HALPUAH LEH ZOFATE
Kum 2009 September ni 26 chhuak ‘The Aizawl Post,’ ni tin Chanchinbu-ah Rairahtea, Hmunkhawhar-in ‘Thinlungin Bethlehem lam’ tih thupui hmangin a rawn ziak a. Kan Lal Isua pianna hmun Bethlehem lam a rawn hrut dawn emaw ka lo ti a. Mahse Aizawl Bethlehem veng lamah min luhpui ta zawk a -
“Pathianin rem a tih chuan kumthar 2010 chu kan chuangkai leh turah ngai ila. Kei chu ka rilru leh thinlung hian Bethlehem lam ka thlir leh tawh a. Chutia ka tih chuan Judai ram Bethlehem lam thlir turah min ngai mai thei, a teuh lo mai... ka thinlunga ka thlir chu Aizawl khawpui chhunga Bethlehem saw a ni zawk. A chhan chu mi hrisel lo leh mi bawrhsawn, lung ṭha lo leh chuap natna (asthma) vei ka nih vang a ni.
Kum tin mai hian kan hunpui Krismas leh Kumthar a lo thlen tawh chuan halpuah, halzit leh bomb chi hrang hrang a puak dum dum a, lo inrin lawk sen rual a ni lo; kan phu zawk zawk a, lungphu a rang tial tial a, a inthum rawn tluk tluk a, thlasik khaw vawh lai e ti lovin thlan tuiin min bual a. A khu rimchhe em em mai chuan boruak thianghlim a rawn luahlan a. Khati ang hun ṭihbaiawm leh rapthlak tak kha a lo thleng leh dawn a ni tia ka ngaihtuah chang hian Zawlkhawpui chhuah lam panga Bethlehem veng leh chhim lam kawtchhuah Kulikawn vengte chu thinlungah an lo lang leh a. Heng veng hnihahte hian halpuah leh bomb ri bengchheng hriat tur a awm lo. Veng dangte pawhin entawn thei ila a va ṭha em!” tiin kan u Rairahtea (V.L. Rema) chuan Krismas leh Kumthar vuakveta halpuah leh bomb ri bengchheng a nin thu min hrilh a.
Mahse, kan u Rairahtea chuan nat lawk pawh awm mang lovin a thawhah a chhuak thut a, 15.12.2009 zan dar 8:10-ah he lei a khualzinna ram ata halpuah leh ri bengchheng awm tawh lohnaah min hawnsan ta nghe nghe a.
Engtik lai aṭang khan nge phai vai leh hnamdang chin dan kan lak a, halpuah leh bomb nen bengchheng taka Krismas leh Kumthar kan lawm ṭhin tih hriat a har tawh a. (Hre chiang tak pawh kan lo awm mai thei). Kan ziaktu ropui hmasa Kaphleia (fam) TB natna vei avanga Durtlang Damdawi In sira Inte-a (Inte thawveng an tih mai ṭhin)-a a ṭhianpa Biakliana nen an awm laia a diary-ah chuan tihian a ziak a, “... tlaiah Sawma a lo kal a, vawksa kan chhum, zan dar 12-ah Aijal-ah te, Chaltlangah te, Durtlangah te halpuah an hal, Durtlang Biak Inah an inkhawm,” tiin a ziak a (1939 December 31, Kaphleia Diary)
Kum 1939 daih tawh khan kan Zawlkhawpui veng ṭhekhatah chuan halpuah ri hriat tur a lo awm tawh a. Chhim lama kan hranghlui leh hla phuah thiam tak Rokunga Khiangte (fam) pawhin Rairahtea ang bawkin halpuah ri bengchheng a ninzia chu hlain a lo auchhuahpui ṭhin a. Kum 1990 Krismas dawn hnaih chuan Bawrhsapin halpuah khapna thupek a chhuah a, Rokunga Khiangte pawh a lawm hman hle a, 21.12.1990 zan chuan halpuah ri pawh a reh duak mai a.
“Leitlangpui VC aurawl chuan,
Lal Bawrhsp ro pui rel a puang e;
Awmlai vei riang hluan lungmuanna” tiin a chham hman a. Mahse 22.12.1990 khua a lo var chuan Bawrhsap thupek pawhin awmzia a nei chuang ta lo va, a ri leh ta ulh ulh mai a. Rokunga Khiangte lawmna chu a reh leh zo ta a;
“Awmlai veite lung a lawm thlawn e,
Ei sen loh sum an chhem ri ṭan leh ta;
Tuirini zawng ianga chimawm-te’n,” tiin lungchhe takin a au chhuak leh ta a. Rokunga Khiangte pawh Krismas leh Kumthar vuakvetah chuan halpuah ri hriat phak lohna Lungpher Farm leh Nghasih leilet thlamah te a tlanchhe
ṭhin a, (amah phei chuan ‘ka raltlan ṭhin a ti mai a”). Mahse ani pawh 10.10.2006 khan van kohna chhangin min liamsan ve ta a.
Mizote hi thil intihhmuh ching kan ni a, kan han tih vek chuan kan uar leh chiam ṭhin a. Halpuah chungchangah pawh kum 2008-a Congress a sorkar
aṭang khan Krismas leh Kumthar vuakveta halpuah hal tawh loh tur thupek a han chhuah a, a vawi khatnaah chuan reh duak lo mah se kum tin an khap zui zel a, tunah chuan halpuah leh bomb ri hriat tur a awm meuh ta lo va, mipuite pawhin thu awi takin zawm chho zel ila a va han lawmawm dawn em!
- K. Krawsthanga, Zobawm Run