Mizo-Israel pêm turte hi

AIR chuan tun hnai khan Mizo-Israel, Bnei Menashe tia invuah (Bible-a Manasea thlah nia inngai) mi 300 te chu February thla chhûng hian Israel rama an pêm thlàk tur thu a sawi a. Hei hi thu thar a ni hran lo va, nikum November 25, 2025 khan Israel Prime Minister Benjamin Netanyahu chuan India rama Bnei Menashe Judate chu kum 2030 hmain Israel ramah hruai luh vek/pem tir vek an nih tur thu a lo sawi tawh a. He rawtna hi Israel Prime Minister Benjamin Netanyahu leh Immigration Minister Ofir Sofer-a te siam a ni a, Israel sawrkain a hriat danin Mizoram leh Manipur-ah hian Bnei Menahse member hi 6000 vel awmin an hria a, tichuan Israel sawrkarin an rawtna hi pawmin kum 2026 kum tâwp lamah Mizoram leh Manipur-a Bnei Menashe member mi 1,200 te Israel rama hruai thlak a, kum 2030 ah chuan a la bâng zawng mi 5,800 te chu hruai thlak kim vek turin ruahmanna a siam a. Hetianga khawvel ram hrang hranga an mi leh sa darh te hruai khawm lehna atan hian a buaipuina senso atan Israel sawrkarin shekel maktaduai 60 lai a ruahman nghe nghe a ni (Source: The Times of Israel, Online Edition, 23 Nov, 2025). Hetiang taka lian thama Israel hnam bo an rama hruai kir lehna hi a thleng tam lo viau awm e. Chumi bawhzuina kal zelah chuan tun February thla hian Mizorama Mizo-Israel (Bnei Menashe) inti te chu a thawh khatna atan Israel ramah an pêm thla dawn ta a ni.

Hemi buaipui tur hian nikum lam aṭang tawh khan Jewish Agency for Israel (Delhi) a mi te leh Israel Embassy aṭangin mi 35 velin ni 10 châmin Aizawlah interview te an rawn nei tawh a. A hmahruai atan Mizoram leh Manipur aṭangin mi 300 ve ve February thla hian pem thla turin an thlang chhuak ta a ni. Hêng tuna pêm thla turte hi Manashe-a thlah nia inngaite an ni a.

Mizo-Israel chungchang hi thil thar a ni lo va, tun hma aṭangin buapui a lo ni tawh ṭhin a, hemi kawng hma latu langsâr zingah Pi Zaithanchhungi te kha hriat hlawh pâwl an ni a, a dodaltu lamah Revd Dr. Chuauṭhuama (L) kha a thâwm nei ring pâwl a ni bawk a. Ani khan lehkhabuah te ziakin seminar leh chanchinbuah te ṭhahnemngai takin an thu kalpui a dik lohzia kha a tlangaupui ṭhin a. Inhnialna leh sawihona ngaih nawm tak tak pawh an lo nei tawh ṭhin a. Mipui nawlpuiin Mizote hi Israel thlah kan ni tih pawm lo ila, Israel hnam bo anga inngai pâwl hi an la awm reng a, Israel ramah khuan Israel hnam bo nia inchhal Mizo/Chin/Kuki te hi mi 5000 vel an khawsa mek bawk niin Jerusalem Post chuan a sawi.

He thil hi Kristianna tarmit aṭanga thlirin ngaihthah mai chi niin a lang lo. Kristian sakhua phatsana Juda sakhuaa inlehna a ni a. Chhandamtu Isua Krista hnâwlna a nih avangin Kohhran tan chuan ngaihthah mai chi niin a lang lo. Tun ṭuma Israel rama pêm tur an thlan naah pawh hian tehfung an neih chu: Mipa an nih chuan serh tan tawh an ni tur a ni tih te; Juda sakhuaa inlet tawh an ni tur a ni tih te; Juda sakhaw serh leh sâng an hriat thûk zawngte zawh vek an ni a. Israel an thlen thlak tirh aṭanga chhûta thla 6 nung Passport neih a ngaih bakah Kristian an lo la ni ru reng em tihte pawh chik taka zir chian a ni a. Mizo Juda nihnaa Israel rama lo pem tawh chhûngte chu duhsak bik an nih tur thu an sawi bawk a ni (source:AIRNewsAizawl). Kan Mizo pui unau mi 300 zet Kristianna kalsana Juda sakhuaa an inlet hian ngaihtuahna a ti thui a. An la pem zel dawn niawm tak a ni leh nghal a. Kan ramah Hindutva thlipui tleh kan hlau êm êm a, Hindu sakhuain min chim ral ang tih kan hlau a, kan insawi ṭhaih a, mahse Mizo heti zat a hlawma hindu sakhuaa inlet thâwm kan la hre lo. Chutih laia Kristian sakhua kalsana Isua Krista (Messia) nihna hnâwl a, Juda sakhuaa kan Mizo unaute an inlet a, Israel rama sakhaw dang (Judaism) vuan tura an pêm thla chanchin hian rilru a khawih a ni. Isua Krista chanchin ṭha hril ṭhinte zing aṭanga Isua Krista hnawl a, Juda sakhuaa inlet thawm hian kan rawngbawlna huang nghawr nghin sela a duhawm hle mai.

