Thianghlimna leh Mizote

Bible a Thuthlung­hlui huna kan hmuh dan chuan Pathian chuan a hnam thlan Israel-te chu an taksa a lo hrisel a, an dam rei theihna turin nun dan tur leh ei leh in tur engkim a ruahman sak a. 

Doctor-te doctor kan Pathian hian a mihring siamte taksa zungzam engkim mai hi a hre chiang a, kan taksa ngeih tur leh ngeih loh tur, kan damreina tur thlengin a hre vek a ni. Dam hi hrisel chuan a hlu a, a man a to a, hrisel loh erawh chuan damchhan hi a tlem riau hian kan hre ṭhin. Mahse kan tana kan hriat chian em em pawh hi kan zawm duh chuang ṭhin lo. 

Thuthlungthar hunah chuan engkim ei leh in a thiang kan ti a. Kan in a, kan zu a, kan hmuam bawk a ni ber. Kaa lutin thil a tisual lo te kan ti - a pawimawh ber chu kan taksa tan a ṭha em? tih lam hi ni. Mizote hian zuk leh hmuam kan ti nasa a. Kan thihna tur min hnaih tirtu, taksa hrisel lohna leh damrei lohna lam min pan tirtu atana nitin a ram pum huapa zuk leh hmuama cheng nuai tel han sen ngawt hi a pawi ngawt mai. 

Vawikhat chu kan awmna khaw pakhata pitar damrei deuh hi kan tlawh a, kum 120 ka ni tawh a ti mai a. Ṭhuthleng hniama a ṭhut hian a khup hian a lu a pel tawh a, kum 100 chuang chu a ni ngei ang. Biak rin a ngai tawh viau a, amah chuan “Nun hi ka ning tawh em mai, nitin Pathian hnenah thih ka dil ṭhin a ni” a ti. A nihna takah chuan he khawvelah hian rei tak dam a, taksa hrisel taka he khawvel hi hmang zo turin min duh asin. Mahse, kan khawvel boruak chhiat vang leh changkanna hian kan nun a titawi ta a ni ber zawk. Pitar/ putar rei tak dam tawh, thih hreh tak hi kan hre vak lo maithei a ni. 

Zuk leh hmuam leh ruihtheih thil ti lo chung pawh hian kan taksa hi dim a ngai a, thisen kalsual palh leh eng emaw hleka boral thut thei kan ni. Chutih laia, kan taksa in a huat em em, engtik lai mai pawha kan taksa huat zawng kan han vawm khawm mawlh mawlh mai hi chu a siamtu Pathian tan pawh hmuh a hrehawm awm mang e. In pawh kan sa a, huante kan siam a, duat taka kan thil siam, kan sakte tichhetu a lo awm chuan kan rilru a na a, kan rum vawng vawng ṭhin. 

Pathianin duat taka a siam kan taksa, khawvel scientist ropui leh doctor thiam ber berte pawhin an hriat zawh sen loh, Setana meuh pawhin a thik em em khawpa ropui hi engatinge duat nachang kan hriat miah loh mai le? Zuk leh hmuam leh ruihhlote hi ti lo ta hlawm ila chu tunlaia kan ram ṭhalai tam tak tibuaitu, depression, suicide leh a dang kan buaina tam ber hi chu a tlem khawp ang. 

Mizo phei hi chuan kan thiltih lam hi kan ti nasa si a, miin dawr an neih chuan neih ve tum tlat, ṭhenawmpa in motor a neih chuan puk chawp pawha lei ve tum ran mai ṭhin kan ni. Kan in ṭam chhuah lo chauh hi a ni ber. 

A nihna takah chuan zu ngawl vei, ruihhlo tih bulṭanna hi Meizial zuk ruk aṭangin a nia a lo inṭan ṭhin. Zuk hmuam ti miah lo, zu ngawl vei, ruihhlo addict in hre tam lo ang. 

Kan rama he ti taka natna leh thihna tam hi a bul ber chu zuk leh hmuam leh ruihhlo kan tih vang a ni. Pathian thu hi thlarau ringawt ni lovin, taksa, rilru, thlarauva kan zawm dik a ngai e. 

- Reuben Lalnunthara Hnamte