Politics-a inbeihna bak a ni lo
Mizoram journalist zinga hming langsar ber zinga mi Pu H.C. Vanlalruata'n Vanglaini chanchinbu-ah Lengpui ram Indian Air Force (IAF) hnena hralh chungchang, cheng vaibelchhe 187 vel man a nih dan leh thil dik lo awm nia lang theite a rawn tarlang a. Mizoram mipui kan phu suau a ni ber mai a, opposition party-te phei chuan sawrkar beihna tur 'point' ṭha em em mai neiah an inngai a, nasa taka sawrkar beih nan an hmang nghal zat bawk a ni.
Mahse, sawrkar hmalakna a ni emaw, sawrkar inrawlhna ang chi rêng rêngah, thil dik lo, hlemhletna leh eirukna, sum tihchingpenna lam a awm nia lang theiah opposition-te'n sawrkar beih nan an hmang fo a, eng emaw chang phei chuan kawngzawh huaihawt phah nante pawh an hmang tawh ṭhin awm e.
Chutianga sawrkara thil dik lo, a bikin corruption a awm ang leh sawrkar hotute inrawlh anga an inpuhnaah chuan, politics-a inbeihna atana hman chiah an duh a, dan ang taka thuneitute'n an chhui a, dan anga rorel an duh tak tak ngai lo. An rilru chu politics-a inbeih chiah a ni.
Congress sawrkar lai khan MNF ho khan Dihmunzawla PHE tanky ṭhiah man to tiin sawrkar an bei vak vak a, PHE Minister chu inhnamhnawihna neiah an puh a. MNF vek hian transport subsidy chungchang an buaipui vak a, 'truck thlawk thei' tiin sawrkar an bei vak a; nasa taka corruption ti ah minister pakhat chu an puh a ni. Heng bakah hian thil dang dangte pawh sawi tur tam tak a awm.
Mahse, opposition party-te'n sawrkar hotute, a bikin politician-te hlemhletnaa inhnamhnawiha an puha an beih vak vak hian, dan ang taka hmalak erawh an tum ngai lo. Sawrkar hmalaknaah corruption a awm ngei nia an hria a, ram hruaitu minister-te an inhnamhnawih nia an hre tak zet a nih chuan, polititics-a inbeihna ringawtah duhtawk lovin, police, ACB, CBI, etc. ah te FIR thehlut ang hmiang. Mahse, chutiang chu an ti duh tak tak si lo.
Tunah pawh IAF hnena Lengpui leh Sihphir ram cheng vaibelchhe 187 vela hralh chungchang pawh political party-te'n nasa takin an buaipui. Party ṭhenkhatin press conference hial neih phah hial. A tir lamah CBI chhuitir tur te, FIR thehlut turtein an inhnawk kual vel a. Mahse, FIR/complaint thehluttu nih kha mipui laka hmingṭhatna turah an ngai leh thut a, ni khat thilthuah complaint an thehlut leh suau a! A mak ṭhin a nia!!
Heng zawng zawng hi thil dik lo an huat tak tak vang a ni lo va, politics-a hmingṭhat an tumna bak a ni lo tih hi kei leh ka ṭhiante pawm dan a ni.
IAF hnena ram leitir chungchang hi sawi vak vakin awmzia a nei lo. CBI-ah FIR thehluh a ni tawh a, Mizoram CVO-ah CBI chhuitir tura ngenna a lut tawh bawk a. CBI-in an chhui turah ngai ta ila a, thil nihna dik tak an chhui chhuak mai ang. Political party-te'n sawrkar lai party va sawichhiat chiam te, ruling party-in sawrkar hmasate puh let chiamte a ṭul tawh lo.
- Lalhlanpuia