Kumin chu hâl lo ang aw

Krismas leh kum-thar boruakin min nang tawh a, mi tam zawk hi chu kan ni deuh hulh tawh. Hetiang boruak a nih chhoh tawhah hian kan insum zo lo ang a, halpuah leh halmawi te kan hal leh hluah mai ang tih ka hlau hle. A haltu tan chuan a nuam pawh a ni mai thei a, mahse a nghawng thuizia leh pawilotena an tuar nasat theihzia hi ngaihtuah thleng hram thei ila a lawmawm ngawt ang.

Hun eng emaw chen aṭang khan kan hal ta lo a, kan hal nasat ber ṭhin hun, kumthar zanah pawh ri awm miah loin kan hmang thei. Mipui hian thu kan awih thei hle tih a lang.

Amaherawhchu, chu sorkar lam remruat fuh tawk loh avangin kan han hal leh zauh mai a, khami hnu khan inkhap a har ta a niang, kan hal leh ta phauh phauh mai. Mumal taka hal a, halmawi leh halpuah nena awmze nei taka kumthar chuankai kha kan la thiam lo hle.

Halpuah leh hal-mawi hian mihring hriselna a khawih nasat dan chu sawi tam ngai loin kan hre vek a ni. Kan naupan lai, thingtlang khaw lian deuha kan awm laite khan, kumthar a zawh meuh hi chuan hal lam hi kan lo ti nasa a niang, ar pul hri a leng nghal a, ar tam tak an thi ṭhin. Ar pawhin an ngeih loh chu mihring tan pawh han ṭhatpui tur a tam lo hle. Hritlang a zual a, damlohna a tam a, thawkna dawt a khawih a ni. Chu mai bakah a puak ri avang ringawt pawh hian damlo, a bikin lung lam ṭha lote phei chu ngaihtuahawm tak an ni.

Aizawl bikah phei chuan mi tam takin Aizawl an riah chhuahsan ṭhin.

Halpuah leh hal-mawi hal miah loa kan awm kum khan kan inchhir lo vek maiin ka hria. Kumdang aia a nawmzia te, Mizote zirtir leh kaihhruai kan nawmzia te kan sawi a, vai ram chanchin-bu ṭhenkhatah pawh khatiang taka muan-awma kan hunpui kan hmang liam thei kha fakna an rawn ziak a nih kha. Kuminah pawh hian khatiang khan kan hmang leh thei ngei dawn tih a hriat a, mahse kan insum leh sum loh kha a pawimawh lai a ni.

Zan khat lek pawh nise nasa taka kan hal hian mihring hriselna a khawih a, boruak a tibawlhhlawh a, kawtlai a tihnawk a, sum tam tak kan seng ral bawk. Zan khat leh kan hal loh thung chuan mi tam takin nuam an tih phah a, sum a lo thlawnah kan seng lo a, thlamuangin mi tam tak an mut mai bakah boruak thianghlim kan nei.

Kumin pawh hian keimahni nawm-na leh phurna chauh ngaihtuah lo hian kan chhehvel, kan chenpui, kan ṭhenawm leh damlote ngai pawimawhin i hal lo leh teh ang u.

- Lalkhawngaiha