Kum thar thutiam leh keimahnia a ṭha ber

Nula pakhat chuan kum thar tirh lama Facebook-a a thlalâk tarlan chungah chuan, 'I am ready to be the best version of my life' tih a hmang a. Chu chu a awmzia kan hre deuh vek anga, 'Ka nuna a ṭha ber ni tûrin ka inpeih e' a tihna a ni mai awm e. A va han ṭha tehreng êm! A tihhlawhtlin leh hlawhtlin loh chu thuhran ni se, a nuna a ṭha ber ni tûra a inbuatsaihna rilru hi a ropui hrim hrim a, kum thar thil tum atân chuan a ṭha thlawt a ni.

Kan nun emaw keimahnia a ṭha ber ni tûr emaw pe chhuak tih hi kawng hnihin a sawi theih awm e. Pakhatnaah chuan, keimahnia a ṭha ber ni tûr emaw pe chhuak tûr chuan a hma daih (kum eng emaw zât pawh a ni thei ang) aṭanga kawng hrang hranga kan lo inzira, kan lo inbuatsaih lâwk phawt a ṭul thei ang. Pahnihnaah chuan, keimahnia a ṭha ber awm sa hmang leh kan nihna ang anga kan hmabâka chanvo leh mawhphurhnate a ṭha thei ang bera hlen chhuak tûra inpêkna tiin a sawi theih bawk ang.

Eng pawh chu ni se, kum tharah hian thutiam leh tum hrang hrangte neiin hmachhawp kan nei ṭhin a. Chumi tûr chuan rilru pawh kan siam ṭhin a ni. Amaherawhchu, chu'ng kan thil tum leh thutiam te tihlawhtling tûr erawh chuan rilrua tumna mai a tâwk lo a, a taka kan chêt chhuah a, hma kan lâk a ngâi ṭhin a ni.

Chutih rual chuan, chu'ng kan thil tum leh ruahmanna siamte tihhlawhtlin chu a harsat châng a awm fo ṭhin. Hlain, "Thlarau zawngin peih mah se, tisa erawh a chak si lo," a lo tih ang deuh khan a taka chet chhuah erawh a harsain, thatchhiatna leh dawngdahnaten min tibuai fo a, kan rilrua kan tumna leh ruahmannate chu a thamralin, eng mah loah a chang leh mai ṭhin.

Nimahsela, kan hringnun zin kawnga hlawhtlin kan duh a, kan thil tum leh ruahmannate tihpuitlin kan duh tak zet a nih si chuan, taimak kan chhuah a, kan beih hram hram a, hma lam pana ke pen tûra kan chet chhuah a ṭul si ṭhin a ni.

I nuna a ṭha ber ni tûrin i inpeih ve tawh em?

- R. Malsawmzuala