Kuthnathawktute hmangaihtu party
Opposition party, a bikin MNF leh Congress party press release te, an hotute thusawi te, an worker tam takte thu sawi duh dan leh social media vela an thil sawi duh dan ka hmuh hian, Mizoram sawrkarin kut hnathawktute thlai thar tha taka a lei an hlau hle niin ka hria; tlat mai a! Chuti chung chuan ram hmangaihtu angin an inchhal ve chu a ni awm si a. Ka ngaihdan chuan, ram hmangaihtu ni loin, ram leh hnam tana mi hnawksak an ni zawk mahin ka hria.
ZPM Party kaihhruai sawrkar chuan an intiam angin thlai thlan bikte an han lei ta ngei a. Kum 2025 khan sawhthing leh hmunphiah an lei a, hmarcha leh aiengah erawh chuan sawrkar rate aia ṭha maha an hralh theih avangin sawrkar a inrawlh a ngai lo. Hetianga kut hnathawktute'n an thawhrim rah seng a, an thlai tharte ṭha taka an hralh hi a lawmawm em em a ni.
Chutihlai chuan opposition party mi leh sate chu sawrkarin thlai a lei a, kuthnathawktute'n an thawhrim rah hlawk zawka an seng chungchangah hian opposition party ho hi an lawm ve thei reng reng lo ni hian ka hmu a nih chu. Kuthnathawktute'n an thawhrim rah an seng te, an thawhrimna atanga hlawkna ṭha tak an hmute hi eptu pawlte hian an lawmpui ve thei lo a nih chuan, kuthnathawktute hmasawnna leh hamṭhatna tur sawi ve ngam tur an ni lo maw le.
Ka hriat ve phak chinah Congress sawrkarin NLUP hmangin sum an sem a, MNF sawrkarin SEDP hmangin sum an sem ve thung. Congress sawrkar kha chuan an intiam angin sum an sem ṭha fu mai a. MNF sawrkar erawh chuan cheng 3,00,000 sem an tiamah kum 5 chhung khan cheng 25,000 bak an sem lo a, mi tlem azawngah chuan cheng 50,000 chu an sem hman mahna. Cheng 50,000 hi lo sem hman ta tehreng pawh ni se, sem an tiam zat cheng 3,00,000 aṭang chuan 16.67% chauh a ni a, tlem tak a ni, tlem tak!
A thlawna sum fai sem hi lo hmang ṭangkai tawk leh eizawnna bul ṭanna atana ṭha taka hmang tawkte chu an awm ang, mahse, a tam zawk chuan eizawnna bul ṭanna atan an hmang lo niin ka hmu. Thawh chhuah ni lo, party-a awm chhuah hmanga sum hmuh hian mipui rilru a hruai khawlo a, Mizoram mipui tam zawk rilru an hruai sual a ni.
Opposition party-te'n sawrkar an sawiselna tam ber hi kuthnathawktute an hmangaih vang leh an duhsak vang a ni lo, an party hamṭhatna tur an zawnna a ni. Opposition-te u, inenfiah mawlh teh u. Party dang sawichhiat char char te, sawrkar sawichhiatna tur zawn ngar ngar te hi politics dik tak a ni lo a, politics-in a tum pawh a ni lo tih lo hria ula, politics in khel zel a, ram hruai in la tum ve a nih chuan kuthnathawktute tihhmasawn tak tak tumna lo nei ve tawh teh u khai.
- Lallianmawia