THE BIBLE SAYS SO!

Baibula hun hnuhnung chhûtnaah hian Daniela Hapta 70-na tih hi sawi a ni ve thin a. Eng nge a awmzia tih hriat i lo tum teh ang aw!Christian Theology tih theology lehkhabu ziaktu chuan Conservative Christian mithiam tam takte hian Lal Isua lo kal lehna hi "thil inzui" chhâwng hnih (two Stages) a ni ang tiin an zirtir ṭhin a (Christian Theology, Millard J Erickson, phek 1093). Chumi awmzia chu Mi Thianghlim lawrah ringtute vana lâk chhoh hun a lo thleng hmasa ang a, a nakinah A lo kal lehna tak tak a lo thleng ang tihna a ni. Hei aia sawifiahna thîp lehzual a awm leh a. Chu chu : Kohhran lak chhohna – mi thianghlim (piangtharte) lak chhohna hun (rapture) in hma a hruai ang a (Math 25:1-13; Johana 14:3; I Kor 15:52-54; I Thess 4:16-18); chu hun chu Krista Nî (the Day of Christ) piangthar vana lâk chhoh te lawmman pekna leh chawimawina hunin a zui nghal ang (IKor 1:7,8; 3:10-15; 4:5; II Kor 5:10; Rom 14:12; Thup 22:12). Chu hnuah chuan Berâmno Nupui neihnaa an incheina thawmhnaw tur – an thil ṭha tih Pathian pawmtlak te chu tih chiana chawimawina pek an ni ang a, tichuan chung Pathian pawmtlak thil ṭha tihtea inthuamin Lal Isua Krista leh kohhran (piangtharte) inneihna chu vânah a awm zui ang (Thup 19:8). Chumi zawhah chuan Lal Isua chu A mi thianghlimte hruaiin leiah A lo chhuk ang (Thup 19:11-16). Hei hi Lal Isua lo kal lehna (a series-a indawt) thil ropui tak tak – Rapture, Krista Nî, Berâmno Nupui Neihna leh Second Coming chhâwng chho chu a ni.

A nih khawii laiah chuan nge Daniela Hapta 70-na chu a awm ve dâwn tak? Hei hi hetiang hian a ni ang. Rapture chuan Kohhran Period (Kohhran awm hun chhung tur) kha titâwpin Krista Ni, ringtute rawngbawlna enfiaha lawmman pekna hun a hawng a, Beramno Nupui neihnain a rawn zui a, chumi hun chhûng chuan he leiah hian Sakawlh rorelna, kan Lal Isuan hrehawm nasa tak hun tia A sawi, Paula'n Lalpa Nî tia a sawi (II Thess 2:2-4,8,9) kha a lo thleng ang, rapture aṭanga Isua Krista lo kal lehna hemi hun chhung hi Daniel Hapta 70-na an tih ṭhin chu a ni.

Daniela Hapta 70-na hriatthiam hi eng nge a ṭangkaina le? Pathian Fapa, an Messia haia duh lova hnawla krawsa khengbettu Israel-hote chu chhandam an nih ve theih nana Pathianin hrehawm elkhen hmanga chûng A mi Israelte A hnêna A hruai luh vena tûr thu kan hriat thiamna tur leh, he Hrehawm nasa Tak Hun (the Great Tribulation) kan Lalpa ngeiin A sawi lâwk (Math 24:21,22; Thup bung 6-18) hriatthiamna hi a pawimawh lutuk tak a ni.

Kohhran Hun Bik a zawha Israelte Hun Bik lo chhuak ve hriatthiamna hian kan Pathian thu hriatthiamna hi a tihleitlingin a tifamkim chho dawn a ni.

Hemi hun bikah hian Israelte chhandamna kha Pathian MAJOR SUBJECT a ni ang. He subject zirna Baibul thu berte chu Daniela bung 9 leh Thupuan bung 6 aṭanga bung 18 (or bung 19) te hi an ni ber a. Kohhran Hun chhung hian Jentail-te Pathianin A thlûr lo thei lo va. Israelte khan an Messia hnar tlat hek! An hnar avangin Pathian Lalram (chhandamna thu) kha Rah chhuah tur (Jentail) hnam hnênah pek a nih kha (Math 21:43). Israelte chu ngawng taka awmin chhandamna lamah chuan eng an la ni thei lo va; Paula'n, "Vawiin thleng hian thuthlung hlui an chhiarin khuhna pângngai chu hlîm lohvin a awm reng si a...Mosia Lehkhabu an chhiar apiangin, an thinlungah hian khuhna a awm ṭhin," a tih kha (II Kor 3:14,15). Chutianga tun thleng (2026) pawha an awm hi hruai harh turin, kan Lal Isua sawi lawk "hrehawm nasa tak" hmang khan Pathianin an thinlung kawngka A hawnsak dawn a ni (Math 24:22,22). He hun hi Israel-te Major subject an nihna hun a ni a. Math 24:22-ah pawh kha hrehawm nasa tak kha "thlante avanga tihtawi" thu a awm kha, khata thlante tih kha A mi Israel, hrehawm hmanga A tih pianthar turte an ni. Thupuan bung 6 hi he Daniela hapta 70-na intanna a ni a. Israel lam hlir sawina a ni a. Kohhran tih thu pawh a lang tawh lo. Israel-te Major hun a ni a. Nuai khat leh sing li leh sang li lai Pathian sipai (bawihte) kan hmuh kha (Thup 7:4). Khangte kha Rapture hnua piangthar, Kohhran hun a liam hnua Daniela hapta 70-na chhunga rah hmasa (piangthar hmasate) an ni tiin, Apostol Johanan Pathian tan leh Beramno tan rah hmasa ber tiin a ziak nghe nghe kha (Thup 14:4).

Mi ṭhenkhat hian, a bikin Amillenialist, kum sang lalram pawm lohote hian Israel-te hi Pathian hian A ûksâk tawh lo, A hnawl tawh a, an hmunah khan keini kristiante hi min dah tawh a, Pathian hian Israel-te tan eng program mah A nei tawh lo, mihring hnam pakhat an ni ve mai mai tawh a ni tiin an sawi ṭhin. Eng ngati nge Tirhkoh Ropui Paula thu an kalh le aw! Apostol Johana pawh hian awmze nei taka thu ziakin Israelte harh lehna tur sawiin Pathian bawih 144000, Sakawlhin a tihnat theih lohna tura chhinchhiah tlat, an thuhril avanga mi chhiarsen loh piantharna thu te, an martar thu a ziak kha! Thupuan bu han chhiar ila, a bung hmasa 3-te bakah kha chuan kohhran tih thu i hmu tawh lo vang.

Bung 22:12-na lah Kohhran pasarihte hawi zawngah fuihna thu a ni si.

Daniela hapta thu hrim hrim aṭanga hapta 70-na thlengin, diṭêl zawkin lehpekah kan ngaihtuah leh dawn nia. Space zîm têah thu tam tak ziak kan tum a, a fiah lo fo vang. A tawpah ka nambar ka dah hi, zawh duh leh sawi duh i neih chuan Open at all Times!

- F. Lalthanzuala, 9436141242