Mi lian thiltithei hmelhriat nei ve lote tân Zoramah khua a vâr ṭan

Kum 2023-a sorkar thar chuan Chief Minister thar, kut fai leh huaisen, rahbeh zâwkte dinchan ve nana hun rei tak Zoram dung leh vanga lo âu tawh Pu Lalduhoma min her chhuahpui a. Lui pawh a hnâr a fìm chuan a mawng lam pawh a fimin a thianghlim ṭhin. India rama state zingah 'corrupt' lo ber kan ni mek a. Kan CM dikna duhtu kaihhruaina hnuaiah Home Minister dik leh huaisen kan nei leh zel hi kan vanneihna hun a inher a tih ngam hial awm e.

He dikna leh felna hian ṭhalaite leh chanhai zawkte lakah beiseina a siam a, chu beiseina chuan ram hruaitute chungah rinna min neih thartîr leh ta mêk. Siam tharin kan awm a, a ropui e!

Home Minister Pu K. Sapdanga'n 9.2.2026 ZPM chhung inkhâwmah eng nge a sawi en ang: "Police post ruak 4,666 a awm mêk a, tunah hian 'training' mêk 250 an awm a, sorkar kum tharah police 200 lak leh tum a ni. A hmaa Police kan lak dan ang bawk khan dik leh fel takin kan la leh dawn a, ṭhalaite lo inring rawh u," a ti.

A huaisenthlak a, dikna ṭantu ni lo tana sawi ngam chi a ni lo. Hei hi Zoram mipuiin kan nghahfâk, thiltithei hmelhriat nei ve lote tâna khawvar hun kan nghah chu a ni.

Kuhva 'smuggling' do:

“Kuhva smuggling kan do a, eptute’n min do ve thung hi a pawi hle. Politician inrawlhte mipuiin an hnâwl a, Police inrawlhte pawh an pension zel a ni." He thu HM-in a sawi hi a ril hle.

Kuhva tawlhrûk sorkarin a do a, eptute’n sorkar an do a nih ngat hi chuan thil fel lo lian lutuk a awm tihna a ni. Police-te pawh an lo inrawlh ṭhin tih a lang a, hemi siamṭha tura sorkar huaisen kan nei hi a va hlu êm!

"Hachhek bialin sorkarin kuhva smuggling a beihna rah an tel a. Kan sorkar chuan kuhva smuggling hi kan khap zel dawn a, service lai an ni emaw, civil mi an ni emaw, inhnamhnawih an awm chuan kan dim dawn lo,” Pu Sapa'n a ti ngam hi ram leilung fate thlavang hauhna, Mizoram chhunga dik taka kut hnathawktute humhalhna a ni.

CBI 'consent' pêk a ni dawn:

CBI-te’n kan state chhunga case an chhui theih dan te, an hnêna Mizoram sorkar leh sorkar hnathawkte laka FIR a awma hmalâk dan turte hre chiang si lo, âtthlak tak taka thu dik lo hmanga ngaihdan ziak chiam kan tam teh e!

Mizoram sorkar leh state chhawr sorkar hnathawkte CBI-in a chhui dawnin 'complaint/FIR' an dawn a ngai (Supreme/High Court order a nih ngawt loh chuan). Chhui tlâkah an ngaihin state sorkar hnenah consent an dil chauh ang. State sorkar hian consent a pek duh leh duh lovah a innghat.

Lengpui leh Sihphir ram IAF lâk turah erawh state sorkarin consent pêk a inhuam a ni–leh ta rap mai a!

“Lengpui leh Sihphir ram IAF kuta hlan chungchangah inpuhna maksak tak hi a puhtute leh puhte kan duh tlan dan angin CBI kutah a lut dawn ta a, sawi zui tur a awm tawh lovah ka ngai. AMC inthlan tur thlir lawka hetiang thawm ring tak siam pawh hian awmzia a nei dawn ta lo a ni,” HM chuan a ti–a fiah khawp mai.

Tlipna:

Tuna Home Minister huaisen leh dik ang hi kan state hian kan la hrawn lo niin a lang. Hun hmasa lamah khan kuhva smuggling chungchang sawi a nih khan HM hmasa khan 'Mit kan siai' zuk ti duh chauh a! Tunah chuan drugs tawlhruk thlengin nawr tawm a ni a, Police lâkah dikna a lal ta bawk. Beiseina nen hma lam êng kan nei chho mêk a ni.

~ Zoa Tlau, Buannel Cabin