo ang a, an ngaimawh ve ṭhin ka ring a, hnam dang khualzinte'n min tlawh tam ta bawk nen, ṭhahnemngaih a na riau mai. Mi tinin inenfiah nan hmang thei ila a ṭha ngawt ang.

Motor aṭanga bawlhhlawh paih:

Aizawl khawpuia kawngpui pênhleh deuh chu sawi loh, tlangdung kawngpuiah hian motor aṭanga kawngpuia bawlhhlawh paih chhuak mai mai hmuh an la tam hle. Private motor, taxi, maxicab leh city bus-te a ni vek mai. Motor chhung aṭanga bawlhhlawh paih chhuah hi a mawi lo tak zet a, a ṭhing em em bawk. Motor changkang tak tak kan neih rual hian kan rilru leh kan chet dante pawh kan tihchangkan tel ve a ngai.

Mi ṭhenkhat phei chuan motor chhung aṭangin kawngpuiah chil an chhâk ṭhin. Hei phei hi chu a ṭhing lehzual a, a ṭawp a, a tenawm bawk. Chil sen ngei nguai an han chhâk phei hi chu ṭhenkhat tan chuan uak tuar tuarna tham a ni. A nihna takah chuan mi hmuha 'Ka changkang lo hle' tih lantirna mai a ni. Motor chhung aṭangin khawpui chhung kawngpuiah bawlhhlawh chi hrang hrang, kuhva eina panhnah tereuhte thlengin i paih tawh lo teh ang u. Tifaitu kan ni vek thei lo, a tihnawktu tal chu i ni lo teh ang u.

Motor khalh chunga phone hman:

Motor khalh chunga mobile phone hmang hmuh tur an tam. Motor khalh chunga phone hman hi danin a khap a ni a, man theih leh pawisa chawitir theih a ni. Phone hmang chunga motor an khalh hian mi dang a tibuai loah an ngai ṭhin a ni mai thei. Mahse, rilru an pek loh phah ni ngeiin a lang, an khalh danah a hriat fo.

Chuvangin, motor khalh chung chuan phone hmang tawh lo ang u; pawimawh bik a awm a nih chuan kawng sirah din mai tur a ni. Chumi pawh a remchang mai lo a nih chuan remchang hmasa berah din a, call back mai tur a ni. Motor khalh chunga phone hmangte hi traffic police-te pawhin enliam mai mai lo se, man nghal mai an hreh a nih pawhin zilh ṭhin se, phone hmang lo turin hrilh ṭhin se a ṭha ang.

Car tape:

Tunlai hian khawpui chhungah ring tak taka car tape tiri ṭhin an awm. Khaw kar kawng, long run changa car tape han play hi a nuam a, zinkawng tinuamtu a ni a, ring tak tak pawhin play ila, a mawi lohna a awm lo. Khawpui chhungah erawh chuan car tape ring tak taka zaitir hi a hmânlai tawh, tunlaiah chuan a ṭhing tawh tih kan hriat a ṭha. Car tape kan play a nih pawhin, motor chhunga mite hriat theih tawk leka tih mai tur, pawn lama mite hriat tura play kher a ngai lo, bengchheng taka play phei chu tih loh tawp chi a ni e.

- Zodinsanga