Sawrkar laipui scheme hmang ṭangkai ang u
Union budget 2026 chu February 1 khan pharh a ni a, sawrkar laipuiin eizawnna bul ṭan tur leh sumdawng tenaute tan scheme hrang hrang a chhawp chhuak leh a, hei hi a bikin ṭhalai lamin kan ngaihven a ṭha viau mai.
Sawrkar hnain min daih seng vek tawh lo a, sawrkar hnaa innghah tum ringawt a fuh tawh lo. Tunlaiah ṭhalai, mi thiam tak tak, zirlaite pawh tiamin, sawrkar hna thawh tum kher lo pawh an awm fur tawh. Hei hi hmasawnna ṭha tak pakhat pawh a ni. Mahnia kea din a, mahni kutkawih eizawnna din hi a ṭha a, mi dangte tana hna siamtu an ni nghal thei bawk. Sawrkar pawhin heng mite hi a ngai pawimawh a, an bul ṭanna leh hmalaknaa puihna tur scheme te pawh a siam ṭhin. Hengte hi kan haichhuah thiam a, kan hman ṭangkai thiam a pawimawh hle.
Hemi rual hian eizawnna tur kan thlanna kawngah ngaihtuah ngun a ngai a, a hlawk ang tih vang ringawt ni loin, mahni tuina zawng ngei kan thlan erawh a pawimawh. Bul kan ṭan dawnah uluk taka ngaihven leh zirchian a, sawrkarin scheme a chhawp chhuahte, kan hman ṭangkai theih dan turte pawh kan hriat hmasak a ṭha. Mahni tuina tak hna kan thawh chuan kan hah deuh pawhin hrehawm kan ti lo a, a hahthlak laite chu min cho phurtu leh min nawr kaltu an ni zawk fo ṭhin.
Budget tharah hian startups leh MSME tan fund tam tak dah a ni leh a; hmeichhia, SC leh ST entrepreneur bul ṭan turte tan pawh loan lak theih turte ruahman a ni leh bawk. Hengte hi kan ngaihven ṭhat a, sawrkarin min puih a tumna hi kan hman ṭangkai theihna turin budget pawh hi kan ngaihven ve a, kan zirchian a ṭha hle. Vai ho rengin an hmang ṭangkai thiam emai, Mizo ṭhalai rualte hawi bo bik mai mai lo ang u.
Mahse, eng hna pawh hi inthlahdah a thiang lo a, dik taka thawh chuan thawk rim lo tan eng thilah mah hlawhtlinna a awm thut ngai lo. Rim leh hah taka kan thawh hnua a hlawhtlinna kan hmuh hi a hlu zual bik ṭhin a nia.
Mahni hnaah ṭheuh rinawm leh dik takin thawk bawk ila, min dawrtute tana rintlak nih tum zel ila. Sumdawnna lamah phei chuan teiri peih mi nih a pawimawh zual. Thil reng reng hi a kal tluang reng vek thei bik lo. A harsat chang, beidawnga bansan mai chak rum rum chak chang a awm fo ang. Chutiang huna i zuzi leh mai dawn a nih chuan thil dang pawh han ti leh mah la, a hma ang pawhin kawng lakah i bansan leh tho ang. Chuvangin eng hna pawh thawk la, harsatna awm turte hmachhawn thei turin inbuatsaih lawk ang che. Harsatna a lo thlen chang pawhin a buaina lam ni loin, buaina chinfel theih dan lam chauh ngaihtuah la, hma lam i pan zel thei ang.
- Lungen Mami