Kan tlân ri zer zer ta mai!
Tunlai chu Aizawl khawpui chhung hmun tinrengah kawngpui mâm ṭha tak maiin an siam mup mup reng mai. District khawpui dangahte leh thingtlang khaw dangahte pawh an siam mup mup mai bawk. Kawng chungchangah kher hi chuan ZPM sawrkar hian opposition party ho kâ an hup hmak rih niin ka hmu.
Nikuma favâng inṭan lai, ruahtui a hul ṭan chiah khan Aizawl khawpui chhung kawngpui siam ṭan nghal a ni. Tunah ṭhâl vaêkchâr lai a ni a, hmun tam takah kawng an siam zo tawh. Kawng siam hi hmun khatah chauh ni loin, hmun hrang hrangah an bung suau suau mai a, hmuh a nuam ngei mai.
Tun ang rêng rênga sawrkarin kawngpui a siam nasat hi tun hma zawng khan a la awm lo hial awm mang e aw ka ti. An kawng siam lah hi tun hma ang lo takin a mâm ṭha em em mai a, lirtheia han tlan vel pawhin a rîk hian a ri zer zer mai a ni. A nuam rih ngei mai. Tuna kawng siam dan en hi chuan, ZPM sawrkar hi fak tlak a niin ka hria.
Facebook lamah khawvel awm tirh ata Hmunpui khaw panna kawng leh khaw chhung kawng blocktopping tih a ni dan te thlalak nen kan hmu a; an lawmpuiawm ngei mai. Aizawl aṭanga khaw hnai tê ni si, a khaw mite'n internet khawvela hun eng emaw chen an chên tawh hnu leh, AI hial an hman tawh hnua alkatra luan loh kawngpuia an lo la tlan khu vut vut hi a mak reuh riau. Chuvangin, tunah kawngpui mâm ṭha, 'rulngan pa ang zar' an nei ve ta hi ka lawmpui hle.
Hetih mek lai hian, social media lamah chuan sawiseltu an awm ve leh zel tho mai! Sawiseltute hi Isua tluk hiala fel leh ṭhaah an inngai em ni chu aw, ka ti rilru. Ni e, sawrkar hotute emaw, tuna kawng siam mektute emaw hi sawisel bo an ni hauh lo, tuna kawng an siam danah pawh khawi emaw laiah chuan duhkhawp lohna tur pawh an awm ang ka ring. Mahse, ṭhenkhat hi chuan sawisel tur an zawng ve hrim hrim ve bawk a ni.
Mi ṭhenkhat chuan tuna sawrkarin Aizawl khawpui chhung kawngpui a siam hi AMC inthlan dawn vang, an ti a. A dikna lai pawh a awm ang ka ring. Mahse, kawngpui siam chhan chu eng pawh ni se, siam loh ai chuan siam chu a ṭha hrim hrim, a hlâwkna têltu chu mipui kan ni.
AMC inthlan a hnai emaw, hnai lo emaw, tun hi kawng siam hun ṭha (working season) a ni. Tun working seasona-ah hian kawng siam lo se, kawng mâm ṭhaah kan tlân lo ang a, kan la insawh ṭawk ṭawk zel ang; mipui kan phun nasa ang a, tuna "AMC inthlan dawn vang" tia social media hmanga intihlar tum ngar ngar, lo phunnawi hmanhmawhte hi a phun peih peih an ni ang.
Sawrkarin nasa taka kawngpui a siam mek hi a lawmawm a, tunah chuan hna ṭha tak an thawk mek a ni. Inthlahdah a thiang lo va, han ṭang lehzual sauh sauh se. Mipui pawhin kawng siam vanga kawng khâr rih te, kawng laih chhiat rih te kan tuar nih pawhin, i hriatthiam ang u khai.
- Zoremsiama