Thilpek puanzar kher ṭhin hi
Mizote hi thil-thlawnpek pek lamah kan intihhmuh chho viau mai a, hei hi thil lawmawm tak a nih avangin intihhmuh deuh deuh ila a duhawm hle. Rilru chhungril tak aṭanga chapona leh intihveina tel miah loa thilthlawnpek dik tak kan pek hian a dawngtu lam hian an phu reng em tih lam hi kan tehna lian ber tur niin a lang lo.
Chu ai chuan kan pe phala rilru tluangtlam tak nena kan pe a nih rau rau chuan kan tehna tur pawimawh ber chu pek an phu vang ni loin ṭanpui an ngaih vangin kan pui zawk tur a ni. Eng thil pawh ti dawn la midang i teh chhung chuan tumah i teh tling dawn si lo a!
Tunah pawh kan nghahhlelh Mizote hunpui Krismas leh kumthar a lo hnai leh ta- mimal, ṭhianho, pawl leh kohhrante thlengin khawsak harsa zawkte hnenah thilpek kan pe leh chuah chuah ngei ang. Ṭhenkhat chuan a pawisa ni lo ei tur emaw present emaw buhfai ang zawng te pawhin an pe leh ang.
Mamawhtute tana thilpek pek hi a ropuiin a hlu a, tlachhamte leh hnuchham te tan mitin hian tih theih tawk kan nei ṭheuh a, chutiang chuan kan malsawmna dawn hi mahnia ei zo mai loin midangte tan tlemte ṭheuh tal chu luang chhuak ang u.
Amaherawhchu, thil pek pe tura kan in fuih uar viau laia ka sawi duh chu, tlachham leh ṭanpui ngaite tana kan thilthlawnpekte hi tlang hriata pholan kher erawh i tum vek tawh lo ang u. Ṭhenkhat phei chu an thil ṭha tih puanzar loh hlauh vangin a puangzartu turte hman hun an han nghak khawtlai a, chutah news reporter te nen rip takin an thawk chhuak a, khawtlang hriatin thil ṭha chu an va ti ta ṭhin a ni.
Hetianga ropui taka thil ṭha tih hi a sual e ka tihna a ni hauh lo. Mahse Krista zuitu kan nih anga ka chah duh che u chu veng tawntirh lama kan thil ṭha tih hi veng mawng lam hnena hrilh hriat kher kan ching hi ka ngaimawh mai a ni. A chhan chu chapona rilru a awm hian mual-phona a lo awm ṭhin tlat a ni. Chuvangin, chapona leh lar duhna tel lo hian thil ṭha hi keimahniin ti mai ila, van malsawmna pawh dik takin kan dawng let thei zawk ngeiin ka ring a ni.
Lal Isua pawhin amah zuitute hnena a chah ṭhin chu kawt thlera ṭawngṭai tur ni loin pindanah ṭawngṭai turin a ti tlat. Thil ṭha kan ti dawn a nih pawhin mi zawng zawng hriatah tih kher a ngai lem lo a, rilru inphah hniam takin kan duhna zawnah mite mamawh nia kan hriat chu tlang thantir kher loin kan ti mai tur a ni.
Thisen petute leh an pek zat kan puangzar ṭhin hi chu midang cho phur (encourage) nan pawh a ṭha a, ti zel ila.
Tuna kan kalphung-ah chuan kan Samari mi ṭhate hi hlawh neia sorkar mi rawih Police leh Excise-te ang chauh kan la ni. Mirethei in kan sak sak pawhin media-ah tihchhuah kher kan tum a, chutiang bawkin tute pawhin ṭanpuina pe se chanchinbu leh cable TV-a puan hluai loh chuan kan lungawi meuh hlawm lo a nih hmel. Kan thil ṭha tih ve te hi ngaihtuah chian chuan chapona lantirna lam te pawh a kawk dawn dawn e.
- Vohbika Pa