En teh, a lo her chhuak dawn ta!

Krismas dawna ka lung tileng ṭhin hla chu, “En teh, a lo her chhuak dawn ta,” tih leh “...Hmatiangah kan thlir,” tih vel hi a ni ṭhin a, tunah erawh lo her chhuak tur leh eng hmatiangah nge kan din tih hi in rin loh lamah ka han kuai lut thut teh ang. Kan ruaiṭheh leh inren nachang hre lek lova hnam retheiin sa kan chen hun a inher chhuak dawn ta a, awmze nei zawka kalpui thiam hmasa sa kan vannei dawn a ni.

Krismas leh Kumchara kan sa ei dan buan buan hi “A Mizo a lawm le,” tia ngai kan awm ang a, kei chuan, “Thil dang ṭha zawk kan hriat hmaa mi a nih vangin a kalphung hi thlak hret ang,” ka ti daih dawn. Vawi khat chaw ei tura kan insen dan en hian kan senso ngai reng hian puar takin vawi hnih kan ei theih ka ring. December 26 tlaiah ruai kan ṭheh tlang pui a, a ṭhen tan phei chuan, “Sa rim thang hiam huam vangin ka ei thei lo,” an tih tur khawpa sa kan tlan hum hum hi kei chu a mawl thlak tlata hriatna ka nei a, in tih changkan tum luat tuk avanga hnam ze bo ṭhaka in lak vai
ṭingṭang erawh chu ka thil hlauh ber a ni lawi si.

Tun hma kha chuan sa hi kan rawp a ni. Tun hma chuan thingtlangah chuan pawisa pawh nei ila a sa lei tur kha a awmin a awm lo hrim hrim a, tuten emaw an vawk an talh nikhua kha a ni mai a, khawpuiah pawh khan bazar-a sa awm ni bik kha a awm ṭhin. Krismas leh ruaiṭheh kan nghahhlelh chhan chu sa ei tur awm vang kha a ni ngai a, kha tih hunlai kha chuan ei tur a la tlem a ni. Sa kap thei deuhten sa an kah changin laina leh an duhsak hnai kan nih ve chauh sa kan ei ve phak a ni chauh ṭhin.

Tunah erawh sa hi a tam em em tawh a, kan ram hi sa rawpin kan ril a ṭan huam tawh lo. Chuvangin, kan krismas leh Kumthar ruaiṭheh dan hi ti danglam ila, thlai lam hi ei uar ila, bai leh tlakte hi siam tel nasa deuh deuh ila, sa hi chu a duhin an ei turin dah ve tho ila, sa ringawt mai chhawp hnur renga ruaiṭheh hi a hek sak a, a man a tam em em a ni.

Ruaiṭheh dan
ṭha zawk, zangkhai zawk, hek lo zawk, item kim tho si, kan duh ang ei thei tho si hian a tih theih ka ring. A tih dan tur leh ruahmanna chipchiar sawi tur erawh ka hre ve lem lo a, hetiang lama rem hre zawkte’n rawn sawi zau ve teh u.

- Lallianzama