Vai sumdawng mawlh hi

Kan ziak fo tawh a, ziah fo hi a ngai a ni. Rel rawn luh hnu phei chuan phalna nei lo pawhin eng eng emaw an zuar a, an sumdawng nasa ta mai. Khawi kipah smart car leh lirthei dangin an vak ta sup sup mai.

Heng sumdawng hian eichawp leh inchhung bungrua an zuar a, a ṭhenin Burma lam aṭanga ruihhlo tawlhin mansak an awm fo ta mai. Hengho hian sumdawng phalna an nei lem lo a, zin khawthawng anga kalin an sumdawng ta ṭhin a ni.

Eichawp leh inchhung bungrua zuar lah hi Mizo dawr nei leh nei lote pawh hian a tlawm e tih vangin ihe loin kan lo dawr hum hum mai a, sumdawn phalna an neih leh neih loh pawh kan ngaihsak lo. Kan lo dawr duh phian lehnghal a, a ṭha lo ngawt mai. Engtia tihrem tur nge ni ang tih ngaihtuah a ngai ta viau mai.

Sorkarin ILP khauh deuh zawka a kenkawh a ngai a, chumi ti tur chuan force tam zawk an mamawh ngei mai. Hei bakah hian a rukin YMA branch tin hi strict deuh se a ṭha khawp mai. Tharum thawha hengho hi lo dan vak chi erawh an ni bik lo ang a, thiam taka lo dawnsawn an ngai. An mahni mamawh lo thei ang bera khawsak ve a ngai a ni. Kan in zirtir pawh a ṭha khawp mai.

Tunah tak phei chuan vaiho hian min tibuai nasa tawh viau mai. Kan lirthei an ru a, drugs an tawlh a, kan hmeichhe ho tam tak lah hian awlsam taka sum hmuhna anih chuan an kawp hreh miah lo. Mizo hmeichhe tam tak hian an pasalte pawh an zah tawh bar lo. Mi pa pawh an hlau lo a, ngam siah siah tak an ni tawh. Heng kan sawi hi hriat chian chuan kan rapthlak tawh takzet a ni.

Kawngsir kuhva rah leh panhnah zuar thlengin a ruka vai thurualpui an awm ta fur mai. A chang chuan tharum hmanga hmalak a chakawm ṭhin khawp mai. Mahse tharum thawh loa chinfel dan zawn hram zel erawh a ṭha viau.

Khualzin (tourist) anga lokal tam tak pawh hi a ruka sumdawng an ni ta fur mai. Hengho pawh hi an hnawk dawn chauh a ni.

Hnamdang chhawrtu leh ILP sponsor-tu tam zawk lah hian an pawisa duh vang a ni tlangpui. Insak nana vai chhawr, an sak zawh hnuah an ILP withdraw tur khan an sezawl chhuah mai a, ILP an hminga awm reng siin hmundangah an thawk leh mai ṭhin. Hei hi dan kalh a ni tih pawh Vengtin leh khawtinah zirtirna neih a ṭul ta viau mai.

Hawh u, chimrala kan awm mai loh nan ṭan ila tlang teh ang u. A bikin branch tin YMA pawh kan ṭantlan a ngai ta e.

- Lal Rinmawia