Mihring dik tak ni leh hram ang u

"Mahni anpui inneih phalna danin Mizoram min huam tel loh avangin ka support e, a ṭha ka ti e" tih leh, "CAB-in Mizoram min huam tel loh avangin ṭha ka ti a, ka support e," tih te hi thinlung hmun khat aṭanga lo ri chhuak, cousin niawm tak an ni! 

Mizoram politics conspiracy hi a thuk ve ta hle mai. Sakhua leh party ruih chilh, ngaihtuahna fim pawh hmang ngam lo, a mik a mak hre lova, "Kan hruaituten an ti a, ka support alawm," tih ngaihdan nei, thluak suksak, robot niawm taka a control-tu thu thua awm mekte hi, mihring chhhia leh ṭha hriatna nei lo, ramsa ang chauh, hruaitute thu thua mahni chhiatna tur hmun pan mekte an niin ka hre ta tlat. 

Pathian anpuia siam mihringte hi ramsa lungmawl anpuiah kan inlet ta mek a nih hi. Ngaihtuahna fim tak hmanga 'hei hi a dik nge dik lo,' tih pawh thliar hrang hlei thei tawh lova kan khawsak tawh emaw, 'Kan hruaituten ṭha an ti a, ka pawmpui alawm,' kan tih ringawt chuan, Pa­thian anpui kan nihna hi 50% a tla hniam duai tawh a ni. Kan politician-te rilru bawlhhlawhzia hi tun thleng hian en vangin nge kan hriat theih reng reng loh le? Dawi âtin kan awm ta mek a nih hi. 

Zo hnam anga kan ṭanrual ṭhap theihna tur hi sakhua­na leh politics hian min ṭhiahsak nasa tawh lutuk a, a lung­chhiat­thlak em em a ni. Pathian anpui mihring dik tak, ngaih­tuahna fim hmanga a dik leh dik lo, a chhia a ṭha tal thliar hrang thiam turin thluak suksak kan nihna aṭang hian Zofa angin i kir leh mawlh teh ang u. Ngaihtuahna fim hmang thiam lotu chuan, an sakhua leh politics hruaitute thu zawmin, a mik amak hre chuang miah si lovin, "Kross-ah kheng bet rawh," tiin Pilata hmaah an au rual ṭhup ṭhup mai asin. 

Kan mihring mihrinna, a chhia leh a ṭha, a dik leh dik lo kan thliar hran theihna kha hruaitute thu hnuaiah eng chen nge kan kuntir ang a, eng chen nge ramsa ang maia kan khawsak dawn le? Mihring dik tak ni leh hram ang u hmiang! 

- LK-a Chawngthu