Khai le! An lei leh dawn e! (Sawhthing, Aieng, Hmarchatê, Hmunphiah & Buhhûm)

District Agriculture Marketing Committee (DAMC) te hi district tinah an awm tawh a; Aizawl, Champhai, Hnahthial, Khawzawl, Kolasib, Lawngtlai, Lunglei, Mamit, Saitual, Siaha leh Serchhip te hian DAMC hi Bawrhsap kaihhruaiin an nei hlawm a ni.

DAMC ṭheuhte hian ṭan an la hle a, February ni 2, 2026 aṭanga khing thlai chi 5 te khi hralh leh lei buaipui turin an inpuahchah a ni. Kut hnathawktute tân kâwl a êng mêk a, sorkar hmasa lama kumtira buaipui ngái loh, a thawm pawh kan hriat ngài loh chu District tin Bawrhsap te buaipui a ni ta!

January ni 22, 2026 mai khan Mizoram Angricultural Marketing Board (MAMB) chuan Aizawl Press Club-ah press mite an kawm a. MAMB Co-Chairman Dr. KC Lalmalsawmzauva leh member ten thlai thar hralh dan tura hriat tur pawimawh an puang ta bawk.

Sawhthing

Hetianga a ram pumin sawhthing hralh leh lei chanchin kan ngaihven luih luih hi; Pu Lalduhoma kahhruai ZPM sorkarna siam hnuah chauh a ni a tih theih ang. Kumina kalpui dàn tur hi tlêm en lawk ang.

(a) Secondary Collection Centre (SCC):

SCC hi Mizoramah hmun 64-ah siam a ni a, hetah hian sorkar hnathawk Supervisor leh Assistant Supervisor ruat ṭheuh an ni.

Sawhthing chîngtuten an 'area' huamtu SCC-ah an sawhthing hralh tur chu a fai thei ang berin hralh turin an thlen ang. Sawhthing leitu tur, mimal emaw, pawl/company emaw ten SCC aṭang hian sawhthing hi an lei ang. An hralh dawn chiaha an bûka a rihna kha pawm a ni chauh ang. Sawhthing Society-a inziaklût te chauhin SCC kaltlangin an hralh ang a, 'support price' pawh anni chauhte hian an dawng thei ang. Supervisor/Asst. Supervisor 'signature' awm ngêia hralh tur a ni.

(b) Sorkar lam tih tur:

Sorkar chuan a hralhtu leh a leitu inkara siamremtu/awlsamna siamtu '(facilitator)' hna a thawk ang. A leitu tur pawh a buaipui tel ang a, felfai leh dik taka hralh leh lei kalpui theihna atan ruahmanna siam a ni.

'Society' lama inziaklûtte hian bank account an nei vek tur a ni a, 'support price' inpêk a ngaih chuan mimal bank account-ah Society member SCC kaltlanga hralhte hnenah pêk an ni ang. Hei hian 'langtlang sorkar' a nihna a pholang ang.

(c) Fimkhur ngai:

Kum hmasa lamah sorkar aṭanga 'support price' hmuh in beiseiin mi ṭhenkhatin sawhthing man tlawmin an lo lei khawl vak a ni awm e! A mak zozai hlê a ni.

Ṭhenkhatin Myanmar aṭangin an lalût tih te a awm. Ṭhenkhatin "sorkarin ₹ 50 a tlinna turin 'support price' a pe dawn tho cheu a, a tlâwmin kan lo khar ang," ti tâwkte tunah pawh hian an awm a ni awm e.

Hetiang thilah hian khaw tina VC, YMA, Society te leh mi tinte fimkhur turin MAMB chuan an chah a ni. Thil diklo titute sorkarin an chhui zêl a, kum hmasa lama ti diklotute pawhin an tuar a, police te pawh rawih an ni. Kuminah pawh a ti diklo chu hrem an ni dawn a, Society member aṭang pawhin paih an ni ang.

(d) Sawhthing rate:

'Rate' hi a la hriat loh a, a che reng a ni. Heti chung hian sorkar chuan a lo intiam tawh angin kilogram 1 ₹ 50 aia tlêm lova hralh turin 'floor price' atan a ruat a ni. Loh theih lohna avanga ₹ 50 aia hniama 'rate' a tlâkhniama hralh a har chuan a aia a hniamna zawng hi sorkarin a chîngtu/hralhtu hnênah 'support price' a pe dawn a ni. Kar hmasa khan MAMB te chuan sawhthing 'rate' hi kilogram 1 ₹ 54 te a kai tih an sawi a, hei vang hian an la nghâk rih a ni.

MAMB member te hian kum hmasa lamah a leitu turah an phâng deuh tih an sawi a, mahse Mizoram sawhthing chu 'organic' a nih avang leh a ṭhat bîk êm avangin a lâr tawh a, kuminah chuan a leitu tur an ṭhahnem hle tih an sawi. Kan hmingṭhat zêl nan SCC lama a hralhtu tur te sawhthing chhinchhiah a ni vek dawn. 'Tag' an târ ang a, ration card, address kimchang leh phone number an tarsak zêl ang. Sawhthing 'support price' hi May ni 30, 2026 thleng pêk a ni ang.

(e) Gulf company an lo lang:

MAMB chuan Gulf ram aṭanga Mizoram sawhthing lei tur company pakhat nen an indawr tawh tih an sawi a. 'Retail' a hralh tur quintal 2,000 leh sawngbawl tur quintal 10,000 lei turin MAMB leh Gulf ram company pakhat hian inremna (MoU) an ziak tawh a ni. 'Rate' erawh a che reng a, a 'rate' hi an la dahkhat duh rih lo thung.

'Rate' a chêt reng avangin Company dangte pawh MAMB hian 'MoU' a la ziahpui duh ta rih lo a ni.

Nikum khan sawhthing quintal 3,38,351.82 sorkarin a lei a, a man atan cheng vaibelchhe 137.72 sèn a ni. Cheng vaibelchhe 137.72 zet chu sawhthing chingtute kutah a lût a nih chu.

Thlai dang–Aieng, Hmarchatê, Hmunphiah & Buhhûm

Aieng hring hi chu a leitu tur pawl pasarih ruat an ni tawh a, anni hian kilogram 1 ₹ 20 aia hniam lovin an lei ang. 'Support price' hi March 2026 thleng pêk a ni ang.

Hmarchate ro bîka hi 'rate' a ṭha hle a, sorkarin 'rate' a bituk chu kilogram 1 ₹ 350 aia hniam lova hralh tur a ni a. A hralhnaah buaina a awm lutuk ngai lo. 'Support price' hi March 2026 thleng pêk a ni ang.

Hmunphiah bika hi chu 'grade' thliar tawh lovin kilogram 1 ₹ 80-in sorkarin a lei thung dawn a ni. 'Support price' pêk ngaihnaah March 2026 thleng bawk pêk a ni ang.

Buh-hum hi chu nikum November thla aṭang khan sorkarin a lei tawh a, kilogram 1 ₹ 30 aia hniam lova leiin kumin January thla thleng lei a ni ang.

Tlipna

Sorkarin heti taka a lo intiam tawh ang ngêia kut hnathawktute/loneitute tâna tha a thawh leh a inphal hi a lawmawm tak zet a ni. Heti hi chuan sum chang thlai enin thingtlang pa pawhin hna a thawk thei ta a, hmasawnna chu a zuanin zuang lo mah se, MUHCS ṭha tak nen Mizoram chu 'second gear'-ah insawn chhovin hma lam panin kan kal rual ta ṭhap ṭhap a ni.

~ Zoa Tlau, Buannel Cabin