THE BIBLE SAYS SO!

Lawmman thu hi kan Lal Isuan A sawi ṭhin a."Lawm ulangin, nasa takin hlim rawh u, vânah in lâwmman a awm hnem si a," a ti (Math 5:12). "Tu pawh heng mi tê tak zinga pakhat hnênah hian, zirtir a nih avanga tui vawt ni khat pawh pe apiang chuan, tih tak meuhin ka hrilh a che u, an lâwmman an chan tawp lo vang," (Math 10:42).

Tirhkoh Paula chuan Krista Nî chuan (Today's English Version) mi tin hnathawh chu rangkachak anga hlu nge, lungmantam anga hlu nge, tangkarua anga hlu nge, thing emaw hnim emaw buhpâwl emaw anga hlu lo nge tih a la pho lang dawn a ti (I Kor 3:12,13). "Mi tinin taksaa thiltihte a chhia a ṭhain, kan tih ang zela (lawmman) kan hmuh ṭheuh theihna turin Krista rorêlna ṭhutphah hmâah chuan tihlanin kan awm vek tur a ni si a," a ti bawk (II Kor 5:10). "Tûnah chuan felna lallukhum chu ka tan dahin a awm tawh a, chu chu Lalpa ngaihtuahtu fel tak chuan chumi nî (Krista nî) ah chuan mi pe ang; ka hnenah chauh ni lovin, a lo kal lehna nghakhlel ru apiangte hnenah pawh (everyone eager for his coming, The Bible in Contemporary Language II Tim 4:8).

Tirhkoh Petera chuan, "Kohhran upate chu...ka fuih a che u...Pathian pawlho awm chu enkawl rawh u...pawlho entawnah insiam zawk rawh u. Tin Berâm Vengtu Lalber chu a lo lan hunin, ropuina lallukhum vuai thei lo chu in hmu ang," a ti (I Pet 5:1-4). Jacob-a pawhin "Ka naute u ...zirtirtuah lo awm suh u, zirtirtuin rorelna nasa lehzual kan tâwk ang tih kan hre si a," tiin kohhrana hotu nih leh hruaitu nih châk lo turin a fuih a nih hi (Jacob 3:1). Pathian koh ni lova Kohhran hruaitu nih ve ngawt hi Pathian duhzawng a ni hauh lo! Heng kan Bible thu lak chhuahte aṭang hian kan Lal Isua sawi angin Krista Nî-ah kan thiltih kan rawngbawlna enfiahna hun chu a awm dawn tih a lang chiang hle. He Krista Nî lo thleng tûra kan thiltih ṭheuhte pho lan vek a nih tur thu hi Pathian Thlarau luah ringtute rilru chuan a ngai pawimawh lo thei lo vang. Chuvangin a nun leh a thiltihte chu a uluk lo thei lo vang. Chu chu Apostolten an sawi chhan pawh a ni. Engtin nge Krista Nî chu lawmman semna nî (Day) a ni tih kan hriat theih ang?

Paula chuan Korin kohhrante buaina thu rem fel a tum khan Lal Isua inlarna kha Lalpa Isua Krista Nî a ni tih a sawi a (I Kor 1:7,8). A zawm zelah chuan mi tin hna thawh chu "Chu Krista Nî chuan a tilang dawn a. Chu Nî chuan mi tin hnathawh mei hmangin a tilang dawn" a ti (And the quality of each person's work will be seen when The Day of Christ exposes it. For on that Day fire will reveal everyone's work. Today's English Version).

Krista Nî tih hi Pathian Thu chhuttu tam tak hian Lal Isua lo kal leh hun nen thuhmunah an ngai ṭhin a, an chhût ngun lo deuh a ni. Korin bung khatah khan Lalpa Isua Krista inlarna sawi langin chang riat-ah chuan Lalpa Isua Krista "Nî" a sawi ta a (I Kor 1:7,8). Kha "Nî" ngei kha mi tin hnathawh tihlanna nî (day) tur a nih thu sawiin "The Day of Christ tiin leh, That Day" tiin, grammar dan dik takin definite article (the) hmangin Kha Nî kha a rawn tar lang ta a ni. Krista Nî hi Lalpa Nî sawi dan danglam ni lovin, Lal Isua Second Coming sawina pawh ni lovin, thil hrang amaha ding nalh, Rapture-in a rawn keu hawn a ni zawk.

He Krista Nî-ah hian piangtharte chauh an lang dawn a. An rawngbawlna Pathian pawm tlakte chu lawmman hlu tak pek an ni ang a. Chung an lâwmman hmuhna thil ṭha tihte chu Berâmno Nupui neihnaah inchei nana hmangin an ding dawn a ni (Thup 19:8).

Eschatology (hun hnuhnung zirtirna) hi hriatthiam thuai hi a awl lo khawp mai a. Sawi leh duh in neih chuan ka nambarah hian in rawn sawi ṭhin dawn nia.

- F. Lal Thanzuala, 9436141242