Aizawlah speedbreaker a tam

Tun hnaia Aizawl khawpui chhung kawng­pui pawimawh tak takah speedbreaker siam thar hmuh tur a awm nual a, a tam ta mah mah em? A ṭhatna awm bawk mah se, a ṭhat lohna pawh a awm nualin a lang. Khawpui chhung emaw, highway-ah emaw pawh ni se, kawng­pui speedbreaker siam hrim hrim hi he­tiang lam kaihhnawih danah phal a ni loa sawi a ni a. Mizoram PWD-te hian speed breaker siam hi an duh lo viau niin an sawi ṭhin. Tun hnaiah Aizawl khawpui chhung kawngpuiah speed breaker siam thar a awm nual a, hmun ṭhenkhatah phei chuan a tam mah mah hial awm e. An siamna kawngpui bul hnai leh veng mipuiin an duh a, an ngen leh nawr nasat viau vanga PWD-in an siam tak a nih a rinawm.

Kan hriat atana ṭha erawh chu, speed brea­ker hi an siamna veng mi, a bul hnaia awmte ni lo chuan kan ning tlangpui a, kan duh lo deuh vek mai. A chhan chu, lungmuang tak leh nuam taka tlân theihna reng turah kawngpui nuam lo zawk, tlan hrehawm zawk kan insiam chawp a ni. Kawngpui ṭha, mâm ṭha, tlan nuam kan duh a, kawngchhia chhia ningin kan iak kan iak a; kawngpui ṭha chu kan nei ta cheng a, mâm ṭha taka awm thei reng, tlân tinuam lo em em tura speed breaker kan han siam leh tlat si hi chu, kan khawlhkham ve ngawt chuan a lang. 

Speed breaker hian lirthei khalhtute leh mipui himna a thlen ngei mai thei; chutih rualin, chetsualna a thlen ve thei bawk tih erawh hriat tel a ṭha. Hmân kum deuh khan Aizawla veng pakhatah speed breaker páwng ṭha em em mai a awm a, two wheeler pakhat chuan speed breaker a awm tih hre loin a la mám pawp mai a, chetsual phahin, nunna hial an chân phah anga sawi a awm ṭhin; a dik leh dik loh erawh ka chiang bik lo. A dik a nih chuan, himna tura siam speed breaker chu thihna thlentu a ni ve tho tihna a nih chu.

Durtlang leh Leitan vel hi kawngpui a mâm ṭha a, blacktop chin a zauh tawh bawk avangin tunah chuan kawngpui zau leh mâm ṭha tak a ni ta; lirthei tan pawh chak deuh taka tlân theihna hmun a ni. Durtlang chinah hian speed breaker a awm miah lo a, Leitan veng huam chinah hian speed breaker paruk a awm thung. Speed breaker awm lohna Durtlang chinah hian lirtheia insut (mi sut) vanga chhiatna lian tham thleng a awm tawh em ka hre lo a; speed breaker paruk awmna Leitanah erawh chuan, tun hnai lawkah zan dar 8-9 velah bike pakhat chuan nu pakhat a su hlum der mai! Hei hian speed breaker-in chetsualna a veng vek bik lo a, speed breaker awmna leh awm lohnaah chetsualna leh mi tihpalh theihna 'chance' a awm ve ve tih a tichiang awm e. 

Kpeed­breaker kan duh tlat a, PWD kan siamtir lui a nih pawhin, speedbreaker vanga chetsualna a thlen loh nan speedbreaker a awm a ni tih lirthei khalhtute'n an hriat ngei theih nan hriattirna/ chhinchhiahna chiang tak a awm ngei tur a ni. Speedbreaker awmna ṭhenkhatah chutiang hriattirna/ chhin­chhiahna chu a awm laiin, a tam zawk­ah chuan a awm lo tlat mai a. Hei hi thunei­tute'n ngaihven se a duhawm hle mai. 

- KVL Lawmsanga