HAWI LAM

Kei hi, Biak Ina ka inkhawm hian ka ṭawngṭai zawh veleh hma lam ena pangpar khawi melh hmasak ber hi ka ching riau mai a. Ka ngaihtuahna pawh a hruai nasa thei hle. Kan lawina Mission Veng Biak Inpuiah hi chuan pangpar khawi tur hi Kohhran Hmeichhe kutah a awm a, a khawi tur ruatin pangpar leina tur leh hriattur pawimawh pek lawk a ni thin. Chuta hriattur zinga pawimawh tak chu, kan pangpar khawi chu,'Pulpit aia sang a ni tur a ni lo,' tih hi a ni a. Pangpar khawina dawhkan te pahnih, inkhawm hruaitu dawhkan veilam leh dinglamah dah niin hun bik nei lovah chuan veilamah khawi ṭhin a ni a, hun bikah erawh chuan lehlam lehlamah khawi a ni ṭhin.

Biak ina pangpar khawi hian entir a nei em tih leh engtiklai atanga kan uar nge ka hre mai lova, Kohhran hrang hrangin kan khawi duh dan leh kan rilru put dan pawh hi a inang lo thei viauin ka ring!(Biak ina pangpar khawi chi hrang hrang thlalak ka hmuh thin atanga he ngaihdan hi siam ka ni).

Pangpar buaipui em em lo ṭhin kei hian, ka inkhawm apiang hian pangpar chu en hmasain ka rilru ka kawm zui fo ta mai hi; a ṭha nge ṭha lo pawh ka hrethiam chiah lo! Mahse, ka ngaihtuahnaah erawh hringnun nena khaikhin tur a lut fo thung.

Pangpar khawitute hian a tlangpuiin Inrinni zanah an khawi a, Nilaini zan inkhawmah a ngai chu rin a ni tlangpui. A pangpar a zira chuai mai chi leh chuai lem lo te, a khawituten an enzui lem loh avanga Nilaini zana chul deuh anga lang leh enzui deuh chu, a chhe hman deuh paih ṭhena nalh taka lang zuite a awm a. A lan dan pawh a inang lovin a rawng inchawih dan pawh a inang chiah chiah a awm ngai hauh lo.

Hawilam neia khawi a tam ber a, hmalam aṭanga en chuan mawi tak an ni tlangpui ṭhin, hawi lam neia khawi ho chu...

Biak Ina kan pangpar khawite hi a bik takin khawpui lamah chuan pangpar tak khawi a ni ṭhin a, rei tak daih thei lo mah sela, a thlakna tur ngaihtuah thei Kohhran an nih miau avangin, kar tin a thar an ngaihtuah leh mai ṭhin a ni. Kohhran pachhe deuh zawk chuan pangpar lem, rei tak daih thei, thlak fo ngai lo, mahni phak tawka tha leh mawi an ngaihtuah a, chu chu an hmang nawn mai thin bawk a.

Pangpar tak khawi chuan, vuai leh chuai thei anih miau avangin thlak fo a ngai a, a mawi laia mawi tak pawh a nunna ber, a kungpui aṭanga tan chhum anih miau avangin a vul rei thei lo a ni ber.

Mitin mai hian kan nunna leh kan mawina, kan taksa khawl hrang hrang min tihrisela min timawitu tichhe thei ei leh in, zuk leh hmuam leh ruihhlo hmang hian kan chuaiin kan vuai thei tih hi hria ila. Pangpar anga a dang, amah tluk emaw a aia mawi emaw a thlak mai theih loh khawpa hlu kan nih avangin, kan nunna titawi thei lakah inthiarfihlim ang u.

Khua/Veng kilkhawr zawk, Kohhran tê zawk ten,'Khawpuiah, Kohhran lianah pangpar tak an khawia, a tak ngei khawi ve ang u,’ tih rilru an pu kher lo ni a lang hi, mimal leh chhungkua ang pawha kan zir tur dang, Biak in pangpar khawi aṭanga ka ngaihtuah dang leh chu a ni. Mahni tlin leh phak tawk ngaihtuah lem lova, midang tih ang leh neih ang neih ve duhna hian kan khawsak phung a tibuai nasain, kawng dik tawklo zawh tura thlemna do kawngah kan chak lo fo thin anih hi!

Pangpar khawi thenkhat, hawi lam nei, hmalam aṭanga thlira mawi tak leh thlir vawng vawng loh theih loh te hi, sir lam leh hnung lam aṭanga mawina reng nei lo te a ni fo mai. Kan Biak Inah chuan, sir lam aṭanga hmutute chu Kohhran Kawmiti ho leh Kohhran Hmeichhe hruaitu ho an ni deuh ber a, hmalam aṭanga a mawi tih an hriat avanga an enna lam aṭanga mawi lo deuh(?) han ngaimawha han phun tur chi an ni hauh lo(Kohhran dangah pawh an ni ngei ang). Hnunglama awm chhun chu thuhriltu a ni mai a, pangpar khawiah a buai dawn lo!

Hetiang hi kan hringnunah chuan a ni ve hauh si lo. Kan fate hian anmahni aia an unaute lam chauh kan hawi anga an hriat chuan an tana mawina nei ve lo kan lo ni anga, anmahni ngaipawimawh lo leh hnuchhawn nia inngaiin, an puitlin chhohna turah harsatna a thlen thei ṭhin. Khawtlang hruaitute hian kan chhungkaw lam an hawi ve ngai loha, mi chhungkaw lam an hawi bik nia kan ngaih chuan, kan khawtlang hruaitute chu kan ngaihlu lovin an thu pawh kan zawm ṭha duh lo ngei ang!

Kohhran hruaitute pawh hawilam nei, an hawi loh lam tana chhenfakawm lo tak nia hmu a awm theih dawn khawp hi a lo ni a. Chutiang bawkin sawrkar, mipui sawrkar kan tihte pawh hi a hawi lam chu a Party mi leh sa te chauh a nih tlat chuan a hawi loh lam tan chuan a mawi lohzia hlir sawi a nuam ṭhin.

Nu leh pate hian kan fate enkawl kawngah hnuchhawn bika inhria an awm thei em tih ngaihtuah fo hi a pawimawh em em a. Kan hawina lam tana parmawi tak hi kan hawi lohna lam tan chuan hnawk satliah a ni thei tih hria ila. Khawtlang hruaitute emaw, kohhran leh sawrkar emaw pawh hian hawi lam nei lutuka hmalak bansanin, hmalam, sir lam leh hnunglam aṭanga en pawha mawi tih tlan theih turin chet zir ila. Hawi lam kan nei lo thei lo anih pawhin, kan hawi loh lam pawh ngaihthah chuang lova huapzo turin kan mawina semzai hi zir zel ang u.

- Dikteii Hnamte