MAHNI HUNAH ZEL AW

Sap film pakhat, ‘The Princess Diaries’ tiha an hun chan pakhatah chuan Lalnu hian a khawnbawlte a ko khawm a, hun tiamah amah ber chu a thleng hman lo hret a. Chu chu a tunu khan lo inthlahrunpui deuhin, “Pi, ‘ti nge i tlai?” a lo ti ru se se a. A pi chuan awlsam tè hian, “Lalnu a tlai ngai lo. Mi dang hi an hma mai zawk a ni,” a ti thên a!

Hmanni deuh khan Aizawla Sikul hlun ve tak pakhatin an sikul hlawhtlinna an lawmnaa tel tur leh thusawi turin min sawm ve a. Min sawmnaa ṭan hun an ziak chu chawhma dar 11:15 ah a ni. Traffic jam vanga tlai ka hlauh avangin in aṭangin ka chhuak hma a, a hun hma fèah thlengin hun khawh ralna tur ka zawn a ngai hial mai. Minute 10 vel a la awmah chuan ka lut a, ṭhutna te rem felin Khuallian kan nghak ta a. Dar 11:30 rik hma deuh chuan thu puangtuin Khuallian a lo la thlen loh avanga la ṭan thei lo kan nih thu leh a lo thlen thuai tur thu a puang a. Khuallian tur chu ka mi nel tak a nih avangin phone in ka bia a, amah chauh kan nghah thute ka hrilh a. Ani chuan 11:30 a ni lo’m ni ṭan hun a lo ti a, a lo thleng chhunzawm ve nghal mai a, dar 11:30 ah chuan. Hun pawh ṭan nghal a ni a. Kan hun hman dan tur lehkha phek ka’n en chuan ‘hun khatna’ chu 11:15am–1:00pm tih niin chu chu ka innghahna kha a ni a. A hnuaiah chuan 11:30 – Khuallian thlen hun (Sapṭawnga inziak vek a ni hlawm) tih a lo awm kalh mai! Ka tana ṭan hun leh Khuallian tana ṭan hun kha a lo inang hauh lo a lo ni a… Kei lahin ka ṭan hun aṭangin Khuallian chu tlaiah ka lo puh titih der mai chu a ni si.

Nimin piah mai khan sawrkar hun ruat pakhatah hian Minister hovin hun kan hmang a. Sawmna ka dawnah chuan Ministerin dar 9:30 a thu a sawi dawn avangin midang ho chu dar 9:15 a lo ṭhu fel tawh tura hrilh kan ni. Hetiang hian hun ruat tamtakah chuan mimir leh mipawimawh tana ṭan hun leh thlen hun hi a inang lo fo mai tih hi kan hre deuh vek awm e.

Mitinin kan neih inang vek chu hun hi a ni tih hi infuihna atan kan hmang nasa ṭhin hle. Milian leh mite, hausa leh rethei, hmelṭha leh hmelchhia, upa leh naupang, thau leh cher leh mi tinreng mai hian nitin darkar 24 vek kan nei. Buai deuh tan darkar 30 a neih theih loh ang bawkin awlthawng tan darkar 20 ah emaw a pawh tawi theih chuang hauh loh. Amaherawh chu kan hun hman dan a inang lo hle hlawm tih hi sawi kher ngai lova kan hriat tlan vek thudik si a ni.

Mahni pual ṭheuha kan hun kan ruahmana kan hman dan hian kan hmalam hun thui takin a hril a. Kan hun neih dan leh kan tih tur kan siamrem thiam leh thiam loh hian a lo thlawna kan hah leh hah loh pawh a hril thui hle ang. Tih tur ngah inti em em, a engamah ti chuang si lo pawh hi kan tam awm asin! Hun induang thiam lo, induh thawh luat avanga inhmakhua te hi ngaihtuah chian chuan an buai chhung a rei ting mai a tih theih awm e. Entirnan, tukṭhuan ei tur a hma zan lama kan inhmakhua hian a tuk zinga eirawngbawl kan ṭhulh phah hauh lova, kan thawk thuah hnih mai zawk a nihna lai a awm thei tlat!

Kan hun neih ṭheuh hi a inzat rual hian kan thawh hlawk leh hlawk loh erawh mimal tinah a danglam lo thei lova, kan theihna a danglam ṭheuh bawk avangin kan tih theih pawh a inang thei lo.

Hetiang hi thudik a ni tih hretu tamtak erawh hi chuan ‘mi âk ruala âk’ tumin theihtawp aia nasain kan bei a, kan âk ve hman loh chuan beidawngin kan lungngai ṭhin.

Kan fate kan zilhnaah ni se “I ṭhianpa, i rualpui pawhin a thei a engati nge i theih ve loh?” tiin fa beidawng kan siam a. Ama hun a thlen theihna atana kan tih ve tur lam ngaihtuah chuang si lovin. Kan fapa, kal zir ṭan ve chauh chu a rualpui a tlan theih avangin tlan tir ve tumin hnung lam aṭanga nawrin kan nem a, tlu lo thei lovin kan siam a, a tluknaa a insawh nat avangin kal a thiam sa pawh rei tak a tih ngam loh phah tih kan pawm duh lova, ama chak tawk lohnaah kan puh hlauh ṭhin.

Mitin hian kan tana ‘hun ṭha’ hi kan bawhpelh palh a hlauhawm hle. Chutih rual erawh chuan kan hun a la thleng rih lo anih chuan tlanin umin innawr chiam mah ila tluk leh tlak bak kan hmabakah a awm lo tih hi hriat tel a pawimawh hle.

Kei ngei pawh hi, ka rualpui engemawzatin sawrkar hna an thawh lai khan lo thawk ve ni ta ila. tuna ka hna leh ka dinhmun hi ka luah kher lovang. Ka ṭhiante aia ka lo thleng tlai ta deuh anih pawhin keima thlen huna ka thlen chin hi ka hun atana ruat ani tih ka chiang tawlh tawlh mai.

Kan hun taka kan thlen tur thleng thei tur erawh chuan kuangkuaha ṭhu mai mai tur kan ni hauh lo thung. Midang um reng renga hman hlel ni si lo, hmalam pana kan theihna leh thiamna mila chakin, nitin Pathianin min pek darkar 24 hi hmasawnna atan hmang zel ang u.

- Dikteii Hnamte