LAMMUAL RAM

Awmhmunah mipui tana hman ṭangkai dân tûr hi ka lo vei ve êm êm a, a Rêltute thu tlûknate pawh hi pawmpui loh lai te pawh ka lo nei ve sasawi a, lirthei tam leh tâwt lutuk mawlh hi ka lo manganpui ve ṭhin.Bazaar kal láwk duh leh mamawh léi záwk duhte emaw, Civil Hospital-a kal duh te tân pawh lirthei dahna, hàn hûn láwkna tûr remchang hi a tlêm a, lirthei ke 4 nei tân khawpui chhûng khawilai mai pawh hi manganthlâk a nih tâk avângin, awlsam zâwka lang 2-wheeler leiin kawngpui khawilaiah pawh kan inpangawzial ta múp mùp reng mai chu a nih hi.Lirthei khalhtute tân fimkhur ngai, kea kal hote tân fimkhur ngai bawk, intihnat hlau leh tihnat palh hlaute kan insûl mùp múp ni tin zan tin ta mai chu a nih ber hi!

Ka lo mitthla ve dân chuan, Bazaar Bungkawn aṭangin kawng ko hi A.R. Gate hmâr lama chhuakin laih zau vek a, chuta ṭangin A.R Canteen bulah ngîl taka lai zau lehin, chuta ṭang chuan Lammual Gate pui pàwhin nawr zâwl phei vek ni se, chutah chuan mumal takin tûna kawngpui hmán lai mêk sîr tawn tawnah chhim lam pan leh hmâr lam pan te tan Lirthei dahna, Parking siam zúi se, kawngpui pawh ngîl leh már zâwkin kaltîr ni ta se, a fuh dâwn mang e; chu chuan parking lama kan harsatna zualpui hi chu min phuhrûk deuh ngei ang, ka lo ti rilru ṭhin a nih chu.

Hmun a âwl ta e, tih vânga hûn theih, dah theih, sak theih zawng zawng khúng leh séng luh rùih rúih hi thil pawimawh ber ni pawhin ka lo hre ve lêm lo va, kan hun hman mêka kan mamawh ber phuhrûk han tum pháwt mai hi thíl ṭûl hmasa niin ka hria.

Chu lo lehah chuan, tûna Vai Mandir hi ṭhiat tûr a nih rau rau chuan, Lammual kalte lirthei dah nân, Parking atân náwr zâwl ni vék bawk sela.Chutih rualin Canteen Kual kawngpui pawh metre 2 emaw tála zauh ni bawk se a fuh ngáwtin ka ring.

A tâwp ber atân.Kan TOWN HALL neihchhun, VANA PA RÛN pawh hi, VÂNAPA RÛN/HALL ti tawh lovin, sawn lovin, a hmun ngaiah, a building hi sa ṭhain, building chhãwng 3 emaw 4-na chu kawngpui chungah pharh chho hluai se, kawngpui chhak lamah sà káiin, chumi chhãwng chu VANA PA HALL, zau êm êm maia duan ni se, mipui pawh èng function pawh awm se, min dãwl zo tawh ngei turin han duang chhuak út mai se, a hnuai kawngpui âwl thei chin leh a rèm dân angin Parking atân duan vek ni ta bawk se, kawngpui ân floor pawh restaurant changkang tak tak te dàh nân hman ni ta sela, Zu chu sawi loh, beer te, ruih theih chi niâwm chi zawrh phal miah lohna Dâwr-ah siam ni bawk sela, tih te hi mùt màwh tlíng êm lo, hnâr màwh pawh ni êm si lovah ka lo hmang ve ṭhin.

Tichuan, kan khawpui kawng chêp te a lo zau ang, lirthei psrking te kan indaih sáwt ang a, èng function emaw neih nikhuaah mipui 700 vêl tâwt êm êma kan inhnawh luih ṭhinna leh stage/platform zîm lúláia zai leh lâm kan hàn neih ṭhinna te pawh a lo zau ang a; ṭhenkhat tân sum hmuhna ṭha tàk a ni dâwn lèhzêl nên.......Advisory Committe on A.R. Land hian, mipuite chhàwr leh hlâwkpui bèr tûr chiin, ka lo hisâp dân kawng te hian an thlîr ve em aw, te ka ti a.Mipuite hamṭhatna ber tûr dàp hi ṭûl ka ti ber mai.

Kum 1960 aṭanga vawiin thlenga Aizawl khawpuia khawsa ve ṭhinah ka indsh ve a, tûnah phei chuan Pathian zârah kum 80 râl te kai phà vein, mahni tâwk tê têin mipuite chanvo hi ka thlîr ve ṭhin a. Khêlmual nei ṭha lo, mipui púng khâwm dãwl zo Hall nei lo, mipui mamawh khawp lirthei dahna nei lo.......hêng chi 3 te hi ka vèi ve ngà ngár an ni ṭhin. Chhiartuten min lo hrethiam se, a hun nge hun lo pawh hrethiam lovin ka rawn thlasik mau puah ve pàwp páwp a nih ber hi!

- C. Lianmawia