Engvangin nge Mizote hian Israel nih kan duh tih zawhna hi a chhânna sei fe a awm thei ang a. Hemi chhânna hi sakhuana leh economic zawngin a chhan theih ang. Mizote hi kan Kristianna ṭobul rengah Juda rilru puin kan Kristian a, Pathian hnam thlan bik nia kan ngaih avangin Israel ngaihsânna hi kan pianpui a, Israel a nih hrim hrim chuan kan ṭanin kan ngaisang êm êm ṭhin. An chhehvel hnam dangte nen an indo pawhin Israel chu ṭan turah kan inngai sa nghal a. Chak turah kan beisei nghal bawk a, chutiang chu Israel kan ngaih dan a ni a. He Israel ngaihsânna thlarau hian Israel hnam bo nih châkna, Pathian hnam thlan zinga tel ve châkna, chumi in a ken tel hamṭhatna dawn ve châkna a hring a. Chuvangin Israel hnam bo nih hi kan pawiti lo niin a lang. A hlawm lian pui dang lehah chuan Mizote hi kan rethei a, kan khawsak a harsa a, Israel ram chanchin kan hriat dan chuan ram changkang leh economy-ah pawh sâng tak, khawsak pawh nuam leh hahdam deuh zawk niin kan hria a, Mizo, rethei tak dinhmun aṭanga tuipuiral rama kan mi ngaihsan takte zinga khawsak a, an hausakna chenpui ve duhna in Mizo-Israel hi a hring chhuak a ni ve bawk. Hemi chungchang hi chu lehkhabu te pawh a chhuak nual tawh a. Sawi thui chiam lo ila.

Engvangin nge Israel hian khawvel hmun hrang hranga a hnam bo te hi hruai khawm a duh tih hi zawhna lian pui a awm a. Politics khawvel aṭangin thlir ta ila, kan hriat angin Israel ram khu ram lian lo tak, mihring pawh tam lo, mi 9,647,689 (as on 2026 Source: https://www.worldometers.info) chauh chênna a ni a. Hmelma in an hual a, lei do an nei reng bawk nen, mihring tam an mamawh a, an hmelmate laka inhumhimna turin sipai tha chakna an mamawh bawk a. Chuvangin a tam thei ang ber an ramah hian pêm lut se an pawi ti lo in a rinawm. Hei hi nikuma he 'hruai haw rûn pui' an tlangzarh ṭuma Israel Prime Minister Benjamin Netanyahu-a thusawi hian a nemnghet chiang hle kan ti thei ang. Netanyahu-a khan, "He thil hi thil ṭul leh pawimawh tak a ni a, Israel hmar lam leh Galili bial tih chak nan a ṭangkai dawn hle a ni" a ti. Chumi awmzia chu an ram leh hnam sawh ngheh nan leh tih chak nana ruahmanna a ni tih hai rual a ni lo. Israel ram ralmuan loh zia kan hria a, hetiang zawnga thlir chuan kan unau pêm thlate pawh hi dinhmun derthawng leh ralṭi takah an indah tihna a ni ve bawk a.

Heng kan unau, zo hnahthlak Israel hnam bo nia inchhala Israel rama pem thla tate hi tisa thilah chuan Mizoram aiin an nuamsa zawk a, an khawsak pawh a changkangin khawvel thilah chuan awhawm zawk dinhmunah an ding a, an lawmpuiawm hle. Chutih rualin Kristian sakhua phatsan a, Lal Isua Pathian nihna hnâwl a, Juda sakhuaa kir lehna a nih avang erawh hi chuan Kristian thlirna tarmit aṭang hian an kal kawng hi a dik tâwk lo deuh niin a lang. Kohhran pawh hian kan ngaih ven a, kan chanchin ṭha hril nena inmil a ni em tih kan chhût a, an hnena chanchin ṭha hril lam kan hawi te pawh hi thil ṭul tak a ni. Khawvel nawmsakna leh hamṭhatna uma Isua phatsan hi nakinah a la pawi dawn a. Kan la inchhir dawn a ni.

-PC Nghàklianmâwia